airplanebooksbriefcase business cogs cross election entertainment fish house law lockmedicalpeopleselfservices socialtax

Suliniut ’Uannut Tunngasut’

Digitalimik Sullissinermut Aqutsisoqarfiup Digitalikkut Attaveqaqatigiinnermut immikkoortortaqarfia sullissivik.gl-imi suliniummik nutaamik suliaqarluni aallartippoq. Suliniutip suliarineqarnera ’Uannut Tunngasut’-mik taaguuteqarpoq.

Suliniut Uannut Tunngasut sunaava?
Sullissivik.gl-imi Uannut Tunngasut nammineq atorsinnaassavat illillu kisivit iserfigisinnaassallugu. Paasissutissat ilinnut tunngasut pisortanit pigineqartut Uannut Tunngasut aqqutigalugit takunissaannut periarfissaqassaatit. NemID pigisat atorlugu isersinnaassaatit.

Uannut Tunngasut paasissutissanik assersuutigalugu makkuninnga imaqarsinnaapput:
  • Inuup normua
  • Najugaq
  • Meeqqatit (meeqqerivimmut atuarfimmullu tunngasut il.il.)
  • Pisortanut akiitsut
  • Ilinniagaqarsimanermut uppernarsaatit
  • Kuisinnermut allagartat

Aammattaaq imminut sullinnissamut aaqqiissutit attuumassuteqartut atornissaannut periarfissaqassaatit. Tamakku ullumikkut atorneqarnissaat periarfissaavoq, taamaattoq Uannut Tunngasut-ni allaanerusumik isikkoqassallutik.

Suliniutip Uannut Tunngasut siunertarivaa paasissutissat ilinnut tunngasut pissarsiariuminarnerulernissaannut ilinnullu atoruminarnerulernissaat, taamaasilluni illit innuttaasutut pisortanut attaveqartarnerit pisariillisillugu.

Assersuutigalugu:
  • Attaveqaatitigut toqqaannartumik digitalikkut qinnuteqarnialeraangavit paasissutissat ilinnut tunngasut allaqqareertassapput, paasissutissallu ataasiaannarlutit pisortanut tunniutereernikuugakkit taakku immersoqqittariaarutissavatit.
  • Uppernarsaatit assigiinngitsut pissarsiarinissaannut pisortanut arlalinnut saaffiginneqattaartariaarutissaatit, pissutigalugu tamakku tamarmik Uannut Tunngasut-niilissammata.
  • Uppernarsaatit ilinnut tunngasut tamarmik Uannut Tunngasut-ni ataatsimoortinneqassapput. Taamaalillutit pappiliaativit pisariaqartilerneri tamaasa, tunuleriiaani utaqqeqqaartariaarullutit asulersuarluunniit ujarlertariaarullutit piffissaq nukissatillu sipaartalissavatit.

Uannut Tunngasut suunersoq ersarissarniarlugu, illit qaqugukkut pisariaqartitassanerit takorloorlugu, pisunik assigiinngitsunik ima assersuusiorpugut:
  • Ingerlariaqqiffiusumik ilinniarnissamut qinnuteqarniarputit. Kuisinnermut allagartat, GUX-imit karakteritit, najugaqarnermut uppernarsaatit assigisaallu Uannut Tunngasut-niissapput qinnuteqaatinnullu ilanngunneqariissallutik.
  • NemID-it atorlugu iseriarlutit pisortanut akiitsutit takusinnaassavatit.
  • Maannakkut qanoq isertitaqarnerlutit takusinnaassavat, taamaalillutillu ineqarnermut tapiissutisinissamut meeqqanulluunniit tapiissutisinissamut pisinnaatitaanerlutit takusinnaallugu.
  • Piniarnermut allagartat nutartertariaqalerpat, pisatit nalunaarutigisinnaanngoraangakkit il. il. eqqaasinneqartassaatit.

Suliniummut Uannut Tunngasut-mut peqataanissavit siunertaa
Digitalimik Sullissinermut Aqutsisoqarfiup Uannut Tunngasut-nut suut ilanngutsikkusunneritit paaserusunneqarpoq. Paasiniaanitsinni illit inuillu allat tallimat arfinillilluunniit apersussavagut. Atuisut immikkut toqqakkat ataatsimoorlusi suliniummut killilimmik piffissalikkamik ingerlanneqartussamut ilaatinneqassaasi. Ataasiakkaarlusi immikkut apersorneqassaasi, ilissilu siunnersuutitut taakkartukkasi ataatsimoortinneqassapput, Uannut Tunngasut-nut siunnersuutitut saqqummiunneqassallutik. Siunnersuutitut saqqummiunneqartut oqaaseqarfigisinnaajumaarpasi. Taamaammat apersorneqarlutit peqataanerit immikkoortunut arlalinnut avinneqassaaq.

Suliniummut peqataanissamut suut ilinnut piumasarineqarpat?
  1. Katillugit pingasoriarlutit sisamariarlutilluunniit qanimut apersorneqarlutit peqataassaatit:
    Septembarimi pingasorianngikkutta sisamariarluta oqaloqatiginissat pisariaqartissavarput. Oqaloqatigiinneq siulleq nalunaaquttap akunneri marluk missaanni sivisussuseqassaaq, sinnerilu nalunaaquttap akunnerata ataatsip missaani sivisussuseqassallutik.

  2. Piumasaqaatit:
    • Siunnersuuterpassuaqarlutit Uannut Tunngasut pillugu takorluukkatit saqqummiutissagitit naatsorsuutigaarput
    • Sullissivik.gl-imik imminullu sullinnermi aaqqiissutaasunik atuisuussaatit
    • Internetsikkut attaveqaateqassaatit Skypersinnaallutillu. Nuummi najugaqaruit Digitalimik Sullissinermut Aqutsisoqarfimmi apersorneqarnitit ingerlatissavagut

  3. Peqataanerit nammineq kajumissutsinnik pissaaq taamaattumillu akissarsissutiginaviarnagu. Kalaallit Nunaanni digitalimik ineriartortitsineq pissanganartutut isumaqarfiginera tunngavigalugu peqataassaatit. Sullissivik.gl-ip sunniuteqarfigeqataanissaanut periarfissaqarputit.

  4. Apersuereernitta kingorna nalunaarusiulerutta paasissutissat ilinnut tunngasut atortussaavagut. ’Paasissutissat ilinnut tunngasut’ tassaapput link-ip toorneratigut internetsikkut immersuiffissami immersuileruit allattugassatit. Paasissutissat ilinnut tunngasut avammut saqqummiunneqarunnanngillat. Imaappoq aqqit atornavianngilarput, paasissutissalli allat ilinnut tunngasut atorumaarlutigit, assersuutigalugu ukiutit, suminngaanneernerit ilaqutariinnullu paasissutissat assigisaalu.

  5. Internetsikkut immersuiffissaq immersoreerukku qinnuigissavatsigit mailit akulikitsumik takusassagit, apersorneqarnissannut ulluliussat piffissaliussallu pillugit ilisimatitsillluta mailimik nassitsisussaagatta.

Peqataarusuppit? Internetsikkut immersuiffissaq immersorsinnaavat ugguuna

E-mailikkut sapaatip-akunnera 38 &39-mi attavigiumaarpatsigit – internetsikkut immersuiffissamik immersuisut tamaasa attavigiumaarpagut.

Inussiarnersumik inuulluaqqusilluta
Suliniut Uannut Tunngasut