Inatsisartunut aamma kommunalbestyrelsimut qinersisitsisoqarnerani allakkatigut taasineq

Inatsisartunut kommunalbestyrelsimullu qinersisitsisoqarnerani allakkatigut taasineq
Nalinginnaasumik pisoqartillugu nammineq ornigunnikkut taasineq ingerlanneqartussaavoq. Namminerli ornigussinnaanngikkuit – imaluunniit taasivimmut taamaallaat ajornartorsiorujussuarlutit – ullormi qinersiviusumi ornigussinnaallutit allakkatigut taasinissamut periarfissaqarputit. Tassa imaappoq, ulloq qinersivissaq nallertinnagu ataani allanneqartut taasivissat ilaannut ataatsimut taasiartorsinnaavutit, tassanngaanniit illit kommuninnut taasissutit nassiunneqarumaarluni.

Ataatsimoorussamik nunaqarfinni aqutsisunut kiisalu ilagiit sinniisaannut qinersinermut allakkatigut aamma taasinissamut periarfissaqarputit.

Malugiuk
Allakkatigut taasissut taasiartorfimmut qinersisartup qinersisinnaasut allattorsimaffianni nalunaarsorsimaffigisaanut ulloq qinersiffiusoq naatinnagu tiguneqareersimassaaq, imaappoq Inatsisartunut qinersinermi nal. 20.00 nallertinnagu kommunalbestyrelsimullu qinersinermi aprilimi marlunngornermi siullermi nal. 20.00 nallertinnagu. Taamaattumik piffissaalluartillugu allakkatigut taasisoqassasoq inassutigineqarpoq. Qinersinerup naannginnerani allakkatigut taasinerup qinersivimmut piffissaagallartillugu tunniutereerneqarnissaa illit nammineerlutit akisussaaffigaat.

Taasiviit
Sumi taasisinnaaninnut sumiinnerit apeqqutaassaaq:
• Napparsimmavimmi imaluunniit allatut peqqissaavimmi paaqqutarineqarnermilu uninngaguit, napparsimmavimmi imaluunniit peqqissaavimmi paaqqutarineqarfimmilu taasisinnaavutit
• Kalaallit Nunaanni pinerluuteqarsimasunut isumaginnittoqarfiup ataaniittumi isertitsivimmi inissinneqarsimaguit, isertitsivimmi taasisinnaavutit
• Sumiiffimmi avinngarusimasumi, namminerisaminik taasiveqanngitsumi, najugaqaruit, inummi qinersinermut siulersuisut toqqarsimasaanni taasisinnaavutit
• Timmisartoqarfimmi, silasiorfimmi assigisaaniluunniit kommunit aggornerisa avataanni inissisimaguit, inummi qinersinermut ataatsimiititaliap piginnaatitaani taasisinnaavutit
• Naalagaaffiup ilaani inissisimaguit (Danmarkimi Savalimmiuniluunniit) inuit allattorsimaffianni imaluunniit inummi qinersinermut ataatsimiititaliap piginnaatitaani taasisinnaavutit
• Naalagaaffiup avataani inissisimaguit (Kalaallit Nunaat, Danmark aamma Savalimmiut) danskit aallartitaqarfianni imaluunniit sinniisoqarfianni taasisinnaavutit
• Umiarsuarmi Kalaallit Nunaanni angerlarsimaffeqartumi issimaguit, angallatip naalagaani imaluunniit inummi angallatip naalagaata toqqagaani taasisinnaavutit

Taasineq
Inatsisartunut qinersinermut allakkatigut taasinerit sapaatit akunneri arfinillit qinersinissaq sioqqullugu pisinnaavoq. Kommunalbestyrelsimut qinersinermut allakkatigut taasineq ukiumi qinersiffiusumi siusinnerpaamik januaarip aallaqqaataani pisinnaavoq.
Qulaani taaneqartut ilaanni taasivimmi taasinernik tigooqqaasussamut saaffiginnikkuit, ilinnut tunniunneqassapput
• taasivissaq ataaseq
• allakkat puuat ataaseq
• allakkanik nassitsissutitalik ataaseq
• aamma ungaluusartalik ataaseq

Taasivissami qinigassanngortittoq partiiluunniit, Inatsisartunut imaluunniit kommunalbestyrelsimut qinerneqartussatut kissaatigisat allassavat.

Taasereeruit allakkanik nassitsissutitalik immersussavat. Taanna imaqassaaq:
• Taanna uppernarsaataavoq allaniit isigineqarnak illit nammineerlutit taasivissaq immersorit, allakkat puuannut ikillugu taannalu matullugu. Ullormi taasiviusumi taasivissamut ornigussinnaanngitsutit imaluunniit taamaallaat ajornartorsiorujussuarlutit ornigussinnaasutit, inatsisit malillugit aamma uppernarsassavat. Taasinernik tigooqqaasussaq isigisaanik allakkanik nassitsissutitalik atsiussavat. Allakkanik nassitsissutitalik aamma atsiornivit ullua kiisalu atitit tamaasa, ulloq inuuiit, atorfiit aamma najukkat allassavatit
• Taasinernik tigooqqaasussamit uppernarsaat atsiorneqartoq

Allakkat puuat taasissummik imaqartoq aamma allakkanik nassitsissutitalik ungaluusartalimmut ikineqassapput matuneqarlunilu, kommunimullu qinersisinnaasut allattorsimaffianni qinersisartup allanneqarfigisaanut nassiunneqarluni. Ungaluusartallip tunuanut illit atit najukkallu allanneqassapput. Illit kommunerisannut ullormi taasiviusumi taasinerup naannginnerani, taasinernik tigooqqaasussamit tamarmik nassiunneqassapput.