Inatsisartunut aamma kommunalbestyrelsinut qinersineq

Inatsisartunut aamma kommunimut qinersinerni sinniisuusussat, inatsisartuni aamma kommunalbestyrelsini sinnerlutik aalajangiinernik ingerlatsisartussatut kissaatigisatik innuttaaasut qinertussaavaat.

Taamatuttaaq kommunit ataanni nunaqarfinni aqutsisunut aamma ilagiit sinniisaannut qinersinerit ingerlanneqartarput. Kommunit aggorsimanerisa avataanni, Pituffimmi innuttaasut siunnersuisoqatigiivinut qinersisoqartarpoq.

Qinersinermut ataatsimiititaliaq
Inatsisartunut qinersineq Qinersinermut ataatsimiititaliamit pingaarnertut aqutsivigineqartarpoq, taanna inuttaqartinneqarpoq Namminersorlutik Oqartussat Naalakkersuisut siulittaasuata naalakkersuisoqarfiata pisortaanit, KANUKOKA-p pisortaanit kiisalu Kalaallit Nunaanni ilagiit biskop-iannit. Qinersinermut ataatsimiititaliaq qinersinermut allattaavimmut allattuisussaavoq, tassani qinersinermut pingaaruteqartut assigiinngitsut, assersuutigalugu qinigassanngortittut, partiit aamma qinersinermik nalunaarusiorneq allattorneqassallutik.

Kommunimut qinersineq kommunip Qinersinermik siulersuisuinit pingaarnertut aqutsivigineqartarpoq, taanna inuttaqartinneqarpoq Borgmesteri, qinersinermut siulersuisunut siulittaasuusoq aamma kommunalbestyrelsimi ilaasortat ikinnerpaamik marluk. Qinersinermut ataatsimiititaliaq qinersinermut allattaavimmut allattuisussaavoq, tassani qinersinermut pingaaruteqartut assigiinngitsut, assersuutigalugu qinigassanngortittut, partiit aamma qinersinermik nalunaarusiorneq allattorneqassallutik.

Qinersinermi siulersuisut aamma qinersivimmi siulersuisoq
Kommunini tamani qinersineq qinersinermut siulersuisunit piareersarneqarlunilu aqunneqassaaq. Qinersinermi siulersuisut inuttaraat
• Borgmesteri, qinersinermut siulersuisunut siulittaasuusoq
• Aamma kommunalbestyrelsimi ilaasortat ikinnerpaamik marluk kommunalbestyrelsimit qinerneqarsimasut

Qinersinermut siulersuisut taasiartortarfinni tamani taaguinermut siulersuisumik toqqaassapput – inuk taasisinnaatitaasoq taasivimmi pineqartumi taaguinermik siulersuisoq – immaqalu qinersinermi qinersisartut ikiuuttussat aalajangersimasumik amerlassusillit.

Inatsisartunut qinersineq
Inatsisartunut ilaasortat piffissamut ukiunik sisamanik sivisussusilimmut qinerneqartarput. Qinigaaffiup sivisussusia ullormit qinersiviusumit naatsorsorneqartarpoq. Sioqqutsisumik qinersisoqarnissaa nalunaarutigineqarsinnavoq. Naalakkersuisut siulittaasuat tassaavoq qinersinissamik aammalu ullumik qinersivissamik nalunaaruteqartartoq.

Inatsisartut 31-nik ilaasortaqarput.

Kalaallit Nunaat qinersiviusoq ataasiuvoq. Tassa imaappoq qinigassanngortittut tamarmik Kalaallit Nunaat tamakkerlugu qinigassanngortittarput.

Kommunalbestyrelsimut qinersineq
Kommunalbestyrelsimut ilaasortat piffissamut ukiunik sisamanik sivissusulimmut qinerneqartarput. Qinigaaffik maj-ip aallaqqaataaniit naatsorsorneqartarpoq taasinerlu april-imi marlunngornermi siullermi ingerlanneqartarpoq. Nunaqarfinni aqutsisunut aamma ataatsimoorussamik nunaqarfinni aqutsisunut qinersinissamut kommunalbestyrelsi ulluliisarput.

Kommunalbestyrelsini ilaasortat ukunani ima amerlatigaat:
• Avannaata Kommunia: kommunalbestyrelsimi ilaasortat 17-it
• Kommune Qeqertalik: kommunalbestyrelsimi ilaasortat 15-it
• Qeqqata Kommunia: kommunalbestyrelsimi ilaasortat 15-init
• Kommuneqarfik Sermersooq: kommunalbestyrelsimi ilaasortat 19-it
• Kommune Kujalleq: kommunalbestyrelsimi ilaasortat 15-init

Kommunit immikkut tamarmik qinersiviupput. Tassa imaappoq qinigassanngortittut tamarmik kommune tamakkerlugu qinigassanngortittarput.

Paasissutissat annertunerusut
Qinersinermut tunngasunik paasissutissanik annertunerusunik Namminersorlutik Oqartussat nittartagaanni nassaarsinnaavutit – www.naalakkersuisut.gl – Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfiata ataani.