Suliami ilaqutariinnermut tunngasumi suliareqqitassanngortitsissummut akissuteqaat nassiuguk

Suliareqqitassanngortitsissummut akissuteqaat tassaavoq allakkiaq, suliami ilaqutariinnermut tunngasumi illuatungerisavit eqqartuussisoqarfiup imal. Kalaallit Nunaanni Eqqartuussiviup eqqartuussutaa maalaarutigisimappagu maalaarutaanut akissuteqaleruit atugassat.

Eqqartuussummik maalaaruteqarneq taamaattoq suliareqqitassanngortitsinermik taaneqartarpoq, allakkiarlu illuatungerisavit suliareqqitassanngortitsinermini atorsimasaa suliareqqitassanngortitsissummik taaneqartarpoq.

Suliaq ilaqutariinnermut tunngasoq makkununnga tunngassuteqarsinnaavoq:

• avinneq
• averuserneq
• angajoqqaatut oqartussaassuseq
• meeqqap sumi najugaqarnissaa imaluunniit
• meeqqamik najorteqartarneq

Eqqartuussisoqarfiup imal. Kalaallit Nunaanni Eqqartuussiviup suliaq naqinneq Æ aallarniutigalugu normulersimappagu taava suliaq ilaqutariinnermut tunngasuusimassaaq.

Suliat suut eqqartuussivinni suliarineqartarnerat pillugu uani paasisaqarnerusinnaavutit www.eqqartuussivik.gl

Eqqartuussisoqarfiup imal. Kalaallit Nunaanni Eqqartuussiviup eqqartuussutai Nunatta Eqqartuussisuuneqarfianut suliareqqitassanngortinneqartarput.

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Kalaallit Nunaanni Eqqartuussiviup inerniliisimanera isumaqatigigukku akissuteqaammik nassiussisariaqanngilatit.

Kalaallit Nunaanni Eqqartuussiviup inerniliisimanera isumaqatiginngikkukku akissuteqaammik nassiussaqassaatit, tassanilu allaaserissavat suliaq Nunatta Eqqartuussisuuneqarfiani qanoq inerneqartikkusunnerlugu.

Suliap inernissaa pillugu kissaatit piumasaqaammik taaneqartarpoq. Suliareqqitassanngortitsissummut akissuteqaatit piumasaqaatinnik imalik Nunatta Eqqartuussisuuneqarfiata piffissaliussaa qaangiutsinnagu tiguneqareersimassaaq.

Suliareqqitassanngortitsissummut akissuteqaatit tiguneqarsimanngippat Nunatta Eqqartuussisuuneqarfiata naatsorsuutigissavaa Kalaallit Nunaanni Eqqartuussiviup inerniliussaa isumaqataaffigigit.

Kalaallit Nunaanni Eqqartuussiviup eqqartuussutaata allanngortinneqarnissaanik akissuteqarnissamut piffissaliussaq qaangiutereersoq piumasaqaateqassaguit Nunatta Eqqartuussisuuneqarfia akuersiteqqaassavat.

Akissuteqarnermi piumasaqaatit
Suliareqqitassanngortitsissummut akissuteqaammut piumasaqaatit eqqartuussisarnermik inatsimmi aalajangersarneqarnikuupput. Immersugassaq quppernerup matuma qulaaniittoq atorukku ajunngitsumillu immersorsimagukku piumasaqaatit eqqartuussisarnermik inatsimmiittut eqqortissavatit.

Suliareqqitassanngortitsissummut akissuteqaativit eqqortumik allannissaa uppernarsaatinillu tulluartunik eqqartuussisunut saqqummiussaqarnissat pingaaruteqarpoq.

Suliani ilaqutariinnut tunngasuni eqqartuussivimmut akitsuummik akiliissanngilatit.

Ilaqutariinnermut tunngasumi suliareqqitassanngortitsissummut akissuteqaat nassiussinnaavat internetikkut immersugassaq atorlugu.

Tuugassaq sungaartoq, allakkat uku qulaatungaanniittoq, ”Suliami ilaqutariinnermut tunngasumi suliareqqitassanngortitsissummut akissuteqaat” toorlugu immersugassaq takusinnaavat. Immersugassaq immersulerukku NemID atussavat.

Immersugassaq iserfigigukku immersuinissannik ilitsersorneqassaatit.

Maluginiaruk
Ilanngussat, eqqartuussisoqarfiup imal. Kalaallit Nunaanni Eqqartuussiviup suliamik suliaqarnerani atorneqarsimasut, nassiutissanngilatit. Taakku Nunatta Eqqartuussisuuneqarfianut eqqartuussivimmiit tunniunneqassapput.

Ilanngussanik nutaanik saqqummiussaqarusukkuit taakku akissuteqaatinnut ilanngullugit nassiutissavatit.

Immersugassaq immersoreerukku ”nassiuguk” tuussavat. Taava akissuteqaatit Nunatta Eqqartuussisuuneqarfianut nassiunneqassaaq.

Nunatta Eqqartuussisuuneqarfiata suliareqqitassanngortitsissut illuatungeriit aappaaniit tiguguniuk suliami illuatungiusumut nassiutissavaa.

Suliami ilaqutariinnermut tunngasumi akuusimaguit illuatungerisavillu eqqartuussisoqarfiup imal. Kalaallit Nunaanni Eqqartuussiviup eqqartuussutaa suliareqqitassanngortissimappagu Eqqartuussisuuneqarfimmiit attaveqarfigineqassaatit.

Suliareqqitassanngortitsissut, illuatungerisavit Nunatta Eqqartuussisuuneqarfianut nassiussimasaa ilinnut nassiunneqassaaq, akissuteqarnissanullu piffissaliivigineqassaatit. Akissuteqaatit taanna suliareqqitassanngortitsissummut akissuteqaammik taaneqartarpoq.

Piareersaataasumik eqqartuussineq
Nunatta Eqqartuussisuuneqarfiata suliareqqitassanngortitsissut tigusimaleruniuk aallarnisaataasumik eqqartuussinermut illuatungerisallu aggersassavaasi.

Tamanna piareersaataasumik eqqartuussinermik taaneqartarpoq.

Piareersaataasumik eqqartuussinermi makku paasinarsarneqassapput:

• Illuatungeriit suliaq qanoq inerneqartikkusunneraat (piumasaqaatit)
• Illuatungeriit isumaqatigiissinnaanersut
• Paasissutissanik allanik piniarnissaq pisariaqarnersoq
• Qaqugu inaarutaasumik eqqartuussisoqassanersoq
• Inaarutaasumik eqqartuussinermi videokkut peqataasoqassanersoq
• Illuatungeriit apeqqutigisinnaasaat

Piareersaataasumik eqqartuussinermi immikkut pingaaruteqarpoq paasiniassallugu angajoqqaat isumaqatigiissinnaanersut, suliami ilanngussanik allanik piniartoqassanersoq aamma suliaq qaqugu inaarutaasumik eqqartuussutigineqassanersoq.

Ilanngussanik allanik piniartoqassappat kiap taakku piniassanerai aamma isumaqatigiissutigineqassaaq.

Angajoqqaat meeqqat qanoq inneri pillugit piareersaataasumik eqqartuussinermi nassuiaateqassanngillat. Aatsaat inaarutaasumik eqqartuussisoqarnerani nassuiaateqartoqassaaq.

Angajoqqaat isumaqatigiippata
Angajoqqaat suliami suliareqqitassanngortinneqartumi akerleriissutaasut eqqartuussuteqartoqartinnagu isumaqatigiissutigippatigit Nunatta Eqqartuussisuuneqarfiata suliaq inaarsassavaa.

Eqqartuussutissamik isumaqatigiinniuteqarneq
Angajoqqaat isumaqatigiissinnaanngikkunik, piareersaataasumik eqqartuussinermi, eqqartuussutissamik isumaqatigiinniuteqarnermi nassuiaateqaqqinnissaminnut periarfissaqassapput.

Ilanngussat suliap siullermik suliarineqarnerani saqqummiunneqarsimasut Nunatta Eqqartuussisuuneqarfiata pigivai, taamaattumillu siornatigut nassuiaataasimasut ilisimavai.

Eqqartuussummik isumaqatigiinniuteqarnermi salliutillugit saqqummiunneqartussaapput ilanngussat nutaat kiisalu eqqartuussisoqarfiup imal. Kalaallit Nunaanni Eqqartuussiviup eqqartuussuteqarnerata kingorna susoqarsimanera pillugu paasissutissat.

Eqqartuussutissamik isumaqatigiinniuteqarneq – qaqugu
Eqqartuussisoqarfik eqqartuussummik suliareqqitassanngortinneqartumik eqqartuussuteqartuussimappat nunap eqqartuussisuunera tullersortaaluunniit suliareqqitassanngortitsinermi eqqartuussuteqartuussaaq.

Kalaallit Nunaanni Eqqartuussivik eqqartuussummik suliareqqitassanngortitamik eqqartuussuteqartuusimappat nunap eqqartuussisuunera eqqartuussisuunerillu marluk Danmarkimeersut eqqartuussisuussapput.

Eqqartuussisuuneqarfik sulianik taamaattunik suliaqarnissamut ukiut tamaasa marloriarluni piffissaliisarpoq.
Suliaq eqqartuussutigineqarnissaminut piareerpat eqqartuussutissamik angajoqqaat ilisimatinneqassapput isumaqatigiinniuteqarnissamut periarfissaq siullerpaaq pillugu.

Eqqartuussutissamik isumaqatigiinniuteqarnissamut piareernermiit isumaqatigiinniuteqavinnissamut qaammatit pingasuniit arfinilinnut ingerlakkajuttarput.

Nunatta Eqqartuussisuuneqarfiata eqqartuussutaa
Nunatta Eqqartuussisuuneqarfiata eqqartuussutini allanneqareeraangat aatsaat nalunaarutigisarpaa. Taamaattumik eqqartuussut aatsaat allanneqareerpat Nunatta Eqqartuussisuuneqarfiata aalajangiineranik angajoqqaat paasitinneqassapput.

Eqqartuussutissamik isumaqatigiinniuteqarnerup naalernerani angajoqqaat paasitinneqassapput eqqartuussut qaqugu nassiunneqassasoq.

Eqqartuussut amerlanertigut nassiunneqartarpoq isumaqatigiinniuteqarnermiit sap. akunnerata ataatsip ingerlanerani.

Eqqartuussut nalunaarutigineqareeraangat eqqartuussiviup eqqartuussuteqartuusup tunngavilersuut inerniliinerlu allanngortissinnaanngilai. Eqqartuussut taamaallaat eqqartuussivimmit qulliunerusumit allanngortinneqarsinnaavoq.

Eqqartuussummi kukkulluni allattoqarsimappat eqqartuussiviup eqqartuussuteqartup kukkuneq paasineqarniariarpat iluarsissavaa.

Suliareqqitassanngortitsissut Nunatta Eqqartuussisuuneqarfianit tigugukku paasitinneqassaatit akissuteqaatit qaqugu kingusinnerpaamik tunniutissagit.

Suliaq aallartinneqarpat pappiaqqanik tunniussinissamut piffissaliisoqassaaq. Aamma Nunatta Eqqartuussisuuneqarfiata eqqartuussinissat piffissaliivigisassavai.

Piffissaliussat eqqortinngikkukkit imaluunniit eqqartuussinernut takkutinngitsooruit Nunatta Eqqartuussisuuneqarfiata suliaq paasissutissat tigoriikkani tunngavigalugit aalajangiivigisinnaavaa.

Nunatta Eqqartuussisuuneqarfiata eqqartuussutai taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut suliareqqitassanngortinneqarsinnaapput. Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

• apeqqut Eqqartuussiviit Qullersaata siornatigut suliarinikuunngisaanut tunngappat, aamma
• aalajangiineq allanut, suliami illuatungeriinnuunnaanngitsoq, pingaaruteqarsinnaappat

Nunatta Eqqartuussisuuneqarfiata eqqartuussutaa Eqqartuussiviit Qullersaannut ingerlatikkusukkukku qinnuteqaatit uunga nassiutissavat: Nunatta Eqqartuussisuuneqarfia, postboks 1040, 3900 Nuuk imaluunniit Procesbevillingsnævnet Store Kongensgade 1-3, 2.,
1264 København K

Nunatta Eqqartuussisuuneqarfiata eqqartuussutaanik Eqqartuussiviit Qullersaannut suliareqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata eqqartuussuteqarneraniit sap. akunneri arfineq-pingasut qaangiunneranni. Qanga eqqartuussuteqarsimanera Nunatta Eqqartuussisuuneqarfiani eqqartuussutaani allaqqasarpoq.

Ingerlatitseqqiinissamik Aalajangiisartut nittartagaat takuuk (nutaami ammassaaq)

Kalaallit Nunaannut eqqartuussisarnermik inatsit nr. 305 ulloq 30/04/2008-meersoq (kingusinnerusukkut allannguutitalik)

Angajoqqaat akisussaanerat pillugu inatsisip Kalaallit Nunaanni atuutilersinneqarnera pillugu peqqussut nr. 680 ulloq 6. juni 2016-imeersoq

Aappariilertarneq aappariikkunnaartarnerlu pillugit inatsisip Kalaallit Nunaanni atuutilersinneqarnera pillugu peqqussut nr. 307 ulloq 14. maj 1993-imeersoq (kingusinnerusukkut allannguutitalik)