Nakorsartittup naammagittaalliuutaa

Peqqinnissaqarfimmi sullinneqarneq pillugu naammagittaalliuteqarsinnaavutit makku pineqartillugit:
• Misissortinneq
• Nappaatip suuneranik paasisaqarneq nappaammullu nakorsartinneq
• Erninermi ikiorteqarneq
• Paaqqutarineqarneq
• Napparsimasunut ataasiakkaanut tunngatillugu pinaveersaartitsineq peqqinnissamillu siuarsaaneq
• Nakorsartinneq pillugu paasissutissinneqarneq pisinnaatitsinerlu
• Nappaatip nalunaarsornera
• Peqqinnissaqarfimmi sulisut nipangiussisussaatitaanerat
• Nakorsamit allagartaliussat

Oqaloqatigiinneq
Naammagittaalliuteqannginninni pisoqarfiusumi sulisullu eqqartoqqaarnissaa isumaliutigeqqaartariaqassavat. Sulisumut imaluunniit sumiiffigisami aqutsisumut misigisavit saqqummiunnissaanut pisinnaatitaaffeqarputit. Taamaaliornikkut pisup nassuiaatiginissaanut periuseq sukkasuujullunilu pitsaasuuvoq. Sulisut suliamut tunngatillugu namminneq misigisatik oqaluttuarikutsoorsinnaavaat paatsooqatigiinnissaraluillu iluarserusullugit.

Oqaloqatigiinnermi peqqinnissaqarfimmi sulisut ilinnik nakorsaasimasut oqaloqatiginissaat pisinnaavoq, taamaaliornikkummi nakorsartinnerit qanoq misigisimanerit pillugu oqaluttuarnissannut periarfissaqarlutit. Imaassinnaasoq paasinngisannik apeqqutissaqartutit nassuiartikkusutannik. Imaassinnaasoq aamma sooq taamatut iliuuseqarsimanersut nassuiaatikkusukkitit.

Misigisat nuanniitsut iluarsineqarnissaannut oqaloqateqarnikkut nakorsiartunut arlalinnut aqqutissaasarpoq.

Oqaloqatigiinnissaq ammaffigigukku, imaanngilaq naammagittaalliuteqarnissannut naaggaartutit. Oqaloqatigiinnerup kingorna naammagittaalliuteqarusukkuit tamanna pisinnaatitaaffigivat. Kingornatigut naammagittaalliuteqassaguit naammagittaalliutigisavit inerneranut oqaloqatigiinneq sunniuteqarnavianngilaq.

Allat sinnerlugit naammagittaalliuteqarneq
Angajoqqaat meeqqatik 18-init inorlugit ukioqarpata sinnerlugit naammagittaalliuteqarsinnaapput. Angajoqqaatut akisussaatitaasut inuit paarsatit sinnerlugit naammagittaalliuteqarsinnaapput.

Inuk alla sinnerlugu naammagittaalliuteqarniaruit, pisinnaatitsissummik atsiorsimasumik ilanngussissaatit. Matumani ilaqutaasut aamma pineqarput, soorlu angajoqqaat, meeqqat inersimasunngoreersimasut, katissimasat imaluunniit inooqatigisat.

Qitornarisat, angajoqqaat, katissimasat imaluunniit inooqatigisat qanigisatik toqukkut qimagussimasut sinnerlugit naammagittaalliuteqarsinnaatitaapput.

Pisinnaatitsissut (Pisinnaatitaasoq)

Piffissaliussaq
Peqqinnissaqarfimmit sullinneqarneq pillugu naammagittaalliut pissutsit naammagittaalliutigiumasatit ilisimalerneranit imaluunniit ilisimasariaqarneranit kingusinnerpaamik ukiut marluk qaangiuppata tunniunneqassaaq. Nakorsartissimaneq kingusinnerpaamik ukiut tallimat qaangiuppata naammagittaalliuteqarsinnaavutit.

Taarsiiffigineqarneq
Kukkusumik nakorsartissimanerit naammagittaalliutiginerani taarsiiffigineqarnissamut qinnuteqarsinnaavutittaaq.

Taarsiiffigitinneqarnissamut qanoq qinnuteqarsinnaanerit pillugu allaaserisami uani atuarsinnaavat: Peqqinnissaqarfik aamma taarsiineq
Aamma takuuk www.peqqik.gl

Peqqinnissaqarfimmi sullinneqarneq pillugu naammagittaalliummik tunniussiniaruit, naammagittaalliornermi immersugassamik immersuissaatit atsiorlutillu: Peqqinnissaqarneq pillugu sullinneqarninni naammagittaalliuteqarneq.

Peqqinnissaqarfimmit sullinneqarnerit naammagittaalliutiginiarukku, paasissutissat tunniussassatit pisariaqartut makkuupput:
• Atit najukkallu, aamma inuttut normut
• Oqarasuaativit normua aamma/imaluunniit e-mailit
• Naammagittaalliutigerusutavit nassuiarnera
• Pisoq sumi qangalu pisimanersoq

Sulisut akuutinneqartut aqqi eqqaamasinnaagukkit, naammagittaalliuutigisap suliarineranut iluaqutaassaqaaq.

Naammagittaalliuut uunga nassiutissavat:

Peqqinnissaqarfiup Qullersaqarfia
Postbox 120
3900 Nuuk
Telefon: 34 51 92
Telefax: 32 51 30
Mail: nun@nanoq.gl