Angajoqqaat aamma angajoqqaarsiat angajoqqaatut suliatik pillugit oqilisaanneqarnissamik pisariaqartitsisut, meeqqatik imaluunniit inuusuttuarartatik oqilisaanneqarniarlutik najugaqartinnissaannut qinnuteqarsinnaapput. Oqilisaanneqarluni meeqqamik najugaqartitsineq akeqanngilaq.
Oqilisaanneqarluni najugaqarnerit sivisussusaat assigiinngitsorujussuusarput. Ullut marlussunniit sapaatit akunneri marlunniit pingasunut sivisussuseqarsinnaasarput. Oqilisaanneqarnermut aaqqiissut ukiuni arlalinni atuuttussanngorlugu neqeroorutigineqarsinnaavortaaq.
Ilaqutariit oqilisaassillutik najugaqartitsisut isumaginninnermut ingerlatsivimmiit nakkutigineqarnissaannut pisussaaffeqarput. Tassa imaappoq, ilaqutariit oqilisaassillutik najugaqartitsisut sulinertik ajunngitsumik ingerlanneraat nakkutigineqassapput.