sullissivik.gl pillugu

sullissivik.gl pillugu
sullissivik.gl tassaavoq oqartussat ataatsimoorussamik Nunatsinni innuttaasunut suliffeqarfiutilinnullu nittartagaat.
Tamanna ima isumaqarpoq pisortaqarfiit soorlu kommunit, Namminersorlutik Oqartussat, taavalu suliffeqarfiit pisortanit pigineqartut tamarmik sullissivik.gl-imi imarisaateqarlutillu imminut sullississutaateqarsinnaapput, taakkulu tamarmik Nunatsinni innuttaasunut suliffeqarfiutilinnullu pilersitaallutik.

Nittartagaq sullissivik.gl Digitalimik Sullissinermut Aqutsisoqarfimmit ingerlanneqarpoq, teknikkikkullu isumagineqarluni.
Oqartussat sullissivik.gl-imi paasissutissaatiminnik taavalu digitaliusunik imminut sullississutaatiminnik nassitsisuullutillu piginnittuupput.

sullissivik.gl illu pisortanit attartorneqartunik ”inissiartalimmut” assersuunneqarsinnaavoq, innuttaasunut suliffeqarfiutilinnullu isumannaatsumik pissarsiariuminartunillu paasissutissiivittut atorneqartumik.

sullissivik.gl-ip imarisai marluk pingaarnerit
sullissivik.gl pingaarnertut marlunnik imaqarpoq:

  • Imarisat allatat qinnuteqaammi/noqqaassummi/nalunaarummi il.il qanoq suliap ingerlanneqartarnera aallartinneraniit naammassinissaata tungaanut innuttaasunut paasiuminartumik nassuiaanertallit
  • Imminut sullississutit digitaliusut

Innuttaasunut suliffeqarfiutilinnullu sullissivik.gl-ip atortarnerata qanoq isumaqarnera
Imarisat:
Oqartussat Nunatsinni innuttaasut suliffeqarfiutillillu paasissutissanik pisariaqartitaannik paasissutissaateqarput.
Pisussaaffiit pisinnaatitaaffiillu pillugit paasissutissat taakku qassinngoraluarpalluunniit atuarsinnaavaat; nunaqarfimmiikkaluarunik illoqarfimmiikkaluarunilluunniit.

Imminut sullississutit:
sullissivik.gl-imi innuttaasut suliffeqarfiutillilluunniit imminut sullississutit iserfigisinnaavaat, taamaasillutillu pisortani isumagisassatik qassinngoraluarpalluunniit isumagisinnaallugit; nunaqarfimmiikkaluarunik illoqarfimmiikkaluarunilluunniit.

Oqartussaasunut sullissivik.gl-imi imarisaateqarnerisa imminullu sullississutaateqarnerisa qanoq isumaqarnera
Oqartussat sullissivik.gl-imi imarisaatiminni sullissivik.gl-ip allannermi maleruaqqusai taavalu imarisap allannerani immersugassat atorunikkit, innuttaasunut suliffeqarfiutilinnullu pisussaaffiit pisinnaatitaaffiillu pillugit tamakkiisumik paasinartumik nassuiaateqarfiginissai oqartussat qulakkiissavaat. Taamaasillutik oqartussat qulakkiissavaat innuttaasut suliffeqarfiutillillu paatsuungassuteqaratik paasissutissat pisariaqartitatik paasissavaat.

Oqartussat sullissivik.gl-imi imminut sullississutaateqarnerminni qassinngoraluarpalluunniit innuttaasut suliffeqarfiutillillu digitaliusumik sullissinnaaneri qulakkiissavaat. Pisortanut ima isumaqarpoq innuttaasut suliffeqarfiutillillu sullinneri qarasaasiakkut ilaatigut tamakkiisumilluunniit ingerlanneqarsinnaalernissaa. Taamaasilluni takkullutik saaffiginnittartut ikilisinnaapput, innuttaasut suliffeqarfiutillillu attaveqaatitigut imminut sullittartut amerlatsippata.

sullissivik.gl-imi imarisap allalluakkap imminullu sullississutip digitaliusup atoruminartup assigeequtigaat pisortanut saaffiginnissutit ikinnerulersinnissaat, taamaasilluni sulisut suliassaminnut allanut piffissatornarnerusunut isumaginninnissaminnut piffissaqarnerulissammata.

 

Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.