NemID-mik inniminniineq

Kikkulluunniit 15-inik ukioqalereersimasut inuttullu normoqartut, NemID-mik inniminniisinnaallutillu atuisinnaapput.

NemID-mut malittarisassat

NemID-mik pissarsisinnaanermut periarfissat arlaqarput. Illit:

• Toqqaannartumik attaveqaatitigoortumik nemid.nu aqqutigalugu NemID-mik inniminniisinnaavutit
• Illit najukkanni innuttaasunut sullissivimmi NemID-mik pissarsisinnaavutit
• Illit aningaaseriviit aqqutigalugu NemID-mik pissarsisinnaavutit

NemID-mik inniminniilersinnak NemID-mut malittarisassat atuaqqaartariaqarpatit.

NemID-mut malittarisassat

Attaveqaatitigut toqqaannartumik NemID-mik inniminniineq
Attaveqaatitigut toqqaannartumik nemid.nu aqqutigalugu NemID-mik inniminniisinnaavutit, danskit kalaallilluunniit pas-iannik atorsinnaasumik peqaruit.

Uani inniminniisinnaavutit (malugiuk danskisuinnaq allassimavoq)

Toqqaannartumik attaveqaatitigoortumik inniminniinissamut ilitsersuut

Matuma kingorna allakkatigut illit matuersaat isissutissat tigussavat. Utaqqiisaasumik isissutissat najukkanni innuttaasunut sullissivimmut aasinnaavat, taanna siullerpaamik illit NemID pigisat atulerukku atortussaavat.

Kommunimi NemID-mik pissarsineq
Attaveqaatitigut toqqaannartumik NemID pissarsiarisinnaanngikkukku, illit kommuninni innuttaasunut sullissivimmut takkullutit NemID-mik pissarsisinnaavutit. Eqqaamaannassavat kinaassutsimut uppernarsaat atorsinnaasoq nassassagakku.

Kinaassutsimut uppernarsaatit atorsinnaasut allassimaffiat

Kinaassutsimut uppernarsaammik assitalimmik takutitsisinnaaguit, matuersaatit isissutissat aamma utaqqiisaasumik isissutissaq kommunimit pissarsiarisinnaavat. Taamaalillutit NemID ingerlaannartumik atorsinnaalissavat. Kinaassutsimut uppernarsaammik assitalimmik takutitsisinnaanngikkuit, NemID-mit matuersaat isissutissaq illit inuit allattorsimaffianni najugaqarfinnut nassiunneqassaaq.

Aningaaserivik aqqutigalugu NemID-mik pissarsineq
Illit aningaaserivinnut netbank-imut isumaqatigiissummik peqaruit, NemID-mik isumamineersumik pissarsisartussaavutit. Aningaaserivimmiit ilitsersuut pissarsiarinikuusat malillugu iliuinnassaatit.

Illit aningaaserivinniit NemID-mik peqareersimaguit pisortat nittartagaataannut soorlu sullissivik.gl-itut ittunut, NemID taannarpiaasoq atorlugu isersinnaavutit – kisianni taamaallaat NemID-mut OCES-imik uppernarsaammik ilaqartitsimaguit taamaaliorsinnaavutit. OCES naalisaaneruvoq uunga; Offentlige Certifikater til Elektronisk Service; qarasaasiatigoortumik sullissinernut pisortat uppernarsaataat. Taama ittoq pigissavat, illit netbank-innut NemID-mik pilersitsinerup nalaani ”OCES-imut piumasaqaatit angernerat” eqqaamasimagukku.

NemID-mik pisortat qarasaasiatigoortumik atsiorfissiaannik ilaqartumik peqanngikkuit, illit NemID-nnut pisortat qarasaasiatigoortumik atsiorfissiaat ilanngutsissinnaavat, periutsit marluk atorlugit:

1. Attaveqaatit toqqaannartumik aqqutigalugit nemid.nu-imi – Aningaaserivimmit illit NemID pigisannut nemid.nu aqqutigalugu OCES imatut attuumassuteqartilersinnaavat
2. Illit najukkanni innuttaasunut sullissivimmut illilluunniit aningaaserivinnut takkunnikkut saaffiginnillutit. Saaffiginnikkuit kinaassutsimut uppernarsaammik atorsinnaasumik nassataqassaatit