Imminut sullississutinut iserniaruit NemID suli isissutissatut atussavat.

Ilinniarnertuunngorniarfimmut (GUX) qinnuteqarit

Qinnuteqarfissamut 1. marts killigitinneqarpoq.

Internet atorlugu qinnuteqaateqassaatit, papilissat atorlugit qinnuteqarnissamut pdf-filimik aallertoqarsinnaajunnaarami.

Uku atussavatit

  • NemID imaluunniit MitID
  • Papilissat ilinniagarisimasumut tunngasut (meeqqat atuarfiannit karakterinut uppernarsaatit atuutinngillat)
  • Suli meeqqat atuarfianniikkuit kiliffigisanni karakterit kingulliit atussavatit


Uku atussanngilasi

  • Kuisinnermut allagartaq
  • Najugaqarnermut uppernarsaat
  • Nunatsinni meeqqat atuarfiannit karakteriinut uppernarsaatit (karakterit tassaniitinneq ajorpavut 2006-imiit ullumikkumut pisortat paasissutissaasiviat)


GUX-imut qanoq qinnuteqassanersutit videomi takujuk

Ilinniarnertuunngorniarneq (GUX) Aasianni, Sisimiuni, Nuummi aamma Qaqortumi atuagarsorluni inuusuttunut ilinniarfiuvoq. Kiisalu tiguneqarsinnaavoq GUX ungasissumiit ilinniartitsineq aqqutigalugu eGUX. GUX ilinniarnermi sammivinnik amerlasuunik periarfissiivoq, soqutigisannut tulluarsarneqarsimalluni aamma siunissami ilinniagaqarnissannut tulluussagaavoq.

GUX ukiuni pingasuni aamma ukiuni marlunni kiisalu atuartitsissutini ataasiakkaani tapertaliussatullu atuartitsissutinik ilinniartoqarsinnaavoq.

Nalunaarsuut GUX pillugu uani takuuk

 

 

Ilinniarnertuunngorniarfik qinnuteqaaterni pingaarnertut toqqakkat nalilersussavaa qanoq nalilersorneqassanerlutit:

  • inatsisitigut piginnaatitaaffikkut
  • immikkut akuerineqarnikkut
  • misilitsinnikkut


Inatsisitigut piginnaatitaaffik sunaava?
Tulliuttut piumasaqaatit naammassigukkit inatsisitigut piginnaatitaaffeqarputit GUX-imi atualernissannut. Qinnuteqaruit GUX-imiit pinngitsoornat tiguneqassaatit:

  • projektopgavimi minnerpaamik E-mik karaktereqaruit
  • 10. klassimi inaarutaasumik angusimasanut karakteerini tamani minnerpaamik karakteeri E anguneqarsimappat
  • meeqqat atuarfianni 10 klassimi soraarummeernermi angusanni tamani, kiisalu ilinniartitsissutinilu misilitsiffiusuni tamani minnerpaamik E-mik karaktereqaruit


Immikkut akuerineqarluni isernissamut qinnuteqarneq sunaava?
FA-mi misilitsinninni ilinniartitsissutini soorlu kalaallisut, danskimi, tuluttut, matematikkimilu pitsaasumik karaktereqarputit, kisianni ilinniartitsissutini ataatsimi marlunniluunniit angusinngitsoorsimallutit. Taamaattoqarpat periarfissaqarpoq atuarfimmi rektoriusup immikkut akuersaarluni qinnuteqaatinnik akuersisinnaaneranut. Ilinniarnertuunngorniarfik inatsisitigut piumasaqaatinut immikkut ittumik akuersissuteqassappat inuttut suliatigulluunniit tunngavilersuutinik ilanngussissaatit.

Misilitsinneq suua?
Misilitsinneq aprilip ingerlanerani pisarpoq, apeqqutit arlariinnik akissutissalersoriikkat immersorlugit misilitsinneq pisarpoq. Ilinniartitsissutit kalaallisut, qallunaatut, tuluttut, matematik pinngortitalerineq inuiaqatigiilerinerlu misilitsiffiusarput. Misilitsinneq akunnermi ataatsimi ingerlanneqartarpoq. Misilitsinneq siusinnerpaamik pisinnaavoq meeqqat atuarfianni naammassereernerup kingorna upernarnerani. Misilitsinnerit Majoriami, nunaqarfiit atuarfiini Danmarkimiittunullu Kalaallit illuini ingerlanneqartarput. Misilitsinnermi angusisut qulakkeeqqasinnaanngilaat GUX-imut isernissaq, tamatumani GUX-it inissaqartitsinerat apeqqutaasarmat.

Una toorlugu Ilinniarnertuunngorniarneq pillugu ilitsersuusiaq ammaruk

Una toorlugu Isiginnaagassiaaraq GUX-imi ilinniakkat sammivii pillugit isiginnaaruk

Ilinniakkamut immaqaluunniit ilinniagaqarnersiuteqarnissamut qinnuteqarusuppit, uuma quppernerup qulaaniittoq toortagaq sungaartoq “Maana qinnuteqarit” aqqutigalugu qinnuteqarit. Imminut sullinnissamut aaqqiissutit atorniarukkit, illit nammineq NemID-it pigisat isertaatitut atussavat.

Qinnuteqarfissap killigaa 1. marts.



Malugiuk
Ilinniakkamut tiguneqarnissat qinnutigigukku, imaanngilaq ilinniartut inaannik tunineqarnissat naatsorsuutigissagit.

Qinnuteqarfissamut 1. marts killigitinneqarpoq.

Uannga allanneqarpoq: Ilinniartitaanermut, Kultureqarnermut, Timersornermut, Ilageeqarnermullu Naalakkersuisoqarfik

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikin@nanoq.gl
Nittartagaq: www.naalakkersuisut.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.