Suliassamut avatangiisinut siuarsaaffiusussamut aningaasanik Avatangiisinut Aningaasaateqarfimmut qinnuteqarit

Avatangiisinut Aningaasaateqarfimmiit suliassat, Kalaallit Nunaanni avatangiisinut iluaqutaasussat tapersersorneqarput. 2018-imi ukiakkut Inatsisartut Avatangiisinut Aningaasaateqarfimmik pilersitsiniarlutik aalajangerput. Avatangiisinut Aningaasaateqarfimmiit nuna tamakkerlugu avatangiisini pissutsinik pitsanngorsaaniarluni suliassat pingaarutillit tapersersorneqartarput.

Ilaatigut kommunit, inuussutissarsiortut, atuarfinni atuaqatigiit, NGO-t inuinnaallu Avatangiisinut Aningaasaateqarfimmut aningaasanik qinnuteqarsinnaapput.

Aningaasanik ukununnga qinnuteqartoqarsinnaavoq:

• Anartarfilerinermi imermullu errortuutikumut aaqqiissutissatut misiligutitut suliassat.
• Aalisarnermi atortunik annaasanik piniariartarfinnillu saliinerit.
• Suliassat eqqakkanik immikkoortiterinermut, atueqqinnermut issunngortitsinermulluunniit siuarsaataasussat, kiisalu suliassat plastikkit sequnnerinik aniatitsinermik annikillititsisussat.
• Eqqagassalerinermi piorsaaneq pillugu kommunini suliassat.
• Suliassat innuttaasut suliffeqarfiilluunniit avatangiisinik eqqumaffiginninnerinik annertusititsisussat.
• Allat

04.12.2023-miit 12.02.2024-mut Avatangiisinut Aningaasaateqarfimmut aningaasanik qinnuteqarnissamut periarfissaqartitsisoqassaaq. Piffissaq qinnuteqartitsiffiusoq naappat qinnuteqaatit Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi Avatangiisinut Upalungaarsimanermullu Immikkoortortaqarfimmi suliarineqassapput. Piffissaq suliaqarfiusoq qaammatinik marlunniit sisamanut tulliuttunik sivisussuseqassaaq, tassanilu qinnuteqaatit ataasiakkaarlugit akuerineqarsinnaanersut itigartinneqassanersulluunniit aalajangiiffigineqassapput. Qinnuteqaatinut akissutit qinnuteqarnermi immersukkani attaveqarfissanut paasissutissiissutigineqartut naapertorlugit ingerlaavartumik nassiunneqartassapput.

Avatangiisinut Aningaasaateqarfiup siusinnerusukkut suliarisartagai matuma kinguliani annertunerusumik atuarneqarsinnaapput.
2019-imi Avatangiisinut aningaasaateqarfik pillugu nalunaarut KAL&DK.pdf (naalakkersuisut.gl)
2020-imi Avatangiisinut aningaasaateqarfik pillugu nalunaarut KAL&DK.pdf (naalakkersuisut.gl)

Avatangiisinut Aningaasaateqarfimmut qinnuteqarniaraanni, suliassaq matuma kinguliani aallutassatut allattuiffimmi allassimasut ilaannut tunngassaaq:

• Anartarfilerinermi imermullu errortuutikumut aaqqiissutissatut misiligutitut suliassat.
• Aalisarnermi atortunik annaasanik piniariartarfinnillu saliinerit.
• Suliassat eqqakkanik immikkoortiterinermut, atueqqinnermut issunngortitsinermulluunniit siuarsaataasussat, kiisalu suliassat plastikkit sequnnerinik aniatitsinermik annikillititsisussat.
• Eqqagassalerinermi piorsaaneq pillugu kommunini suliassat.
• Suliassat innuttaasut suliffeqarfiilluunniit avatangiisinik eqqumaffiginninnerinik annertusititsisussat.
• Allat

Avatangiisinut Aningaasaateqarfimmut aningaasanik 10.000 koruuniniit amerlanerusunik qinnuteqarnermi 25%-inik nammineerluni aningaasaliisinnaanissaq piumasarineqarpoq, tamannali 10.000 koruuninik ikinnerusunilluunniit qinnuteqarnermut atuutissanngilaq.

Avatangiisinut Aningaasaateqarfimmiit kommunit ingerlatsinerinut tapiisoqarsinnaanngilaq, taamaattumillu aningaasaliinermi ineriartortitsinermi suliassat siunnerfigineqassapput. Taakkununnga assersuutitut ‘2020-mut Avatangiisinut Aningaasaateqarfik pillugu nalunaarutit’ aamma ‘2019-imut Avatangiisinut Aningaasaateqarfik pillugu nalunaarutit’, matuma kinguliani Tamanut tunngasut ataanni linkilerneqartut takukkit.

Erseqqissaatigineqassaaq, qinnuteqarfissatut immersugassamut missingersuutit, suliassami aningaasartuutissatut naatsorsuutigineqartut pillugit aningaasaqarnermut tunngasunik nassuiaaffiusut ilanngunneqassammata. Tamatuma peqatigisaanik missingersuutini aningaasat qanoq amerlatigisut sunut matussutissaanersut ersarissumik allanneqassaaq. Qinnuteqarnermut immersugassami missingersuutinut piumasaqaatit sukumiisumik allaaserineqarput, missingersuutit qanoq isikkoqarsinnaanerinut assersuutissartaqarlutik.

Avatangiisinut Aningaasaateqarfimmut siunnerfiusumi ataatsimi amerlanerusuniluunniit suliassanut avatangiisinik siuarsaaffiusumut aningaasanik qinnuteqarninni imminut kiffartuussivik atorniarukku (Suliassaqarfinnut allaaserineqartunut tamanut tunngasut takukkit).

Aallarniutigalugu digitaliusumik imminut kiffartuussivik iserfiginiarlugu attataasaq sungaartoq “Ugguuna qinnuteqarit” tooruk.

Malugiuk:
Imminut kiffartuussivik atorniarukku nammineerlutit MitID-t atussavat.

Qinnuteqarninni immersugassaq ilanngunneqartoq immersussavat.

Immersugassap naanerani suliassamut missingersuutit PDF-fil-inngorlugit ilanngutissavatit (immersukkami missingersuummut assersuut takuuk).
Kommuninut inuussutissarsiortunullu ilisimatitsissut: Suli MitID Erhverv atorlugu Sullissivik.gl aqqutigalugu qinnuteqartoqarsinnaanngilaq.

Avatangiisinut Aningaasaateqarfimmut siunnerfiusumi ataatsimi amerlanerusuniluunniit suliassanut avatangiisinik siuarsaaffiusunut aningaasanik qinnuteqarniaruit (Suliassaqarfinnut allaaserineqartunut tamanut tunngasut takukkit).

Avatangiisinut Aningaasaateqarfimmut aningaasanik qinnuteqaatip allaganngorlugu tunniunneqarnissaanut qinigassatit marluupput:

1. Linki matuma kingulianiittoq atorlugu immersugassaq aassavat naqillugulu, aammalu immersugassaq assaannarmik immersussavat, tamatumalu kingorna matuma kinguliani najukkamut qaatiguuliorlugu nassiutissallugu.
   
   Avatangiisinut Aningaasaateqarfik 2024 Qinnuteqarnermut immersugassaq.pdf uaniittoq tooruk
   
   Malugalugu: Avatangiisinut Upalungaarsimanermullu Immikkoortortaqarfiup qinnuteqaatit pitsaanerpaamik suliarisinnaaniassammagit, immersugassap ersarissumik paasiuminartumillu allanneqarnissaa inassutigineqarpoq, kuglepen atorlugu immersuisoqarsinnaavoq.
2. Immersugassaq online-kkut immersoruk, naqiguk immersugarlu allakkatigut nassiuguk (MitID atorneqartariaqanngilaq).
   • Linkimiittumi ‘Ugguuna qinnuteqarit’ tooruk
   • ’Immersuiit naqillugulu’ toqqaruk
   • Immersugaq naammassisaq naqiguk, najukkamullu ataani allassimasumut nassiullugu.

Allaganngorlugu immersukkanik tigusisussaq:
Imaneq 4
Postboks 1015
3900 Nuuk
+299 34 50 00
pan@nanoq.gl

Uunga Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik.

Avatangiisinut Upalungaarsimanermullu Immikkoortortaqarfik; 2024-mut Avatangiisinik Aningaasaateqarfik pillugu

Qinnuteqaatinni digitaliusumi nassiuguk tooreerukku, mail-imik qinnuteqaativit tiguneqarneranut uppernarsaaffiusumik tigusaqassaatit.
Kisiannili qinnuteqaatit Naalakkersuisoqarfiup allanik tigooqqaavianut allakkatigut nassiukkukku, aatsaat qinnuteqaativit suliarineqareernerani qinnuteqaatinnut akissummik pissarsissaatit.

Qinnuteqaatit ataasiakkaat aatsaat piffissap qinnuteqartitsiffiusup 12.02.2024-mi naanerata kingorna suliarineqassapput. Qinnuteqaatit tiguneqartut amerlassusii apeqqutaalluni piffissaq suliarinniffiusussaq qaammatinik marlunniit sisamanut sivisussuseqassaaq.

Tamatuma kingorna qinnuteqaatit ataasiakkaarlutik suliarineqassapput, aammalu qinnuteqarnermut tunngavissatut piumasaqaatitullu kissaatigineqartut tunngavigalugit naliliiffigineqassallutik. Tunngavissat piumasaqaatillu assersuutigalugit tassaasinnaapput:

• Immersugassat eqqortumik immersorneqarsimasut
• Suliassat siunnerfissatut erseqqissarneqartumut ataatsimut amerlanerusunulluunniit tunngasuunerat
• Suliassap piviusorsiortutut isikkoqarnera
• Missingersuutit piviusorsiortutut isikkoqarneri
• Suliassamut nassuiaatip paasiuminassusia aammalu naammaginartumik allaaserineqarsimanera

Qinnuteqaatit tunngavissanik naammassinniffiunngippat, Naalakkersuisoqarfiup qinnuteqaativit suliarinissaa ajornakusoortissavaa, taamaattumillu tamanna qinnuteqaatip nassiunneqartup Naalakkersuisoqarfimmiit akuerineqarsinnaannginneranik kinguneqarsinnaavoq. Pisut ilaanni qinnuteqaat nassiunneqartoq itisiliinissamik iluarsiinissamilluunniit pisariaqartitsiffiuppat, Naalakkersuisoqarfiup qinnuteqartoq attaveqarfigisinnaavaa. Tamanna pissappat Avatangiisinut Upalungaarsimanermullu Immikkoortortaqarfiup attaveqarfigissavaatit.
Qinnuteqaat akuerineqarnersoq itigartinneqarnersorluunniit, e-mail-ikkut, qinnuteqarnermi immersuiffimmi allassimasukkut nalunaarutigineqarumaarpoq.

Suliassaq akuerineqarpat, illit qinnuteqartutut suliassami iliuusissanut pilersaarummik sukumiisumik, aammattaaq piffissamut pilersaarummik sukumiisumik missingersuutinillu ilaqartinneqartoq nassiutissavat.

Suliassaq naammassippat uku pillugit paasissutissanik Naalakkersuisoqarfimmut nassiusseqqullutit qinnuigaatsigit:

• Assit, suliassap suliarineqarneranut uppernarsaatitut assilisat
• Pisianut, Avatangiisinut Aningaasaateqarfimmit akilerneqartussanut tamanut fakturat

Illit suliamut akisussaasutut nammineerlutit suliami aningaasartuutinut akiliigallassaatit, tamatumalu kingorna isumaqatigiissutaasut missingersuutillu akuerisat iluanni taarsiiffigineqassaatit. Fakturat nassiunneqartut aallaavigalugit taarsiissutissat akilerneqartarput. Taamaattumik suliassamut qinnuteqaatit naapertorlugu kiffartuussissutinik pisinermut fakturanik uppernarsaatinillu pissarsiniartarnissat pingaaruteqarpoq.
Suliassaq akuerineqarpat, piumasaqaatit atugassarititaasullu allat Naalakkersuisoqarfiup akissutaani allassimassapput

Suliassarpiaq, piffissamut pilersaarut imaluunniit missingersuutit annertuunik allannguuteqassappata, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik ilisimatinneqassaaq. Tamanna uunga: pan@nanoq.gl mail-imik nassiussinikkut pissaaq, suliap normua suliallu taaguutaa allassimassallutik. Suliassaq akuerineqassappat, neriorsuutip akuerineqarneranut allakkiami talerperlermi suliap normua allassimasussaavoq.

Qinnuteqarnissaq 04. december 2023-miit 12. februar 2024-mut piffissalerneqarpoq.

Qinnuteqaatit itigartinneqassappat, tamanna pillugu paasissutissanik itisiliiffiusunik Naalakkersuisoqarfimmut pissarsiniartoqarsinnaavoq. Qinnuteqaatit itigartinneqassappat, aalajangiineq pillugu maalaaruteqarnissamut periarfissaqartitsisoqanngilaq. Tassunga taarsiullugu sooq qinnuteqaat akuerineqannginnersoq pillugu paasissutissanik pissarsiniarnissaq innersuussutigaarput, piffissami qinnuteqartitsiviusumi tullermi assinganik kukkusoqannginniassammat.

Tamanna Naalakkersuisoqarfimmut e-mail-ikkut: pan@nanoq.gl pisinnaavoq