Saqitsaannermik suliami suliareqqitassanngortitsissummik nassiussigit

Suliareqqitassanngortitsissut tassaavoq allakkiaq, Kalaallit Nunaanni Eqqartuussiviup saqitsaannermik suliami eqqartuussutaanik maalaaruteqarniaruit atugassat.

Eqqartuussummik maalaaruteqarneq taamaattoq suliareqqitassanngortitsinermik taaneqartarpoq. Tassa Kalaallit Nunaanni Eqqartuussiviup eqqartuussutaa maalaarutigigukku eqqartuussut Nunatta Eqqartuussisuuneqarfianut suliareqqitassanngortippat.

Saqitsaannermik suliat tamarmik makkununnga tunngasuusarput:

• aningaasanik akileeqqusineq
• pigisamik tunniusseqqusineq imaluunniit
• piumasarisamik akuerseqqusineq

Kalaallit Nunaanni Eqqartuussiviup suliaq naqinnerit BS atorlugit normulersimappagu taava saqitsaannermik suliaasimassaaq.

Suliat suut eqqartuussivinni suliarineqartarnerat pillugu uani paasisaqarnerusinnaavutit www.eqqartuussivik.gl

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Piumasaqaatit eqqartuussivimmut saqqummiussimasat Kalaallit Nunaanni Eqqartuussiviup malissimanngippagu suliareqqitassanngortitsisinnaavutit.

Piumasaqaatilli Kalaallit Nunaanni Eqqartuussivimmit malinneqarsimappat suliareqqitassanngortitsisinnaanngilatit.

Suliareqqitassanngortitsinissamut piffissaliussap eqqartuussuteqarnermiit sap. akunnerinik sisamanik sivisussusillip iluani suliareqqitassanngortitsissaatit.

Kalaallit Nunaanni Eqqartuussiviup eqqartuussutaa suliareqqitassanngortitsissummut ilanngullugu nassiutissavat.

Suliareqqitassanngortitsissut pillugu piumasaqaatit
Suliareqqitassanngortitsissummut piumasaqaatit eqqartuussisarnermik inatsimmi aalajangersarneqarnikuupput. Immersugassaq quppernerup matuma qulaaniittoq atorukku ajunngitsumillu immersorsimagukku piumasaqaatit eqqartuussisarnermik inatsimmiittut eqqortissavatit.

Paasissutissat suliareqqitassanngortitsissummi amigaatigineqarpata Nunatta Eqqartuussisuuneqarfiata attaveqarfigalutit suut amigaataanersut pillugit ilitsersussavaatit.

Suliareqqitassanngortitsissutip eqqortumik allannissaa uppernarsaatinillu tulluartunik eqqartuussisunut saqqummiussaqarnissat pingaaruteqarpoq.

Kalaallit Nunaanni Eqqartuussiviup eqqartuussutaa Nunatta Eqqartuussisuuneqarfianut suliareqqitassanngortinniarukku eqqartuussivimmut akitsuut 750 kr. akilissavat. Aningaasat Kalaallit Nunaanni Eqqartuussiviup Grønlandsbankimi kontoanut ikissavatit: 6471-1032663.

Akiliinermi makku ilisimatitsissutigissavatit:

• Atit
• Illuatungerisavit atia
• Illit nammineq suliamut normut, peqaruit
• Eqqartuussiviup suliamut normuliussaa, ilisimatitsissutigineqarsimappat.

Suliareqqitassanngortitsissutip Nunatta Eqqartuussisuuneqarfianut nassiunnissaa sioqqullugu akiliisimaguit kajumissaassavatsigit akiliisimanernut uppernarsaat suliareqqitassanngortitsissummut ilanngullugu nassiutissagit.

Eqqartuussivimmut akitsuummik akiliisimanermut uppernarsaat suliareqqitassanngortitsissummut ilanngullugu tigusimagutsigu tamanna suliap suliarineqarneranut sivikillisaataassaaq, tassami akiliisoqarsimanera aatsaat qulakkeeqqaarlugu suliaq Nunatta Eqqartuussisuuneqarfiata suliaralugu aallartittarpaa.

Saqitsaannermik suliami suliareqqitassanngortitsissut nassiussinnaavaat internetikkut immersugassaq atorlugu.

Tuugassaq sungaartoq, allakkat uku qulaatungaanniittoq, ”Saqitsaannermik suliami suliareqqitassanngortitsissut” toorlugu immersugassaq takusinnaavat. Immersugassaq immersulerukku NemID atussavat.

Immersugassaq iserfigigukku immersuinissannik ilitsersorneqassaatit.

Suliareqqitassanngortitsissummut ilanngullugit nassiutissavatit:

• Kalaallit Nunaanni Eqqartuussiviup eqqartuussutaa aamma
• ilanngussat allat, Kalaallit Nunaanni Eqqartuussiviup suliamik suliaqarnerani saqqummiunneqarnikuunngitsut

Maluginiaruk
Ilanngussat, Kalaallit Nunaanni Eqqartuussiviup suliamik suliaqarnerani atorsimasatit, nassiutissanngilatit. Taakku Nunatta Eqqartuussisuuneqarfianut taakanngaanniit tunniunneqassapput.

Immersugassaq immersoreerukku aamma Kalaallit Nunaanni Eqqartuussiviup eqqartuussutaa ilanngussallu saqqummiukkusutatit allat kakkiutereerukkit ”nassiuguk” tuussavat. Taava suliareqqitassanngortitsissutit Nunatta Eqqartuussisuuneqarfianut nassiunneqassaaq.

Eqqartuussivimmut akitsuummik akiliineq
Suliareqqitassanngortitsissut Nunatta Eqqartuussisuuneqarfiata tiguguniuk misissussavaa eqqartuussivimmut akitsuut akilerneqarsimanersoq.

Eqqartuussivimmut akitsuummik akiliisimanermut uppernarsaat suliareqqitassanngortitsissummut ilanngullugu nassiussimanngikkukku Nunatta Eqqartuussisuuneqarfiata Kalaallit Nunaanni Eqqartuussivik paasiniaavigissavaa akitsuut akilerneqarsimanersoq.

Eqqartuussivimmut akitsuut Kalaallit Nunaanni Eqqartuussiviup piffissaliussaata iluani akilerneqarsimanngippat suliareqqitassanngortitsissut itigartitsissutigineqassaaq. Tassa imaappoq suliap suliarineqarnera Nunatta Eqqartuussisuuneqarfiata unitsissavaa.

Illuatungerisannik kalerriineq
Eqqartuussivimmut akitsuutip akilerneqarsimanera Nunatta Eqqartuussisuuneqarfiata qulakkeeruniuk suliareqqitassanngortitsissut illuatungerisannut nassiutissavaa.

Illuatungerisat akissuteqarnissaminut piffissaliivigineqassaaq. Tamanna nalinginnaasumik sap. akunnerinik pingasunik sivisussuseqartarpoq.

Ilanngussat
Ilanngussat Nunatta Eqqartuussisuuneqarfiata nammineq Kalaallit Nunaanni Eqqartuussivimmut piniassavai.

Tamatuma kingorna illit illuatungerisallu uppernarsaatinik paasissutissanillu amerlanernik saqqummiussaqarnissamut periarfissinneqassaasi.

Eqqartuussutissamik isumaqatigiinniuteqarneq – qaqugu
Suliaq inaarutaasumik eqqartuussutigineqarnissaminut piareerpat, tassa eqqartuussutissaq isumatigiinniutigineqarsinnaalerpat, Nunatta Eqqartuussisuuneqarfiata tamatuma qaqugu pisinnaanera pillugu illit illuatungerisallu isumaqatigissavaasi.

Illuatungerisallu nalunaarussi suliaq isumaqatigiinniutigineqarnissaminut piareertoq tamatuma qaqugu pisinnaaneranik ilisimatinneqassaasi.

Suliap piareersarneqarnerata naammassineqarneraniit isumaqatigiinniuteqarnissap tungaanut qaammatit pingasut-arfinillit nalinginnaasumik ingerlasarput.

Eqqartuussutissamik isumaqatigiinniuteqarneq
Saqitsaannermik suliani, Kalaallit Nunaanni Eqqartuussiviup suliareqqitassanngortissimasaani, eqqartuussutissamik isumaqatiginniuteqarnerni Nunatta Eqqartuussisuuneqarfiani eqqartuussisuuneq eqqartuussisuunerillu marluk Danmarkimeersut peqataasarput.

Eqqartuussutissamik isumaqatigiinniuteqarnerup ingerlanerani illit illuatungerisallu nassuiaateqarnissamut isummassinnillu kiisalu uppernarsaatinik saqqummiussinissamut periarfissaqassaasi.

Nunatta Eqqartuussisuuneqarfiata eqqartuussutaa
Nunatta Eqqartuussisuuneqarfiata eqqartuussutini allanneqareeraangat aatsaat nalunaarutigisarpaa. Tassa imaappoq eqqartuussut aatsaat allanneqareerpat Nunatta Eqqartuussisuuneqarfiata aalajangiineranik illit illuatungerisallu paasitinneqassaasi.

Eqqartuussutissamik isumaqatigiinniuteqarnerup naalernerani paasitinneqassaasi eqqartuussut qaqugu ilissinnut nassiunneqassasoq.

Eqqartuussut amerlanertigut nassiunneqartarpoq isumaqatigiinniuteqarnermiit sap. akunnerata ataatsip ullulluunniit 14-it qaangiunneranni.

Eqqartuussut nalunaarutigineqareeraangat eqqartuussiviup eqqartuussuteqartuusup aalajangiinini allanngortissinnaanngilaa. Eqqartuussut taamaallaat eqqartuussivimmit qulliunerusumit allanngortinneqarsinnaavoq.

Eqqartuussummi kukkulluni allattoqarsimappat eqqartuussiviup eqqartuussuteqartup kukkuneq paasineqarniariassapat iluarsissavaa.

Suliareqqitassanngortitsissutit Kalaallit Nunaanni Eqqartuussiviup eqqartuussuteqarneraniit sap. akunneri sisamat qaangiutsinnagit Nunatta Eqqartuussisuuneqarfiata tigoreersimassavaa. Eqqartuussutip ullua eqqartuussummi allaqqasarpoq.

Suliareqqitassanngortitsissut piffissaliussaq qaangiutereersoq tiguneqarpat Nunatta Eqqartuussisuuneqarfiata itigartitsissutigissavaa, aatsaallu akuerisinaavaa suliareqqitassanngortitsissut pissutissaqavillutit piffissaliussap iluani tunniussinnaasimanngikkukku.

Piffissaliussaq qaangiutereersoq suliareqqitassanngortitsinissamut akuerineqarneq
Suliareqqitassanngortitsinissamut akuerisaanissaq piffissaliussap qaangiutereernerani qinnuteqaatigigukku suliareqqitassanngortitsissummik piffissaliussap iluani tunniussaqarsinnaasimannginnernut pissutissaalluartoq ilisimatitsissutigissavat.

Piffissaliussap qaangiutereernerani suliareqqitassanngortitsisinnaasimannginnermut pissutaasinnaasut tamaasa allaaserinissaat ajornarpoq, kisianni assersuutigalugu akuerineqarsinnaavutit napparsimmavimmi uninngallutit ilisimajunnaaqqasimanerit pissutigalugu piffissaliussaq eqqortissinnaasimanngikkukku.

Piffissaliussaq puigorsimagukku imaluunniit suliassat allat ulapputigisimagukkit piffissaliussap qaangiutereernerani suliareqqitassanngortitsinissamut akuerisaanissat ilimagissanngilat.

Suliaq Nunatta Eqqartuussisuuneqarfiani aallartinneqarpat pappiaqqanik tunniussinissamut piffissaliisoqassaaq. Aamma Nunatta Eqqartuussisuuneqarfiata eqqartuussinissat piffissaliivigisassavai.

Suliareqqitassanngortitsinermik itigartitsineq
Piffissaliussat eqqortinngikkukkit imaluunniit eqqartuussinernut takkutinngitsooruit Nunatta Eqqartuussisuuneqarfiata suliareqqitassanngortitsinerit itigartitsissutigisinnaavaa.

Suliareqqitassanngortitsinerit itigartitsissutigineqarpat Nunatta Eqqartuussisuuneqarfiata suliaq suliareqqitassanngortitaq unitsissavaa.

Kalaallit Nunaanni Eqqartuussiviup eqqartuussutaanik allanngortitsinissamik illuatungerisat noqqaassuteqarsimappat tamanna Nunatta Eqqartuussisuuneqarfiata isummerfigissavaa, suliareqqitassanngortitsinerilluunniit itigartitsissutigineqaraluarpat.

Nunatta Eqqartuussisuuneqarfiata eqqartuussutai taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut suliareqqitassanngortinneqarsinnaapput.

Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

• apeqqut Eqqartuussiviit Qullersaata siornatigut suliarinikuunngisaanut tunngappat, aamma
• aalajangiineq allanut, suliami illuatungeriinnuunnaanngitsoq, pingaaruteqarsinnaappat

• Nunatta Eqqartuussisuuneqarfia, postboks 1040, 3900 Nuuk imaluunniit
• Procesbevillingsnævnet Store Kongensgade 1-3, 2., 1264 København K

Nunatta Eqqartuussisuuneqarfiata eqqartuussutaanik Eqqartuussiviit Qullersaannut suliareqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata eqqartuussutaata nalunaarutigineqarneraniit sap. akunneri arfineq-pingasut qaangiunneranni. Eqqartuussutip qanga nalunaarutigineqarsimanera Nunatta Eqqartuussisuuneqarfiata eqqartuussutaani allaqqasarpoq.

Ingerlatitseqqiinissamik Aalajangiisartut nittartagaat takuuk (nutaami ammassaaq)

Kalaallit Nunaannut eqqartuussisarnermik inatsit nr. 305 ulloq 30/04/2008-meersoq kingusinnerusukkut allannguutitalik