Nakorsartinnermut maalaarut nassiuguk

Nakorsartinneq pillugu maalaarummik nassitsigit

Maalaarutinik assigiinngitsunik marlunnik nassiussisinnaavutit:

1. Peqqinnissaqarfimmisullinneqarneq pillugu maalaarutinut ilaapput peqqinnissaqarfimmi pisortat ingerlataanni tamatumalu avataani peqqinnissakkut sullissisunit ilaatigut makkununnga atatillugu sullinneqarneq:

  • Misissuinerit
  • Nappaatinik suussusersiniaaneq nakorsaanerlu
  • Ernisorsiorneq
  • Paaqqutarinninneq
  • Napparsimasunik ataasiakkaanik peqqinnerulersitsiniarneq nappaatinillu pitsaaliuneq 
  • Nakorsartinnissaq pillugu paasissutissiineq nakorsartinnissamullu akuersissuteqarneq
  • Allattugaatinut nalunaarsuineq
  • Peqqinnissakkut sullissisut nipangiussisussaatitaanerat
  • Nakorsat uppernarsaasiaat

2. Peqqinnissaqarfimmi pisortanit ingerlanneqartumi kiffartuussineq pillugu maalaarutini pineqartut ilaatigut tassaapput:

  • Sulisut pissusilersornerat 
  • Ammasarfiit 
  • Utaqqineq
  • Najukkami atugassarititaasunut tunngasut

Ilinniagaqassusertik aallaavigalugu peqqinnissakkut sullissisunit nakorsarneqarnerit maalaarutigigukku, assersuutigalugu nakorsat, kigutilerisut imaluunniit peqqissaasut, maalaarutigisavit isornartorsiorneqarnerannik kinguneqarsinnaavoq. 

Peqqinnissaqarfimmi pisortat ingerlataanni kiffartuussineq maalaarutigigukku Peqqinnissaqarfimmi qullersat maalaarutit suliarissavaat. Maalaarutip suliarinerata kingunerisaanik maalaarummi pineqartut oqaaseqaateqarfigineqassapput. 

Maluginiagassat:
Pisimasoq imaluunniit nakorsartinneq pillugu misigisannik sulisut oqaluunniarlugit apeqqutissatillu akissutissarsiviginiarlugit pisoqarfiusumut imaluunniit nakorsartiffiusumut tamatigut attaveqaqqaartariaqarputit. Saaffiginninninni oqaloqatigiinnerup qanoq ingerlanissaanik kiallu oqaloqatiginissaanik ilisimatinneqassaatit.

Maalaarutiginiakkat pillugu oqaloqateqarsinnaajumallutit kiisalu periarfissatit pisinnaatitaaffitillu pillugit annertunerusunik paasissutissinneqarnissat siunertaralugu, Peqqinnissaqarfimmi siunnersorti ulluinnarni nal. 8:00-16:00 akornanni attavigisinnaavat.
Tamatuma kingorna maalaarummik nassitsiniarnerlutit aalajangersinnaavat.

 

Sulianik ingerlatsisunik attaveqateqarneq
Maalaarutit suliarisinnaassagutsigu suliami paasissutissat pillugit saaffiginnissutit, maalaarutigineqartut uppernarsarneqarnerat ilaalu ilanngullugit, Nunatsinni Nakorsaaneqarfimmi Peqqinnissaqarfiullu qullersaqarfiani sulianik ingerlatsisunit, maalaarutivit suliarineqarnerani ilinnut nassiunneqartut akissuteqarfigissavatit. Saaffiginnissutit akissuteqarfiginngikkukkit suliaq naammattumik tunngaveqarani ingerlanneqassaaq. Taanna maalaarutivit akuerineqanngitsoorsinnaanerata annertunerulerneranik suliamillu ingerlatsinerup sivitsorneranik kinguneqarsinnaavoq.

 

Pisinnaatitsissut – alla sinnerlugu taarsiiffigitinnissamik qinnuteqaruit 
Meeqqamut angajoqqaatut imaluunniit angajoqqaatut akisussaatitaasutut meeraq 18-iliisimanngitsoq sinnerlugu maalaaruteqarsinnaavutit.

Inuk inersimasoq sinnerlugu maalaaruteqaruit, maalaarut Nunatsinni Nakorsaaneqarfimmut nassiunneqartinnagu maalaassutavit akuersissummik tunisimassavaatit. Tamanna aamma atuuppoq qanigisannut tunngappat assersuutigalugu angajoqqaaq, qitornaq inersimasoq aapparisarluunniit pineqarpat, tamanna atuuppoq. 

Akuersissut pisariaqarpoq, pissutigalugu peqqinnissakkut sullissisut sulianillu ingerlatsisut, suliamut attuumasutillip akuersineratigut aatsaat inunnut ataasiakkaanut tunngasunik allanut isertuussanik ingerlatitseqqiisinnaammata

Una toorlugu akuersissut immersugassaq aajuk

 

Nakorsartinneq pillugu maalaarutit makku arlaat aqqutigalugu nassiussinnaavat:

  1. Sullissivik.gl aqqutigalugu ”Nakorsartinnermut maalaarut” NemID-it atorlugu iseriarlutit, immersugassaq immersoriarlugu nassiullugu, imaluunniit
  2. Maalaaruteqarnermi immersugassaq, immersoreerukku anillatseriarlugu e -mailikkut nassiullugu uunga: nun@nanoq.gl, imaluunniit allakkatigut nassiullugu uunga: Nunatsinni Nakorsaaneqarfimmut, postboks 120, 3900 Nuuk

Maalaarummik nassitsinissamut ikiortariaqaruit, ikiuussinnaasut tassaapput:

  • Kommunimi najukkanni innuttaasunut sullissivik (teknikkikkut ikiorsiineq) imaluunniit
  • Nunatsinni Nakorsaaneqarfik mailikkut: nun@nanoq.gl imaluunniit oqarasuaatikkut: 34 51 92 attavigalugu.

Maluginiagassaq:
Inuk alla sinnerlugu maalaarummik nassiussissaguit akuersissummik pissarsisimassaatit. 
Akuersissummik tunniussisussap immersugassaq tamatumunnga atugassiaq immersussavaa atsioriarlugulu e-mailikkut: nun@nanoq.gl nassiullugu.

 

Maalaarutivit Nunatsinni Nakorsaaneqarfimmit tiguneqarneranut uppernarsaammik nassinneqassaatit.

Suliassaq Nunatsinni Nakorsaaneqarfimmit naliliivigineqareerpat, suliap ingerlateqqinnissaanut qanorlu sivisutigisumik ingerlanneqarnissaanut paasissutissanik pissarsissaatit.

Suliaq ilinnut tunngasoq, suliap suunera apeqqutaalluni, pisortaqarfinnit sulianillu ingerlatsisunit assigiinngitsunit suliarineqartussaq Nunatsinni Nakorsaaneqarfiup ingerlateqqissavaa:

  • Peqqinnissaqarfimmi kiffartuusineq pillugu maalaarutit Peqqinnissaqarfiup qullersaqarfiani suliassanngorlugit ingerlateqqinneqartarput.
  • Nakorsartinnermut tunngasunik maalaarutit Nunatsinni Nakorsaaneqarfimmi Danmarkimilu Napparsimasut Maalaarutaannut Aqutsisoqarfimmi Napparsimasullu Maalaarutaannik Aalajangiisartuni suliarineqartarput.
  • Maalaarutit, taarsiiffigitinnissamut qinnuteqaammut patsisaasut akuerineqarpata, taarsiiffigitinnissamut noqqaassutit Peqqissutsimut Naalakkersuisoqarfimmi suliassanngorlugit Nunatsinni Nakorsaaneqarfimmit ingerlateqqinneqartarput.

Suliap ilinnut tunngasup suliarineqarnerani Danmarkimiissaaq sulianik ingerlatsisunit assigiinngitsunit attavigineqarneq misigisinnaassavat.

 

Peqqinnissaqarfimmi pisortat ingerlataanni kiffartuussineq pillugu maalaarutit suliarineqartarnerat 
Kiffartuussinermut tunngasunik assersuutigalugu sulisut pissusilersornerannik, utaqqinermik, nakorsartinnissamut periarfissaqannginnermik assigisaannilluunniit naammaginninnginnerit pillugu maalaaruteqaruit, Nunatsinni Nakorsaaneqarfiup maalaarut Peqqinnissaqarfiup qullersaqarfianut suliassanngorlugu ingerlateqqissavaa.

Peqqinnissaqarfimmi qullersat maalaarut tigusartik tunngavigalugu qanoq pisoqarsimanera misissussavaat. Peqqinnissaqarfimmi qullersat ilaatigut peqqinnissakkut sullissisunit immikkoortortamiilluunniit maalaarutigisannit paasissutissanik pissarsiniassapput.

Kiffartuussineq pillugu maalaarutivit Peqqinnissaqarfiup qullersaqarfiani suliarineqarnerata qaammatit sisamat pallillugit sivisussuseqarsinnaanissaa naatsorsuutigisinnaavat.

Peqqinnissaqarfik pillugu maalaarutinik suliaqartarneq

Nunatsinni Nakorsaaneqarfik maalaarutigisanik saqqummiissaaq (maalaarutigisap qanoq paasineqarnera) oqaaseqarfigisassanngorlugulu ilinnut nassiullugu. 
Tamatumani suliamik ingerlatsisup paasissutissanik annertunerusunik nassitseqqusinnaavaatit. 
Taamaattoqassappat piffissap aalajangersimasup iluani akissuteqaqquneqassaatit.

Maalaarummi pineqartut paasiniarnissaannut Nunatsinni Nakorsaaneqarfimmi suliamik ingerlatsisut paasissutissanik pissarsiniartarput.

Maalaarutivit suliarinissaanut paasissutissanik annertunerusunik pissarsiniarnissaq pisariaqartarpoq, taakkulu tassaasinnaapput:

  • Allattugaatini paasissutissat
  • Peqqinnissakkut sullissisunit maalaarutigineqartunit oqaaseqaatit

Tamatuma kingorna Nunatsinni Nakorsaaneqarfik makku ilanngullugit maalaarutinnik eqikkaassaaq:

  • Maalaarutaasut
  • Pisimasoq pillugu nassuiaat
  • Peqqinnissakkut sullissisut kikkut nakorsaanerisa Napparsimasut Maalaarutaannut Aqutsisoqarfimmit /Napparsimasut Maalaarutaannik Aalajangiisartunit naliliivigineqarnissaat 
  • Nunatsinni Nakorsaanerup naliliinera innersuussutaalu
  • Ilanngussat maalaarutivit eqikkarneqarnerani tunngavigineqartut

Taakku tamarmik ataatsikkut Danmarkimi Napparsimasut Maalaarutaannut Aqutsisoqarfimmut tamatuma kingorna suliamik Napparsimasut Maalaarutaannik Aalajangiisartunut nangitassanngorlugu naliliisussamut nassiunneqassapput.

Tamatuma kingorna Napparsimasut Maalaarutaannut Aqutsisoqarfik suliami illuattungeriinnut tamanut - aamma ilinnut -aalajangiinissamut siunnersuusiussaaq. Suliamik ingerlatsinermi illuatungeriit tamarmik pisinnaatitaaffiisa qulakkeerneqarnissaat Napparsimasut Maalaarutaannut Aqutsisoqarfiup akisussaaffigaa. Taamaammat suliamut tunngatillugu paasissutissat aalajangiinissamullu siunnersuut ilinnut maalaartumut kiisalu maalaarutigineqartumut/nut nassiunneqassapput. Taamaaliornikkut suliami illuatungeriit tamarmik maalaarut aalajangiivigineqavitsinnagu oqaaseqaateqarnissamut periarfissinneqarsimanissaat qulakkeerneqassaaq.

Maalaarutini illuatungeriit tamarmik tusarniaavigineqareerpata Napparsimasut Maalaarutaannik Aalajangiisartut aalajangiisuusarput.

Aalajangiinerup makku kingunerisinnaavai:

  • Peqqinnissakkut sullissisumik isornartorsiuinnginneq. Tamatuma maalaartumut peqqinnissakkullu sulisunut maalaarutigineqartunut allakkatigut nalunaarutigineqarnera.
  • Peqqinnissakkut sullissisup isornartorsiorneqarnera. Tamanna maalaartumut peqqinnissakkullu sullissisunut maalaarutigineqartunut allakkatigut nalunaarutigineqassaaq.
  • Peqqinnissakkut sullissisumik annertuumik isornartorsiuineq (erseqqissaaneq) politiinullu unnerluutiginnissinnaaneq.
  • Peqqinnissakkut sullissisut maalaarutigineqartut annertuumik isornartorsiorneqarpata imal. arlaleriarlutik Aalajnagiisartunit isornartorsiorneqarsimappata, aalajangiineq Napparsimasut Maalaarutaannut Aqutsisoqarfiup nittartagaani tamanut saqummiunneqassaaq.

Ilinniagaqassuseq tunngavigalugu nakorsartinnerit pillugu maalaarutivit suliarineqarnissaata ukiup aappaa affaa pallillugu –sinnerluguluunniit sivissuseqarnissaa naatsorsuutigisinnaavat.

 

Paasissutissanik annertunerusunik maalaarutivit nassiutereernerani suliamik ingerlatsinermi atugassanik nassitsinissannut periarfissaqarputit.

 

Maalaarutivit sapinngisamik sukumiinerpaamik kinguneqarluartumillu suliarineqarnissaa anguniarlugu, pisimasup kingorna sapinngisamik piaarnerpaamik maalaaruteqarnissat pingaaruteqarpoq. 
Maalaaruteqarnissavit tungaanut piffissaq sivisuallaaq ingerlappat peqqinnissakkut sullissisut suliami annikitsualuit eqqaamajuminnaatsissinnaavaat imaluunniit allamik suliffeqalersimasinnaallutik. Tamakku suliamik ingerlatsinissaq ajornakusuulersissinnaavaat.

Peqqinnissaqarfimmi nakorsarneqarneq maalaarutiginiarukku kingusinnerpaamik piffissap maalaarutiginiakkavit paasineraniit ukiut marluk qaangiutsinnagit tamanna pissaaq. Nakorsartinneq pillugu maalaaruteqarneq nakorsartereernermi kingusinnerpaamik ukiut tallimat qaangiutsinnagit pissaaq.

 

Peqqinnissaqarfimmi nakorsarneqarneq pillugu maalaaruteqarneq 
Peqqinnissakkut ilinniagalimmit nakorsarneqarneq pillugu maalaarutivit aalajangiivigineqarnera allaffissornikkut pisortaqarfimmut allamut maalaarutigisinnaanngilat.

Kiffartuussineq pillugu maalaarutit
Peqqinnissaqarfimmi pisortanit ingerlanneqartumi kiffartuussineq pillugu maalaarutinnut oqaaseqaat naammaginngikkukku, maalaarutit Peqqisutsimut Naalakkersuisoqarfimmut saqqummiussinnaavat.

 

Uannga allanneqarpoq: Nunatsinni Nakorsaaneqarfik

Nunatta nakorsaaneqarfia
Intaleeqqap Aqq. 2
Postbox 120
3900 Nuuk
nun@nanoq.gl
Oqa. +299 34 51 92
Peqqinnissaqarfiup qullersaqarfia
Postboks 1001
3900 Nuuk
Sundhedsledelsen@peqqik.gl
Oqa. +299 34 43 00
Peqqinnissaqarfimmi siunnersorti

E-mail: siunnersorti@peqqik.gl
Oqa: 344050

Ataasinngornermiit tallimanngornermut: 8.00 – 16.00

Nittartagaq: www.peqqik.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.