airplanebooksbriefcase business cogs cross election entertainment fish house law lockmedicalpeopleselfservices socialtax

Nunani allani pensionisiassanut tapiissutinik qinnuteqarit

Ulloq 1. juuli 2018-imiit - 30. septembar 2018 tungaanut soraarnerussutisiaqarnissamut aaqqissuussinernut aalajangersimasunut, Kalaallit Nunaata avataani angerlarsimaffeqartunut, akiliuteqarnermi tapiissutinik qinnuteqartoqarsinnaavoq. Qinnuteqarfissap killiunneqartup qaangiunnerani qinnuteqartoqarsinnaanngilaq.

'Akileraarutikka' uani iserfigiuk

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq
Pensionisiaqartitsivinnut nunani allaniittunut akiliutit akileraaruserneqartarnissaat Inatsisartut akuersissutigaat. Tamatumunnga peqatigitillugu ikaarsaarnermi aaqqissuussisoqarnissaa Inatsisartunit akuersissutigineqarpoq.
Aaqqissuussap kingunerissavaa, piumasaqaatit aalajangersimasut naammassineqarsimappata ukiorpaalunni tapiissutisiaqarsinnaassasutit.
Piumasaqaatit
Tapiissutit ilinnut tunniunneqarsinnaapput, makku naammassisimagukkit:

• ulloq 31. december 2016 Kalaallit Nunaannut tamakkiisumik akileraartussaatitaaguit,
• qinnuteqarnerup nalaani aamma/imaluunniit tunniussinerup nalaani kipiffeqanngitsumik suli tamakkiisumik Kalaallit Nunaannut akileraartussaatitaaguit,
• soraarnerussutisiaqarnissamut inuunermullu sillimmatinut soraarnerussutisiaqalernissamut aningaasaateqarfimmi imaluunniit inuunermut soraarnerussutisiaqalernissamullu sillimmasiisarfimmi Kalaallit Nunaata avataani pilersinneqarsimasunut 2016-imi akiliuteqarsimaguit
• 2016-imi akiliutigisimasanut tunngatillugit ilanngaateqarsinnaatitaasimaguit imaluunniit akileraaruteqaatasussanik nalunaarsuinermi ilannguneqartussaanngitsunut ilaatinneqartunut

Tapiissutisiaqalertoqassappat piumasaqaatit siuliani allassimasut tamarmik naammassisimasariaqarpatit.

Namminersorlutik Oqartussani suliffeqarfiutaannilu (taakkunani suliffeqarfiit nammineq ingerlasut Nukissiorfiit, Mittarfeqarfiit aamma Asiaq ilaallutik) kiisalu kommunini sulisuuguit tapiissutit aningaasarsiannut ilaallutik tunniunneqassapput. Taamaammat Akileraartarnermut Aqutsisoqarfimmut tapiissutisiaqalernissamut qinnuteqassanngilatit, kisianni tapiissutisiaqalernissaq pillugit sulititsisut saaffigissavat.

Namminersorlutik Oqartussani suliffeqarfiutaannilu (taakkunani suliffeqarfiit nammineq ingerlasut Nukissiorfiit, Mittarfeqarfiit aamma Asiaq ilaallutik) kiisalu kommunini sulisuunngitsut Akileraartarnermut Aqutsisoqarfimmut tapiissutisiaqalernissamut qinnuteqarsinnaapput.

Malugiuk
Tapiissutit isertitatut A-tut akileraaruserneqartussatut isigineqarput.
Annertussusaat
Tapiissutit tapiissutisiaqarsinnaatitaasup soraarnerussutisiaqarnissamut akiliutaanit procentinngorlugit naatsorsorneqartarput. Tapiissutit annertussusaat:

Ukioq:  2017   2018   2019   2020   2021 
Tapiissutigineqartut:    5 %   5 %   5 %   3 %   3 %

Piffissami 2017-2019-imi tapiissutit qaammammut annerpaamik 420 kr.-usinnaapput piffissamilu 2020-2021-mi qaammammut 250 kr.-usinnaallutik.
Qinnuteqarneq
Qinnuteqaat taamaallaat qarasaasiatigut tunniunneqarsinnaavoq. Allakkatigut qinnuteqartoqarsinnaanngilaq.

Qarasaasiatigut periarfissat makku toqqarsinnaavatit.

NemID-qaruit
NemID-qaruit sukkasuumik ajornanngitsumillu qarasaasiakkut qinnuteqarsinnaavutit, imminut sullinnissamut tuugassaq tooruk NemID-lu atorlugu iserlutit, taava aallartissaatit.

Iseruit talerpimmi periarfissani ”Nunani allani pensionisiaqartitsivinnut tapiissutit” qinissavat. Paasissutissat sulititsisuit nalunaarutigisimasai immersugassani immersoreersimassapput. Nammineq akiliutigisimasatit pillugit immersugassani paasissutissat kisiisa immersorsinnaavatit.

Uppernarsaammik ilanngussissaatit. Uppernarsaatit pillugit paasissutissat ataani atuakkit.

Malugiuk
Ulloq 31/12-2016-imi soraarnerussutisiaqarnissamut ileqqaagaqarnermut uppernarsaat ilanngutissavat.

Taassuma saniatigut nammineq soraarnerussutisiaqarnissamut akiliutigisimasavit uppernarsaataat ilanngutissavatit. Uppernarsaatigisinnaavatit soraarnerussutisiaqarnissamut akiliuteqartarsimanernut takussutissiaq kiisalu bankimit kontomut akiliuteqartarsimanermut takussutissiaq.

NemID-qanngikkuit
Qinnuteqarnissamut immersugassaq atorlugu tapisiaqarnissamik aamma qinnuteqarsinnaavutit.

Nunani allani pensionisiassanut tapiissutinik qinnuteqarneq

Qinnuteqaat uppernarsaatillu e-mail-ikkut kakkiunneqassapput pension@nanoq.gl-imullu nassiunneqarlutik.

Ulloq 31/12-2016-imi soraarnerussutisiaqarnissamut ileqqaagaqarnermut uppernarsaat ilanngutissavat.

Taassuma saniatigut nammineq soraarnerussutisiaqarnissamut akiliutigisimasavit uppernarsaataat ilanngutissavatit. Uppernarsaatigisinnaavatit soraarnerussutisiaqarnissamut akiliuteqartarsimanernut takussutissiaq kiisalu bankimit kontomut akiliuteqartarsimanermut takussutissiaq.

Sulititsisunnit nalunaarutigineqarsinnaasut allat Akileraartarnermut Aqutsisoqarfiup sulititsisunnit pissarsiarereerpai. Taamaammat soraarnerussutisiaqarnissamut akiliutit sulititsisuit akiligai uppernarsarneqartariaqanngillat. Sulititsisuit nalunaarutai pissusissamisoorsorinngikkukkit qinnuigaatsigit sulititsisut attavigeqqullugu.
Ingerlatseriaaseq
Qinnuteqaatit Akileraartarnermut Aqutsisoqarfimmi tiguneqarpat, qinnuteqaatit tiguneqarsimasut tulleriiaarnerat naapertorlugu suliarineqassaaq.

Qinnuteqaativit suliarineqarnera naammassippat allakkamik neriorsuummik imalimmik imaluunniit itigartitsinermik nassiussiffigineqassaatit.

Itigartitsisoqassappat itigartitsinermut tunngavilersuisoqassaaq naammagittaalliorsinnaanermillu ilitsersuutitaqassalluni.

Allakkamik neriorsuummik tigusaqaruit, tapiissutip kontomut nalunaarutigineqarsimasumut allakkap tiguneraniit qaammatip ataatsip ingerlanerani ikineqarnissaa naatsorsuutigisinnaavat.
Allannguineq
Qinnuteqaatip nassiunneraniit allanngortitsissaguit:
• najukkannik
• aningaaserivimmik aamma/imaluunniit kontonormumik
• e-mail-imik

Akileraartarnermut Aqutsisoqarfimmut nalunaarutigisariaqassavatit.
Piffissaliussaq
Ukiumut qaangiuttumut tapiiffigineqarnissamik kisimi qinnuteqarsinnaavutit.

Tapiissutit pillugit aaqqissuussap ingerlanerani piffissaq qinnuteqarfiusinnaasoq tassaavoq 1. juli - 30. september.

Assersuut:
2017-imut tapiissutit piffissami 1. juli - 30. september 2018-imi qinnutigineqassapput.
Maalaaruteqarneq
Akileraartarnermut Aqutsisoqarfiup qinnuteqaatinnut aalajangiinera pillugu maalaaruteqassaguit, aalajangiinerup tiguneraniit qaammatit pingasut qaangiutsinnagit uunga nassiunneqassaaq:

Akileraarusiinernik aalajangiisartut
Postboks 1605
3900 Nuuk
oed@nanoq.gl

Maalaaruteqarneq allakkatiguussaaq tunngavilersuutitaqassallunilu.
Allaaserisat attuumassutillit