airplanebooksbriefcase business cogs cross election entertainment fish house law lockmedicalpeopleselfservices socialtax

Soraarnerussutisiaqalernissamut aaqqissuussinermut peqataasussaatitaaneq

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik

Kalaallit Nunaanni innuttaagavit nammineq soraarninngornissannut ileqqaartussaatitaavutit.

Soraarnerussutisiaqalernissamut aaqqissuussinermut peqataasussaatitaanerup qulakkiigassaraa Kalaallit Nunaanni najugallit tamarmik utoqqalinissaminnut ileqqaarnissaat, soraarninngorunik aningaasarissaarneroqqullugit.

Aaqqissuussineq tamanut atuuppoq, akissarsiortuunerit (ataatsimik arlalinnilluunniit sulisitsisoqarlutit) imaluunniit namminersorlutit inuussutissarsiummik ingerlataqartuunerit apeqqutaatinnagu.

 

Piumasaqaatit

Suliffeqartut tamarmik soraarnerussutisiaqalernissamut aaqqissuussinermut peqataasussaatitaanermi pineqartunut ilaapput.

Nammineq soraarnerussutisiaqalernissannut akiliisassaatit:

  • Kalaallit Nunaannut tamakkiisumik akileraartussaaguit
  • 18-it ukiullu utoqqalinersiuteqalerfissat akornannik ukioqaruit

Suliffeqartut kikkut pineqartunut ilaanerat aamma aningaasarsiat suut, innuttaasut ataasiakkaat qanoq amerlatigisunik ileqqaagaqarnissaannik naatsorsuinermi ilanngunneqarnissaat paaserusukkukku Akileraartarnermut Aqutsisoqarfiup paasisitsiniaalluni takutitassiaa takusinnaavat:

TAKUUK: 2019-imut tunngatillugu akiliinissamut piffissaliussaq sivitsorneqarpoq 9. oktober 2020-mut. Piffissaliussaq taanna atuutissaaq, naak piffissaliussaq alla takutitassiami oqaatigineqaraluartoq.

 

 

Ukiumoortumik naatsorsuut

Akileraartarnermut Aqutsisoqarfiup ukiumoortumik naatsorsuummik 20. august 2020 nassissavaatit:

  • Soraarnerussutisiaqalernissamut ileqqaakkannut 2019-imut tunngatillugu akileeqqullutit allaffigineqaruit, akiliinerit Akileraartarnermut Aqutsisoqarfimmut uppernarsassavat

  • Ileqqaarnerunissat ukiumoortumik naatsorsuummi allaqqanngippat arlaannik iliuuseqartariaqanngilatit, tassami soraarnerussutisiaqalernissamut ileqqaakkannut 2019-imi naammattunik akileereersimagavit

Soraarnerussutisiaqalernissamut ileqqaakkannut akiliinerunissat ukiumoortumik naatsorsuutip takutippagu, tamanna sumik pissuteqarnersoq paasiumallugu Akileraartarnermut Aqutsisoqarfiup paasisitsiniaalluni takutitassiaa takusinnaavat:

TAKUUK: 2019-imut tunngatillugu akiliinissamut piffissaliussaq sivitsorneqarpoq 9. oktober 2020-mut. Piffissaliussaq taanna atuutissaaq, naak piffissaliussaq alla takutitassiami oqaatigineqaraluartoq.

 

Ileqqaarnissamut tunngavissat

Aningaasarsiavit amerlassusii soraarnerussutisiaqalernissannut qanoq amerlatigisunik ileqqaagaqarnissannut aalajangiisuupput. Taakku tassaapput ileqqaarnissamut tunngavissatit.

  • Ileqqaarnissamut tunngavissatit 100.000 kr.-init amerlaneruppata soraarnerussutisiaqalernissannut ileqqaartussaavutit
  • Ileqqaarnissamut tunngavissatit 100.000 kr.-init ikinneruppata ukiumi tassani ileqqaartussaanngilatit

Akissarsiortunut tunngatillugu:

  • Akissarsiortut ileqqaarnissamut tunngavissaraat aningaasarsiat A-t aamma aningaasarsiat B-t katinnerat
  • Akissarsiortuuguit ukiumi aningaasarsiorfiusumi 2019-imi ileqqaarnissamut tunngavissavit 5%-ii ileqqaagassaraatit

Namminersorluni inuussutissarsiummik ingerlataqartunut tunngatillugu:

  • Namminersorluni inuussutissarsiummik ingerlataqartut ileqqaarnissamut tunngavissaraat sinneqartoorutit akileraaruteqaataasussat
  • Namminersorluni inuussutissarsiummik ingerlataqartuuguit 2019-imi ileqqaarnissamut tunngavissavit 3%-ii ileqqaagassaraatit

Akissarsiortuullutillu namminersorlutit inuussutissarsiummik ingerlataqaruit, taava ileqqaarnissamut tunngavissatit tamaasa immikkut naatsorsussavatit. Tassa imaappoq, akissarsiortutut aningaasarsiannit ileqqaarnissamut tunngavissatit naatsorsussavatit aammalu namminersorlutit inuussutissarsiummik ingerlataqartutut sinneqartoorutinnit ileqqaarnissamut tunngavissatit immikkut naatsorsussallugit.

Malugiuk:
Ileqqaarnissamut tunngavissatit 100.000 kr.-it 150.000 kr.-illu akornannik amerlassuseqarpata, taava procentinit matumani allanneqartunit ikinnerulaartunik ileqqaassaatit. Taakku aningaasarsiatit tunngavigalugit naatsorsorneqassapput. Aningaasat ileqqaarsimasassatit ukiumoortumik naatsorsuummi tamatigut allassimasarput.

Ileqqaarnissamut tunngavissatut makku ilanngullugit naatsorsorneqassapput:

  • Aningaasarsiat A-t aamma aningaasarsiat B-t.
    Soorlu:
    • Akissarsiat
    • Ajunngitsorsiat (assersuutigalugu akeqanngitsumik biileqartitaaneq, akeqanngitsumik najugaqartitaaneq, akeqanngitsumik mobileqartitaaneq il.il.)
    • Erninermi ullormusiat
    • Ilinniarnermut atatillugu sulinermi (praktik) akissarsiat
  • Inuussutissarsiummik ingerlataqartutut sinneqartoorutit

Aningaasarsiat ilaat ileqqaarnissamut tunngavissat naatsorsorneqarneranni ilanngunneqartussaanngillat.
Tassaapput:

  • Isumaginninnermi ikiorsiissutit tapiissutillu ilaat (siusinaartumik pensionisiat, ineqarnermut tapiissutit, meeqqanut tapiissutit, ilinniagaqarnersiutit, utoqqalinersiat soraarnerussutisiatullu tunniunneqartartut allat, meeqqanut akilersuutit, pisortanit ikiorsiissutit)
  • Tjenestemanditut aningaasarsiat ilaat (Kalaallit Nunaanni Namminersornerullutik Oqartussani kommuninilu tjenestemandit, Tjenestemandit inatsisartut suliffeqarfiini atorfillit aamma Naalagaaffimmi tjenestemanditut atorfillit Kalaallit Nunaanniittut).

Procentit ileqqaagassavit angissusiisa ukiumiit ukiumut allanngortarnissaat malugiuk. Procentit angissusii uani eqqartorneqartut 2019-imi aningaasarsianut tunngasuupput. Angissutsip minnerpaaffissaa ukiumoortumik naatsorsuummi tamatigut allaqqasarpoq.

Soraarnerussutisiaqalernissannut qanoq ileqqaarsinnaanerlutit takujumagukku Akileraartarnermut Aqutsisoqarfiup paasisitsiniaalluni takutitassiaa takusinnaavat:

TAKUUK: 2019-imut tunngatillugu akiliinissamut piffissaliussaq sivitsorneqarpoq 9. oktober 2020-mut. Piffissaliussaq taanna atuutissaaq, naak piffissaliussaq alla takutitassiami oqaatigineqaraluartoq.

 

Soraarnerussutisiassannut akiliutivit uppernarsaataat

Soraarnerussutisiassannut akileeqquneqarlutit allaffigineqarsimaguit akiliinerit Akileraartarnermut Aqutsisoqarfimmut uppernarsassavat.
Nassiussassatit uppernarsagassatillu:

  1. Soraarnerussutisiaqalernissamut aaqqissuussinermut akiliisimaneq, illit nammineq akilersimanerlugu allalluunniit, soorlu sulisitsisuit illit atit atorlugu akilersimaneraa uppernarsassavat.
  2. Akiliineq soraarnerussutisiaqalernissamut aaqqissuussinermut inatsimmi pineqartumut akiliinerussaaq:
    1. Kalaallit Nunaanni; SISA, Grønlandsbanken aamma Bank Nordik Nuuk
    2. Danmarkimi; soraarnerussutisiaqalernissamut sillimmasiisarfiit soraarnerussutisiaqalernissamullu aningaasaateqarfiit (kisianni soraarnerussutisiaqalernissamut aaqqissuussinerit aningaaserivinni pilersinneqartut pinnagit)
  3. Ulloq soraarnerussutisiaqalernissamut aaqqissuussinermut akiliiffik
  4. Ukioq ileqqaarfigisat, aamma soraarnerussutisiassannut akilikkavit aningaasartai eqqortut

Uppernarsaatitut piumasarineqartut 4-t tamaasa eqquutsinngikkukkit, akiliineq 2019-imut akiliutitut isigineqarani ukiumut 2020-mut akiliutitut isigineqassaaq.

Uppernarsaatip nassiunnera:

Uppernarsaat pappialanngorlugu Akileraartarnermut Aqutsisoqarfiup allaffiinut tunniussinnaavat, allakkatigulluunniit Akileraartarnermut Aqutsisoqarfimmut nassiullugu. Uppernarsaat aamma e-mailikkut nassiussinnaavat.

Bankimi (soorlu Netbankimi) kontonnit uppernarsaat imaluunniit soraarnerussutisiaqalernissamut akiliutit Akileraartarnermut Aqutsisoqarfiup uppernarsaatitut akuerissavai, uku allaqqappata:

  • akiliineq
  • aningaasat amerlassusiat
  • nassiussisoq
  • tigusisoq
  • aamma ulloq

Inussiarnersumik qinnuigaatsigit, uppernarsaat nassiukkukku qulequtsiiffissami una allaqqullugu ’soraarnerussutisiaqalernissamut aaqqissuussinermut peqataasussaatitaaneq’.

 

Suliamik ingerlatseriaaseq
Soraarnerussutisiaqalernissamut aaqqissuussinermut akiliisimaninnut uppernarsaat nassiukkukku, tamanna Akileraartarnermut Aqutsisoqarfimmi nalunaarsorneqassaaq.

Uppernarsaat nassiussat Akileraartarnermut Aqutsisoqarfimmi misissorneqassaaq.

Siusinnerpaamik sapaatip akunnerisa 4-t qaangiunneranni akissutisinissat naatsorsuutigissavat.

Aappaagu skattekortissat akileraarusiissummik eqqortumik procentitalik december 2020-mi ilinnut nassiunneqassaaq.
Piffissaliussaq

Piffissaq soraarnerussutisiaqalernissamut aaqqissuussinermut 2019-imut tunngatillugu akiliiffissat tassaavoq 2020-mi augustip 20-anniit oktoberip 9-annut.

Soraarnerussutisiassannut akiliutivit uppernarsaataa tax@nanoq.gl –ikkut Akileraartarnermut Aqutsisoqarfimmut nassiutissavat.

Piffissaliussamik malinninnginnerup kingunissai

2019-imut tunngatillugu akilerneqanngitsut 2021-mi skattekortissanni akileraarusiissutip procentiata qaffanneratigut akilersinneqassapput:

  • 2020-mi piffissami augustip 20-anniit oktoberip 9-annut akiliisimanngikkuit
  • akiliisimanerit Akileraartarnermut Aqutsisoqarfimmut uppernarsarsimanngikkukku

Soraarnerussutisiaqalernissamut siorna akilersimasassatit sapaatip akunnerinik 4-nik piffissalerneqarnerpit ingerlanerani matussuserniarukkit Akileraartarnermut Aqutsisoqarfiup paasisitsiniaalluni takutitassiaa takusinnaavat:

TAKUUK: 2019-imut tunngatillugu akiliinissamut piffissaliussaq sivitsorneqarpoq 9. oktober 2020-mut. Piffissaliussaq taanna atuutissaaq, naak piffissaliussaq alla takutitassiami oqaatigineqaraluartoq.

 

Naammagittaalliorneq

Soraarnerussutisiaqalernissamut aaqqissuussinermut peqataasussaatitaaneq pillugu ukiumoortumik naatsorsuut naammagittaalliuutiginiarukku, taanna allakkatigut uunga nassiutissavat:

Aningaasaqarnermut Naalakkersuisoqarfik
Imaneq 4
Postboks 1037
3900 Nuuk