Studielån sananeqarsinnaanngikkallarput, attaveqaatikkut ajutooqqaneq peqqutaalluni, Ilinniagaqarnersiuteqartitsivimmit suliaq aaqqinnissaa sulissutigineqarpoq.

Danmarkimi ilinniagaqarneq

Nunatsinni inuit kikkulluunniit ilinniagaqarnissamik periarfissaqartussaapput. Ilinniartitaaneq aqqutigalugu ilisimasanik atorsinnaalluakkannik pissarsiorsinnaavutit, inuunerup sinnerani atorsinnaasannik. Ilinniagaqarsimaguit suliffissatigut periarfissat aamma annertunerussapput. Nunatsinni Nunattalu avataani ilinniagaqarnissamut qinnuteqarsinnaavutit, assersuutigalugu Danmarkimi.

Danmarkimi ilinniagaqarnermi ikinngutit ilaquttallu ungasissorujussuusussaavatit. Taamaammat Danmarkimi ilinniagaqarnissamut qinnuteqarnissat pitinnagu imminut isumagisinnaanissaq piareersimaffigereersimasariaqarpat. Soorunami Danmarkimi ikinngutitaartussaqqaarputit ilinniarfigisanniillu sapinngisamik siunnersorneqarnikkut ikiorneqartarumaarlutit. Danmarkimut nuunneq sungiusimasanik allannguisitsinerujussuullunilu inuunerup sinneranut misigisassanik nassataqartitsisussaavoq.

Danmarkimi ilinniagaqarneq pillugu suli paasisaqarusukkuit paasissutissat nittartakkani ukunani atuarsinnaavatit www.sunngu.gl aamma www.ug.dk.

 

Danmarkimi ilinniagaqarnissamut qinnuteqarfigisinnaasavit ilaat makkuupput:

Inuussutissarsiutitigut ilinniartitaanerit
Danmarkimi inuussutissarsiutitigut ilinniartitaanerit Kalaallit Nunaannitulli tassaapput, inuussutissarsiummut aalajangersimasumut sammisut sulinermik ilinniarfiit. Ilinniarneq atuarfimmi suliffimmilu misiliisarnerup akornanni nikerartumik ingerlanneqartarpoq, aamma nalinginnaasumik tunngaviusumik pingaarnertullu ingerlatsinermik imaqarpoq. Ilinniagassat 105-iusut 300-it sinnerlugit alloriarnertallit imaluunniit immikkut ilinniagassartaqartut akornanni toqqaasinnaavutit.

Meeqqat atuarfiata kinguninnguatigut imaluunniit kingusinnerusukkut aallartissinnaavutit. Danmarkimi inuussutissarsiutitigut ilinniakkamik aallartitsinissamut apeqqutaavoq qassinik ukioqarnersutit aamma suna tunuliaqutarinerit.

Danmarkimi inuussutissarsiutitigut ilinniartitaanerit pillugit annertunerusumik paasisaqarusukkuit uani atuarsinnaavatit

Ilinniarnissamut piareersarluni ilinniartitaanerit

Ilinniarnissamut piareersarluni ilinniartitaanerit atuagarsorluni ilinniarfiupput, taakkuuppullu ingerlaqqiffiusumik ilinniartitaanernut piareersarfigisassatit. Ilinniartitaanerit ukiunik pingasunik sivisussuseqarput, taakkulu ingerlaqqiffiusumik ilinniartitaanernut tamanut Nunatsinni Nunattalu avataanut ingerlariaqqinnissamut ammaassisuullutik. Ilinnialernissamut piareersarluni ilinniartitaanerit assigiinngitsut pingasuupput:

  • STX, nalinginnaasumik atuagarsorluni ilinniartitaaneq
  • HTX, atuagarsorluni aamma teknikkimut ilinniartitaaneq
  • HHX, niuernikkut ilinniarnertuunngorniarnermik ilinniartitaaneq

Uani ilinniartitaanernut piareersarluni ilinniartitaanerit annertunerusumik paasisaqarfigikkit. 

Ingerlaqqiffiusumik ilinniartitaanerit
Danmarkimi ingerlaqqiffiusumik ilinniartitaanerit assigiinngitsorujussuupput. Ilinniartitaanerit ilaat atorfinnut aalajangersimaqqissaartunut piareersaataapput, assersuutigalugu ingerlatsinermi teknikerimut imaluunniit ilinniartitsisumut. Ilinniartitaanerillu allat qulequttani suliatigut ilisimasaqalernissannut siunertaqarlutik, assersuutigalugu inuiaqatigiilerinermi, oqaatsit pillugit imaluunniit ingeniørinngorniarnermi. Taamatuttaaq sivisussutsit assigiinngitsorujussuupput: Ilinniakkat ilaat ukiunik marlunnik sivisussuseqartarput ilaallu ukiunik arfinilinnik sivisussuseqartarlutik.

Ingerlaqqiffiusumik ilinniartitaanerit pillugit paasissutissat allat uani atuarsinnaavatit.

 

Danmarkimi ilinnialernissamut qinnuteqarusukkuit Kalaallit Illuinut saaffiginnissaatit. Taakkunanilu ilinnialernissamik akuerisaanissamut piumasaqaatit qinnuteqarfissatullu killiliussat killigititai pillugit, ilinniagaqarnermut siunnersuisartunit ilinnut paasissutissiissutigisinnaavaat.

 

Danmarkimi Kalaallit Illui

København (nunat tamani ilinniarnissamut siunnersuineq)
www.sumut.dk

Odense
www.dgh-odense.dk

Aarhus
www.groenlandskehus.dk

Aalborg
dgh-aalborg.dk

Ilinniartitaanermut, Kultureqarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikin@nanoq.gl
Nittartagaq: www.naalakkersuisut.gl
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.