Zoonoser-imik nalunaarutiginninneq (nappaat perlerorneq)

Kalaallit Nunaanni teriannissat akornanni perlerortoqartarpoq. Taakkunaniillu annerusumik uumasuutit inuillu tunillanneqarsinnaallutik.

Ilitsersuut perlerunnermut akiuutissamik kapisisarneq Illit uumasuutitit - illit akisussaaffitit


Perlerornerup ilisarnaatai
Uumasuutit illumiutaq perlerortutut isigineqassaaq makku ilaat ataaseq arlallilluunniit uumasuummi ilisarnaatitut malugineqarsinnaappata:

• Qappiorneq
• Nipaata allanngornera
• Iisiniapiloortarneq
• Toqqissisimannginneq
• Pissusilersornerata pissusissamisuunnginnera, soorlu piviusuusaartitamik kiiseriaqattaarneq
• Nujoqqunneq (nujualerneq), paatseveqanngitsumik pissusilersorneq
• Soqqusaatsuliorneq sorususseqannginnermik akunnilerneqartartoq
• Saassusserusunneq kiisalu pingaartumik alleruisa kingulliivisalu tamakkiisumik ilaannakuusumilluunniit nukillaarnerat

Uumasuut nujuartatut uumasuusoq perlerortutut isigineqassaaq uumasuut pissusissamisuunngitsumik pissusilersorpat, soorlu pisarnermit nujuinneruppat, paatsiveqanngitsumik pissusilersorpat ilaatigut saassussiniarnermik nipillu allanngorneranik ilaqartumik pissuseqarpat. Terianniaq nujuanngitsoq pissusissamisuunngitsumillu iliuuseqartoq tamatigungajak perlerortuusarpoq.


Perlerornermik nappaalasoqarneranut pasisaqarnermi qanoq iliornissaq
Uumasut taakku ungasissumiitinnissaat pingaarpoq, uumasullu taakku, Inuussutissalerinermut Immikkoortortaqarfik isumasioreerlugu, piaarnerpaamik toqunneqassallutik. Aallaammik toqutsinermi uumasup niaqua sapinngisamik innarlerneqassanngilaq. Niaqua Inuussutissalerinermut Immikkoortortaqarfik isumaqatigiissuteqarfigalugu misissugassanngorlugu nassiunneqassammat.

Perlerortoq isumatusaartumik passunneqassaaq. Imaassinnaavoq misissugassanngorlugu nassiunneqartussanngortoq. Misissugassamik tigusinissaq nassiussinissamullu najoqqutassat pillugit Inuussutissalerinermut Immikkoortortaqarfik piareersaassaaq.

Kiineqaruit inulluunniit alla kiineqarsimappat ingerlaannartumik kiggeq qaqorsaammik salinneqassaaq, piaarnerpaamillu napparsimavimmut saaffiginnissaatit.


Nalunaarutiginninneq
Perlerortoqarneranik pasinnikkuit pasitsaassaqaruit uumasut nakorsaanut, politiinut imaluunniit kommunefogede-mut nalunaarutiginnissaatit. Pisortallu nalunaarutiginninneq Inuussutissalerinermut Immikkoortortaqarfimmut ingerlatissavaat, tassanngaanniillu qanoq ingerlariaqqinnissaq isummerfigineqassalluni.

Tunngavissaqartumik pasisaqarnermi uumasoq toqunneqassaaq, misissugassamillu nassiussisoqassanersoq Inuussutissalerinermut Immikkoortortaqarfik isummissalluni.

• Laboratoriami misissugassamik nassiussinissaq sumiiffimmi nakorsaanermit isumagineqassaaq
• Kommunalbestyrelse-p Inuussutissalerinermut Immikkoortortaqarfik politiillu isumasioqatigalugit nunap ilaanik matusigallartoqassanersoq isummerfigissavaat
• Perlerortoqarneranik paasisaqartoqarpat Inuussutissalerinermut Immikkoortortaqarfimmit sumiiffimmi kommune, napparsimavik aamma politiit nalunaarfigineqassapput
• Inuussutissalerinermut Immikkoortortaqarfimmit ilitsersuussisoqarneratigut sumiiffimmi qanoq iliornissamut allagartanik kommune ikkussuissaaq
• Allagartaq peerneqassaaq ullut 30-it qaangiunneranni, uumasut tamarmik akiuussutissamik kapitinneqarsimappata aamma uumasunik perlerornermik nappaateqartoqarneranik pasinnittoqanngippat

Malugiuk
Pisortani Ilulissani Inuussutissalerinermut Immikkoortortaqarfik tassaavoq perlerornermut tunngatillugu sulianik ingerlatsisuusoq.

Perlerornermut nappaateqarsorisamik misissugassamik nassiussiguit Inuussutissalerinermut Immikkoortortaqarfik nalunaarfigeqqaarnagu, nassiussinermut aningaasartuutit nammineq akilissavatit.