Meeqqat imaluunniit inuusuttut atugaqartitaanerat ineriartornerallu navianartorsiortut kommunimut nalunaarutigineqarsimappat, imaluunniit kommunimit nammineq paasineqarsimappat, meeqqap, inuusuttup imaluunniit ilaqutariit misissuiffiginissaannut kommuni pisussaaffeqarpoq. Misissuineq malillugu sullissisoq iliuusissatut pilersaarummik suliaqassaaq, sapinngisamillu angajoqqaat inuusuttorlu peqatigalugit.
Iliuusissatut pilersaarummi pissutsit assigiinngitsut allaaserineqartarput, assersuutigalugu:
• Ilaqutariit kikkuuppat?
• Ilaqutariit sumi qanorlu najugaqarpat?
• Ilaqutariit ataasiakkaat sulerisuuppat? – suliffeqarpat, suliffissaaleqisuuppat, atuarfik, sunngiffik?
• Ilaqutariit sunik nukittuffeqarpat aamma sanngiiffeqarpat?
• Ilaqutariit ikiorneqarnissamut pisariaqartitsippat – ikiorneqarnissaq qanoq ittoq pisariaqartippaat?
• Ikiorsiinissaq qaqugu qanorlu aallartisarneqassaava?
Iliuusissatut pilersaarut atorlugu meeraq imaluunniit inuusuttoq ukiuminut naleqqiullugu ineriartornissaanut pisariaqartitani najoqqutaralugit ikiorserneqarnissaa qulakkeerneqassaaq. Iliuusissatut pilersaarut taamaalilluni assersuutigalugu ulloq unnuarlu angerlarsimaffimmut imaluunniit angajoqqaarsianut iluaqutaassaaq, taakkumi meeraq eqqarsaatigalugu perorsaanikkut suliassatik qanoq ittuussasut takusinnaassagamikkit.
Iliuusissatut pilersaarut tamatuma saniatigut sullissisup ilaqutariillu akornanni isumaqatigiissutitut atorneqassaaq, ukiullu tamaasa imaluunniit pisariaqartitsinikkut kommunalbestyrelsimit nalilersorneqartassalluni. Meeraq iliuusissatut pilersaarummit malinneqassaaq.
Iliuusissatut pilersaarut sullissisumit Suliassaqarfiit akimorlugit suleqatigiinnermut ataatsimiititaliamut nassiunneqassaaq, tassanilu nalilerneqassaaq meeqqap, inuusuttup imaluunniit ilaqutariit iluanni ikiorsiineq qanoq ittoq pisariaqartinneqarnersoq. Suliassaqarfiit akimorlugit suleqatigiinnermut ataatsimiititaliap naliliineq Isumaginninnermut Ataatsimiititaliamut ingerlateqqissavaa, tassanilu ajornanngippat meeraq imaluunniit inuusuttoq ilaqutaalu peqatigalugit qanoq ikiuisoqassanersoq aalajangiunneqassalluni.
Ikiorsiissuteqarneq assersuutigalugu tassaasinnaavoq:
• Ulluunerani neqerooruteqarneq: Meeqqerivimmi perorsarneqarnissamut akeqanngitsumik inissaq, atuarfimmi immikkut ittumi imaluunniit ilinniarfimmi
• Angerlarsimaffimmi tapersersorneqarneq. Assersuutigalugu ilaqutariinnik siunnersuisartoq, ornigulluni ikiuuttartoq imaluunniit perorsaasutut tapertaasartoq
• Oqilisaassineq: Angajoqqaarsiani piffissami sivikinnerusumi sivisunerusumiluunniit najugaqarneq
• Aningaasatigut ikiorserneqarneq: Assersuutigalugu efterskolernissamut, atisanut, kaasarfimmiussanut imaluunniit sammisassanut
• Angerlarsimaffiup avataanut inissiineq: Illit aamma meeraq akuersiteqqaarnasi Isumaginninnermut Ataatsimiititaliaq meeqqamik angerlarsimaffiup avataanut inissiinissamut aalajangersinnaavoq
Malugiuk
Illit angajoqqaatut meeqqat pillugu iliuusissatut pilersaarutaasut aalajangernerillu assilinerisa allaganngorlugit pissarsiarinissaannut pisinnaatitaajuaannarputit.
