Ulloq unnuarlu paaqqinnittarfiit

Nalinginnaasumik paasissutissiineq

Inunnut annertuumik innarluutilinnut ulluinnarni suliassat mikisualuit suliarissallugit ajornarluinnangajassinnaavoq. Assersuutigalugu perusuersartarfiliarneq aamma angerlarsimaffimmi angalasinnaaneq unammilligassaasinnaapput piuminaalluinnartut. Taamaattumik inuit annertuumik innarluutillit ulloq unnuarlu paaqqinnittarfimmiilernissamik qinnuteqarsinnaapput, tassani sulisunit tapersersorneqarlutillu ikiorneqarsinnaagamik.

Ulloq unnuarlu paaqqinnittarfik tassaavoq sumiiffik immikkut ittumik paaqqutarineqarnissamik pisariaqartitsiguit najugaqarfigisinnaasat. Assersuutigalugu imaassinnaavoq autisme-qartutit aammalu angerlarsimaffimmi imaluunniit najugaqarfimmi illersukkami naammaginartumik paaqqutarineqarsinnaanak. Ulloq unnuarlu paaqqinnittarfimmi sulisut pikkorissut ulloq unnuarlu sulisarput. Tamatuma kingunerisaanik ulloq unnuarlu paaqqinnittarfimmi najugaqaruit ulloq unnuarlu kaajallallugu ikiorneqarsinnaavutit.

Ulloq unnuarlu paaqqinnittarfimmiinnerup sivisussusaa assut allanngorarsinnaavoq. Ilaatigut tassaasinnaavoq:
• piffissami sivikinnerusumi oqilisaanneqarluni najugaqarneq
• piffissami killilikkami sungiusarniarluni najugaqarneq
• piffissami sivisunerusumi - immaqalumi inuuneq naallugu najugaqarneq.

Tamanna pisinnaalluarpoq, nammineq inigisanni imaluunniit ataatsimoortumik najugaqarfinni pisinnaasanniit pitsaanerusumik ikiorneqarnissamik pisariaqartitsiguit.

Ulloq unnuarlu paaqqinnittarfiit tulliuttut nunatsinni inissisimapput:
• Sungiusarfik Aaqa
• Ivaaraq
• Angerlarsimaffik Uulineq
• Najugaqarfik Elisibannguaq
• Gertrud Rask Minde
• Sungiusarfik Ikinngut

Ulloq unnuarlu paaqqinnittarfiit innarluutilinnut immikkut tulluarsagaasunik tamarmik immikkut suliaqartuupput.

Ulloq unnuarlu paaqqinnittarfiit Naalakkersuisunit ingerlanneqarput.

Piumasaqaatit

Ulloq unnuarlu paaqqinnittarfimmi inissamik qinnuteqarniaruit, illit
• innarluutillit pillugit peqqussummut ilaassaatit
• illersukkamik najugaqarfimmi immaqaluunniit angerlarsimafferni pisinnaasavit saniatigut paaqqutarineqarnissamik tapersersorneqarnissamillu pisariaqartitsissaatit

Qinnuteqarneq

Ulloq unnuarlu paaqqinnittarfimmi inissamik qinnuteqarniaruit, sulianik suliarinnittartunnut saaffiginnissaatit kommunerni. Sulianik suliarinnittartoq, ikiuussinnaavoq ulloq unnuarlu paaqqinnittarfiit suut periarfissaanersut misissorneranni, aamma qinnuteqaatip immersornerani ikiuussinnaalluni

Paasissutissat taakku tunngavigalugit ulloq unnuarlu paaqqinnittarfimmi nalilersuinermik ataatsimiititaliap inissamik tunineqassanersutit nalilersorlugulu aalajangigassaraa.

Iliuusissatut pilersaarut

Ulloq unnuarlu paaqqinnittarfimmi inissamik tunineqaruit, ulloq unnuarlu paaqqinnittarfiup illit kommunerisat suleqatigalugu iliuusissatut pilersaarut suliarissavaa.

Iliuusissatut pilersaarummi assersuutigalugu nassuiarneqarsimassaaq:
• Qanoq sivisutigisumik ulloq unnuarlu paaqqinnittarfimmiissanersutit
• Suna siunertaanersoq
• Siunertaq qanoq anguniarneqassanersoq

Sapinngisamik annertunerpaamik akuutinneqarlutillu pilersaarut akuerisussaavat.

Isumaginninnermut, Inatsisinillu Atuutsitsinermut Naalakkersuisoqarfik
Imaneq 4
Postboks 260
3900 Nuuk

Oqarasuaat: (+299) 34 50 00
E-mail: iian@nanoq.gl
Nittartagaq: www.naalakkersuisut.gl

Ulloq unnuarlu paaqqinnittarfiit

Inatsisit