airplanebooksbriefcase business cogs cross election entertainment fish house law lockmedicalpeopleselfservices socialtax

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq
Ilinniagaqarnermi taarsigassarsiat aningaasaapput ilinniarnivit nalaani qinnuteqaatigisinnaasatit. Ilinniagaqarnermi taarsigassarsiat utertinneqartussaapput. Ilinniagaqarnermi taarsigassarsiat ilinniarnerup naammassineranit kingusinnerpaamik ukioq ataaseq qaangiuppat utertinniarneri akilersorlugit aallartinneqassapput. Ilinniarnermut atasumik taarsigassarsiat tunniunneqarpata ingerlaannaq ernialersorneqarlutik aallartinneqassapput.

Ilinniagaqarnermi taarsigassarsiat assigiinngitsut marluupput: Semesterimut taarsigassarsiat taavalu ataasiaannartumik taarsigassarsiat.

Semesterimut taarsigassarsiat
Semesterimut taarsigassarsiat ukiup affakkaartumik taarsigassarsiarisinnaavatit ukununnga atatillugu:
  • Upernaakkut semesterimi 1. januar aallarnerfigalugu 31. juli tikillugu
  • Ukiakkut semesterimi 1. august aallarnerfigalugu 31. december tikillugu


Semesterimut taarsigassarsiat semesterip pineqartup naanerani tamakkiisumik atorneqarsimanngitsut semesterip tullianut nuunneqarsinnaapput.

Ilinniarnerit 1. marts imaluunniit 1. oktober sioqqullugu naammassissagukku semesterimi tassani taarsigassarsiaqarsinnaanngilatit.

SU-mik pisaruit semesterimut taarsigassarsisinnaanngilatit taamaallaat ataasiaannartumik taarsigassarsisinnaavutit.

Maluginiassavat taarsigassarsiat erniaqartussaammata.

Ataasiaannartumik taarsigassarsiat
Ataasiaannartumik taarsigassarsiat ilinniarnivit nalaani ataasiaannarlutit taarsigassarsiarisinnaasaraatit.

Ilinniakkap tungaatigut allannguinermi imaluunniit ilinniakkamik nutaamik aallartitsinermi immikkut pisariaqartumik pisoqarsimatillugu, soorlu nuunnermi aningaasartuuteqarsimagaanni aamma inigisamut nutaamut aallaqqaatissatut akiliuteqarsimagaanni uppernarsaatitalinnik, taava ataasiaannarluni taarsigassarsianik taarsigassarsisoqaqqissinnaavoq.

Maluginiassavat taarsigassarsiat erniaqartussaammata.

Piumasaqaatit

Semesterimut taarsigassarsianut 6.000 kr.-ninut taarsigassarsiniaruit:

  • 18-nik ukioqarsimasariaqarputit
  • Kalaallit Nunaani Namminersorlutit Oqartussanit ilinniagaqarnersiutinik pisarnissamut akuerisaasimassaatit
  • Kalaallit Nunaani Danmarkimiluunniit ingerlaqqiffiusumik ilinniakkamik ingerlatsissaatit

Ataasiaannartumik taasigassarsianut 10.000 kr.-nut taarsigassarsiniaruit:

  • 18-nik ukioqarsimasariaqarputit
  • Namminersorlutik Oqartussanit ilinniagaqarnersiuteqassaatit imaluunniit Danmarkimit SU-mik pisartagaqassaatit

Malugiuk, Ilinniarnerpit iluani ataasiaannaq taarsigassarsisinnaanerit. Ataasiartumik taarsigassarsianut qinnuteqarsinnaavutit ilinniarnerit allanngorpat imaluunniit nutaamik ilinniagaqaleruit, immikkut ittumik pisoqarsimappat, assersuutigalu nutsernermut aningaasartuutinut aamma inimut aningaasaliissutinut.


Akigititat
Semesterimut taarsigassarsiat 6.000 koruuniupput.

Ataasiaannartumik taarsigassarsiat 10.000 koruuniupput.
Qinnuteqarneq
Ilinniagaqarnermi taarsigassarsiassanik qinnuteqarniaruit, periutsit marluk atorlugit qinnuteqarsinnaavutit:

NemID’qaruit
NemID-mik peqaruit immersuiffissaq Ilinniagaqarnersiuteqartitsivimmut toqqaannartumik attaveqaatitigut immersorsinnaavat nassiullugulu.

NemID’qanngikkuit
NemID-mik peqanngikkuit immersuiffissaq naqitissavat atsiorlugulu kingornagullu Ilinniagaqarnersiuteqartitsivimmut nassiullugu. Taamatut iliorsinnaavutit imminut sullinnissamut aaqqiissut ’Ilinniagaqarnermi taarsigassarsiat maana qinnuteqaatigikkit’ iserfigineratigut.

Ilinniagaqarnermi taarsigassarsiniarnerup suliarineqarnera qaammammik ataatsimik sivisussuseqarsinnaavoq. Taanna suliarineqareerpat itigartitsissummik imaluunniit akiitsut allagartaannik nassinneqassaatit. Akiitsut allagartaappat taanna atsiorlugu Ilinniagaqarnersiuteqartitsivimmut nassiutissavat.
Ilinniagaqarnermi taarsigassarsianik tunniussineq
Akiitsut allagartaat atsioriigaq tiguneqariarpat Ilinniagaqarnersiuteqartitsiviup Grønlandsbankenimut nassiutissavaa, aningaaserivillu sapaatip-akunneranik ataatsimik piffissaqarpoq aningaasat kontonnut nakkartinnissaanut.

Malugiuk Ilinniagaqarnersiuteqartitsiviup akiitsup allagartai tallimanngornikkut Grønlandsbankenimut ingerlateqqittarmagit.
Qinnuteqarnermi itigartitsineq
Ilinniagaqarnersiutinik akiitsoqarpallaaruit Ilinniagaqarnersiuteqartitsiviullu nalilersimappagu ilinniarnivit kingorna akiitsutit akilersorsinnaanngikkitit, taava ilinniagaqarnermi taarsigassarsiniarnerit itigartinneqassaaq. Ilinniagaqarnersiuteqartitsiviup misissortarpai:
  • Ilinniarnerup kingorna isertitat qaffasissusaat akiitsut amerlassusaannut naleqqiullugit. Taamaattorli Ilinniagaqarnersiuteqartitsivik immikkut akuersissuteqarsinnaavoq
  • Ilinniagaqarnermi taarsigassarsiat piffissaq qanoq sivisutigisoq atorlugu taarsersorsinnaaneritit
  • Ilinniagaqarnermi taarsigassarsiat naafferartumik taarsersuinermik aaqqiiffigineqarnerat siornatigut ingasattumik sumiginnarsimanerit
Ilinniagaqarnermi taarsigassarsianik akilersuineq
Ilinniarnermut atasumik taarsigassarsiat tunniunneqarpata ingerlaannaq ernialersorneqalissapput.

Akilersuutit
Ilinniarnerit taamaatiinnarukku kingusinnerpaamik qaammatit pingasut qaangiunnerini akiitsut akilersorlugit aallartissavatit.

Ilinniarnerit naammassigukku ukiup ataatsip qaangiunnerani akiitsutit akilersorlugit aallartissavatit.

Ikinnerpaamik qaammammut 500 koruuninik akilersuissaatit.

Ilinniagaqarnermi taarsigassarsianik akilersuinermik unitsitsigallarneq
Suliffissaarussimaguit imaluunniit sivisuumik napparsimaguit akiitsut akilersornerisa unitsikkallarnissaat qinnutigisinnaavat. Unitsitsigallarneq qaammatini pingasuni atuutissaaq tamatuma kingorna qinnuteqaqqissinnaavutit.

Taarsigassarsianik akilersuinermik unitsitsigallarnissamik qinnuteqarniaruit allakkatigut Ilinniagaqarnersiuteqartitsivimmut qinnuteqassaatit, qinnuteqaammut ilanngutissavat assersuutigalugu suliffissaaleqinermut imaluunniit napparsimanermut uppernarsaat.
Allaaserisat attuumassutillit