Inuussutissarsiutitigut ilinniartitaanermut qinnuteqarit (EUD)

Inuussutissarsiutinik ilinniartitsinermut qinnuteqarnissaq kissaatigigukku ataani isissutissaq atorlugu qinnuteqaat qarasaasiakkut suliarissavat. Immikkut ittumik pisoqartillugu najukkanni Majoriamit pappialatigut qinnuteqarfissamik tunineqarsinnaavutit.

Inuussutissarsiutinik ilinniartitsineq sulilluni ilinniarneruvoq inuutissarsiummullu tunngasuulluni. Ilinniarfik suliffillu ilinniartuuffik nikerartumik ilinniarnermi najorneqartarput.

Qitiusumik ilinniarfiit ilaanni nunatsinniittumi ilinniarfimmiittoqartarpoq. Ilinniarfinnut takussutissiaq matuma ataaniittoq takuuk.

Inuussutissarsiutinik ilinniartitsinermi ilinniakkamik aallartitsinissamut suliffeqarfimmi sungiusarluni suliffissamik nassaareersimanissat piumasaqaataavoq. Qitiusumik ilinniarfiit ilaasa sungiusarluni suliffissaq neqeroorutigisarpaat, takuuk qitiusumik ilinniarfinnut isissutissaq matuma ataaniittoq.

Taassuma saniatigut inuussutissarsiutinik ilinniartitsinerit ilaasa piumasarisarpaat meeqqat atuarfianni inaarutaasumik misilitsinnerni atuartitsissutini taaneqartuni angusatigut minnerpaaffiusussaq ataassimassanngikkit.

Inuussutissarsiutinik ilinniartitsinerni ilinniartunngornissamut piumasaqaataasut ilinniarfiit nittartagaanni atuarsinnaavatit, imaluunniit qitiusumik ilinniarfimmi ilinniarnermi ilitsersuisartoq attavigisinnaavat.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut NemID-nnut isissaatit.

Uku atussavatit

• NemID imaluunniit MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqarsimaninnut uppernarsaammik mailimik tigusaqassaatit mailimut qinnuteqarninni ilisimatitsissutigisimasannut.

Qinnuteqaatit nassiutereerukku ilinniarfimmit/ilinniarfinnit qinnuteqarfigisannit suliarineqassaaq.  

Qinnuteqaatit pillugu apeqqutissaqaruit, soorlu tiguneqarnissannut qaqugukkut akineqassanerlutit, taava ilinniarfik qinnuteqarfigisat attavigissavat.

Inuussutissarsiutinik ilinniartitsinerit amerlanerit ilinniartussanik ingerlaavartumik tigusisarput. Imaappoq ukioq kaajallallugu qinnuteqarsinnaavutit. Suli paasisaqarusukkuit qituisumik ilinniarfiit ataasiakkaat nittartagaat alakkakkit.

Isumassuinermik, peqqinnermut perorsaanermullu soqutigisaqarpit:

• Peqqissaanermik Ilinniarfik, Center for Sundhedsuddannelser, Nuuk: www.pi.gl
• Perorsaanermik Ilinniarfik, Socialpædagogisk Seminarium, Ilulissat (Isumaginninnermik ikiortinngorniarfik): www.pi.sps.gl
  
  

Allaffissornermi, niuernermi niuernermilu sullissinermik soqutiginnikkuit:

• Niuernermik Ilinniarfik, Handelsskolen, Qaqortoq: www.cak.gl
• Niuernermik Ilinniarfik, Handelsskolen, Nuuk: www.ninuuk.gl
  
  

Inuussutissalerinernik, nunalerninermik takornarialerinermillu soqutigisaqarpit:

• Niuernermik Ilinniarfik, Handelsskolen, Qaqortoq: www.cak.gl
• INUILI, Inuussutissalerinermik Ilinniarfik, Narsaq: www.inuili.gl
• Upernaviarsummi nunalerinermik ilinniarfik: www.nunalerineq.gl
  
  

Aatsitassarsiornermik, sanaartornermik assartuinermillu soqutigisaqarpit:

• Sanaartornermik Ilinniarfik, Bygge & Anlægsskolen, Sisimiut: www.kti.gl
• Saviminilerinermik Ilinniarfik, Jern & Metalskolen, Nuuk: www.kti.gl
  
  

Aalisarnermik, piniarnermik imarsiornermillu soqutigisaqarpit:

• Imarsiornermik Ilinniarfik, www.maritim.gl