Nakorsartissimaninnut naammagittaalliuutivit nassiunneranut atatillugu taarsiiffigitinnissamut noqqaaneq

Naammagittaalliutit inerniliisumik aalajangiivigineqareerpat aatsaat taarsiiffigitinnissamut noqqaassutit suliarineqassaaq.

Peqqinnissaqarfimmi pisortat ingerlataanni peqqinnissakkut sullissisumit nakorsartinneq pillugu naammagittaalliuutinnut atatillugu taarsiiffigitinnissaq qinnutigisinnaavat.

Ajoquserneqarnikkut anniaatinut aningaasatigulluunniit annaasanut taarsiiffigitissinnaavutit.

Makku arlaannut taarsiiffigitinnissaq qinnutigisinnaavat:

  • Sulisinnaannginnermi annaasaqaatit
  • Ajoquserneqarnikkut anniaatit
  • Ataavartumik ajoqutigilikkat
  • Inuussutissarsiorsinnaanermik annaasaqarneq
  • Pilersuisugisamik annaasaqarneq
  • Kukkusumik nakorsarneqarnerup kingunerisaanik peqqissutsimut tunngatillugu aningaasartuutit allatigullu aningaasanik annaasaqarneq.

Peqqinnissaqarfimmi sullinneqarneq pillugu naammagittaalliuutit nassiukkakku taarsiiffigitinnissamik kissaateqarnerit nalunaarutigisimagukku, taanna Nunatsinni Nakorsaaneqarfiup Peqqissutsimut Naalakkersuisoqarfimmut ingerlateqqissavaa.

Malugiuk:
Peqqinnissaqarfimmi nakorsartinneq pillugu naammagittaalliuummik nassitsininnut ilanngullugu taarsiiffigitinnissamut qinnuteqarsinnaavutit. 

Naammagittaalliuutit inerniliisumik aalajangiivigineqareerpat aatsaat taarsiiffigitinnissamut noqqaassutit suliarineqassaaq. 

Peqqinnissaqarfimmi sullineqarneq pillugu naammagittaalliuutit akuerineqarpat aatsaat taarsiiffigitissinnaavutit.

 

Taarsiiffigitinnissamut noqqaassuteqarsinnaanngilatit:

  • Ajoqusernermi annaasat allatigut matussuserneqarsimappata, assersuutigalugu sillimmasiisarfik aqqutigalugu taarsiiffigitinnikkut sulisinnaannginnermi annaasaqaatit matussuserneqareersimappata
  • Nappaammut nakorsartinnerit pissutigalugu ajoqusersimaguit annaasaqarsimaguillu 
  • Nappaatinnut nakorsarneqartumut patsiseqartunik ajoqusernernut annaasannullu 
    Peqqinnissaqarfimmi pisortat ingerlataanni kiffartuussineq pillugu naammagittaalliuummut atatillugu 
  • Peqqinnissakkut sullissisuni Peqqinnissaqarfiup pisortanit ingerlanneqartup avataaniittuni- tassalu kigutilerisuni namminersortuni, timimik sungiusaasuni assigisaannilu nakorsartinnerup kingunerisaanik ataavartumik ajoquteqalernermi imaluunniit aningaasatigut annaasaqarnermi.

Malugiuk:
Peqqinnissaqarfimmi sullissisunit Peqqinnissaqarfiup pisortanit ingerlanneqartup avataaniittunit -tassalu kigutilerisunit namminersortunit, timimik sungiusaasunit assigisaanniillu nakorsartereernermi taarsiiffigitinnissannut noqqaaniaruit noqqaassutit katsorsaasumut toqqaannartumik nassiutissavat.

Peqqissutsimut tunngatillugu paasissutissanik pissarsiniarnissamut ingerlatitseqqiinissamullu akuersissut 
Taarsiiffigitinnissamut noqqaassuteqarniaruit suliarisinnaassagutsigu Nunatsinni Nakorsaaneqarfiup, Peqqinnissaqarfimmi qullersat kiisalu Peqqissutsimut Naalakkersuisoqarfiup paasissutissanik illit peqqissutsinnut tunngasunik pissarsiniarsinnaanissaa ingerlatitseqqiisinnaanissaalu akuersissutigissavatit. Taarsiiffigitinnissamut noqqaassuteqarniarluni immersugassami tamatumunnga akuersinissannut qinnuigineqassaatit.

Sulianik ingerlatsisunik attaveqateqarneq
Taarsiiffigitinnissamut noqqaassutit suliarineqarsinnaassappat  suliami paasissutisat, naammagittaalliuummi pineqartut ilumoornerannut uppernarsaat assigisaallu, qinnuteqaativit suliarineqarnerani suliamik ingerlatsisup saaffiginnissutigiumaagai akissuteqarfigissavatit. Saaffiginnissutit akissuteqarfiginngikkukkit suliaq tamakkiisumik tunngaveqarani suliarineqassaaq. Tamanna noqqaassutivit akuerineqanngitsoorneranik suliamillu ingerlatsinerup sivitsorneranik kinguneqarsinnaavoq.

 

Tunngaviusumik taarsiiffigitissinnaavutit:

  • peqqinnissaqarfimmi nakorsarneqarninni kukkusoqarsimappat 
  • peqqinnissaqarfimmi nakorsartinninni kukkunerup kingunerisaanik toqqaannartumik ajoqusersimaguit 

Taarsiiffigitinnissamik piumasaqaammut killiliisut

  • Ajoqusernermut taarsiiffigitinnissamik qinnuteqaataasumut nammineq pisooqataaguit, imaluunniit annaasassat killilerniarsimanngikkukkit, assersuutigalugu ajoqusernerup kingorna nakorsartissimanngikkuit, taarsiiffigitissinnaanerit tamakkiissumik ilaannakortumilluunniit annaasinnaavat.
  • Akornutaasunut iluaalliuutinullu peqqinnissaqarfimmi nakorsarneqarnermut attuumassutilinnut taarsiiffigitissinnaanngilatit.
  • Nappaatinnut nakorsarneqartumut patsiseqartumik ajoqusernerit annaasallu pillugit ataarsiiffigitinnissamik qinnuteqarsinnaanngilatit.

 

Peqqinnissaqarfimmi pisortat ingerlataanni  nakorsartinneq pillugu naammagittaalliuummik nassiusiniarlutit immersugassap immersornerani, immersugassami taarsiiffigitinnissamut noqqaarusunnerit ilanngussinnaavat.

Naammagittaalliuuteqarnermi immersugassami taarsiivigitinnissannut noqqaassuteqarnerit nalunaarutigisimagukku, Nunatsinni Nakorsaaneqarfiup taarsiiffigitinnissamut noqqaassutit Peqqissutsimut Naalakkersuisoqarfimmut ingerlateqqissavaa.

Aamma naammagittaalliuutit aalajangiiffigineqareerluni akuerineqarpat taarsiiffigitinnissamut qinnuteqarsinnaavutit.

 

Maalaarutit Napparsimasut Maalaarutaannik Aalajangiisartunit akuerineqarsimappat, naammagittaalliuutivillu nassiunnerani taarsiiffigitinnissamut noqqaassuteqarsimaguit, taarsiiffigitinnissamut noqqaassutit Peqqissutsimut Naalakkersuisoqarfimmi taarsiiffigitinnissamut pisinnaatitaaffeqarninnik aalajangiiviusussami, suliarineqassaaq.

Taarsiiffigineqarnissamut piumasaqaataavoq peqqinnissaqarfimmi sullissisup assersuutigalugu nakorsap imaluunniit Peqqissaasup illit nakorsarneqarninnut atatillugu ataasiarluni arlaleriarluniluunniit kukkussuteqarsimanissaa. 
Taamaammat taarsiiffigitissinnaanermut noqqaassutip suliarineqarnerani peqqinnissaqarfimmi sullissinermi pitsaasuseq nalinginnaasumik akuerisaasoq naapertorlugu iliortoqarsimanera Peqqissutsimut Naalakkersuisoqarfimmit tunngavigineqartarpoq.

Peqqissutsimut Naalakkersuisoqarfimmit paasissutissanik annertunerusunik atugassanik nassiussinissannut qinnuigineqarsinnaavutit, taarsiiffigitinnissamut noqqaassummut atugassanik.

Taarsiiffigitinnissamut noqqaassutinnut inerniliussamik naliliinerup kingorna aalajangiussaq Peqqissutsimut Naalakkersuisoqarfimmiit e-mailikkut allakkatigulluunniit ilinnut nassiunneqassaaq.

 

Taarsiiffigitinnissamut noqqaassutit nassiutereerukku, paasissutissanik annertunerusunik suliamik ingerlatsinermi atugassanik nassiussinissannut periarfissaqarputit.

 

Ajoqusernivit taarsiiffigitinnissamut noqqaassutigisavit paasineraniit imaluunniit paasisimasariaqaraluarneraniit ukiut tallimat qanngiussimassanngillat. Ukiut tallimat qaangiutereersimappata taarsiiffigitinnissamut noqqaassutit , taarsiiffigineqarnissamik piumasaqaatip itigartitsissutaanera ilanngullugu, aalajangiivigineqassaaq.

 

Taarsiiffigitinnissamut noqqaassutinni aalajangiussaq allaffissornikkut oqartussaqarfimmut allamut naammagittaalliuutigisinnaanngilat.

 

Uannga allanneqarpoq: Nunatsinni Nakorsaaneqarfik

Peqqissutsimut Naalakkersuisoqarfik
Imaneq 1A - 401
Postboks 1160
3900 Nuuk

Oqarasuaat: (+299) 34 50 00
Fax: (+299) 34 55 05
E-mail: pn@nanoq.gl
Nittartagaq: www.naalakkersuisut.gl
Nunatta nakorsaaneqarfia
Intaleeqqap Aqq. 2
Postbox 120
3900 Nuuk
nun@nanoq.gl
Oqa. +299 34 51 92
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.