airplanebooksbriefcase business cogs cross election entertainment fish house law lockmedicalpeopleselfservices socialtax

Peqqinnissaqarfiup sullississutai – Pingaartumik meeqqanut inuusuttunullu

Kommunerisannuinnaq aalajangersimasunik paasissutissaqarpoq

Kommune toqqaruk
Peqqinnissaqarfiup sullississutai – Pingaartumik meeqqanut inuusuttunullu

Innuttaasut peqqinnerunissaat, pitsaaliuineq aamma nakorsarneqarneq Peqqinnissaqarfiup isumagisarai. Sullissinerit ilaat meeqqanut inuusuttunullu 18-it inorlugit ukiulinnut sammititaapput.


Meeqqanut peqqissaaneq
Meeqqanut atuartussaatitaaneq inorlugu ukiulinnut tamanut, tassa arfinilinnik ukiullit tikillugit, peqqinnissaqarfik akeqanngitsumik peqqissaanermik neqerooruteqartarpoq, makkuusunik:

  • Meeqqap peqqissuunissaa pillugu angajoqqaanut nalinginnaasumik ilitsersuineq, assersuutigalugu peqqinnartunik nerisaqartitsinissamik
  • Meeqqap peqqissusaanik misissuineq angajoqqaanullu ataasiakkaanut ilitsersuineq, assersuutigalugu illit meeqqat pualavallaarpat
  • Angajoqqaanik immikkut ittumik ilitsersuineq ikiuinerlu, assersuutigalugu illit meeqqat immummik sapigaqarpat

Meeqqanut atuartussaatitaasunut akeqanngitsumik peqqissaanernik peqqinnissaqarfik neqerooruteqartarpoq, makkuusunik:

  • Meeqqanik, angajoqqaanik atuarfimmilu sulisunik nalinginnaasumik ilitsersuineq, assersuutigalugu suiaassutsimut tunngasunik imaluunniit sooq assaat errortortarnissaat pingaartuunersoq
  • Meeqqat inuusuttullu peqqissusaasa misissornerat aamma angajoqqaat ataasiakkat ilitsersornerat, assersuutigalugu illit meeqqat isaruartaartariaqarpat
  • Angajoqqaanik immikkut ittumik ilitsersuineq ikiuinerlu, assersuutigalugu illit meeqqat immummik sapigaqarpat


Kigutileritinneq
Tamakku saniatigut meeqqanut atuartussaatitaaneq ataallugu ukiulinnut atuartussaatitaasunullu akuttunngitsumik akeqanngitsumik kigutileritinnermik peqqinnissaqarfik neqerooruteqartarpoq.

Inuusuttunut atuarunnaareersunut 20-llu tikillugit ukiulinnut akuttunngitsumik inuusuttut kigutileritittarnissaannik peqqinnissaqarfik neqerooruteqartarpoq.


Meeqqat akiuussutissamik kapitinneqartarnerat peqqissusaannillu misissuinerit
Meeqqanut inuusuttunullu 18-it inorlugit ukiulinnut tamanut, akeqanngitsumik akiuussuserneqarnissamik peqqinnissaqarfik neqerooruteqartarpoq, makku pillugit:

  • Sakialluut TB
  • Tingullunneq (hepatitis b)
  • Toqqusaarlunneq
  • Noqartarneq (tetanus)
  • Ilummoorneq
  • Nukillaarnermik nappaateqarneq
  • Hib-imik aseruuttoorneq
  • Pneumokok-init aallaaveqartumik nappaateqarneq
  • Mæslinngerneq
  • Savarneq
  • Qimmeralanneq/Aappaluararneq
  • Illissap paavatigut kræfteqarneq (niviarsiaqqanuinnaq)

Meeqqat akiuussutissamik kapitinneqartarnerat pillugu Kalaallit Nunaanni peqqinnissaqarfiup nittartagaani annertunerusunik paasisaqarsinnaavutit.

Meeqqat inuusuttullu 18-it inorlugit ukiullit peqqissusaannik misissuinerit akeqanngitsut aamma peqqinnissaqarfimmit neqeroorutigineqartarput.


Immikkut ittumik suliniarfigisat
Meeqqanut inuusuttunullu immikkut ittumik pisariaqartitsisunut atuartussaatitaanerup naanissaa tikillugu immikkut ittumik suliniutinik peqqinnissaqarfik neqerooruteqartarpoq, matumani ilaapput:

  • Siunnerfeqartumik siunnersuineq
  • Ikiorsiissuteqarneq
  • Nakorsamit imaluunniit peqqissaasumit annertunerusumik misissorneqarnerit
  • Ataatsimik ukioqalereernerup kingorna peqqissaasumit angerlarsimaffimmut alakkarneqarnermi timimik atuisinnaanermik misissortinnerit
  • Meeqqat inuusuttulluunniit inummut tunngasumik siunnersorneqarnerat, assersuutigalugu atuarfiit ulluuneranilu paaqqinnittarfiit innersuussineri malillugit

Takusinnaavattaaq www.peqqik.gl
Allaaserisat attuumassutillit