Saqitsaannermik suliami suliareqqitassanngortitsissummut akissuteqaatit nassiuguk

Suliareqqitassanngortitsissummut akissuteqaat tassaavoq allakkiaq, saqitsaannermik suliami illuatungerisavit Kalaallit Nunaanni Eqqartuussiviup eqqartuussutaa maalaarutigisimappagu maalaarutaanut akissuteqaleruit atugassat.

Eqqartuussummik maalaaruteqarneq taamaattoq suliareqqitassanngortitsinermik taaneqartarpoq. Allakkiaq illuatungerisavit suliariaqqitassanngortitsinermini atorsimasaa suliareqqitassanngortitsissummik taaneqartarpoq.

Saqitsaannermi suliami illuatungeriit arlaata suliareqqitassanngortitsissutaa Nunatta Eqqartuussisuuneqarfiata tiguguniuk illuatungerisaanut (illuatungerisaq) nassiutissavaa imaluunniit tunniutissavaa.

Saqitsaannermik suliami illuatungiusimaguit illuatungivillu Kalaallit Nunaanni Eqqartuussiviup eqqartuussutaa suliareqqitassanngortissimappagu Nunatta Eqqartuussisuuneqarfiata tamatuminnga allakkatigut ilisimatissavaatit.

Nunatta Eqqartuussisuuneqarfiata suliareqqitassanngortitsissutip illuatungerisannit tigusimasami nuutsinneqarnera ilinnut nassiutissavaa, akissuteqarnissannullu piffissaliivigissavaatit.
Akissuteqaatit suliareqqitassanngortitsissummut akissuteqaatitut taaneqartarpoq.

Saqitsaannermik suliat tamarmik makkununnga tunngasuusarput:

• aningaasanik akileeqqusineq
• pigisamik tunniusseqqusineq imaluunniit
• piumasarisamik akuerseqqusineq

Kalaallit Nunaanni Eqqartuussiviup suliaq naqinnerit BS aallarniutigalugit normulersimappagu taava saqitsaannermik suliaasimassaaq.

Suliat suut eqqartuussivinni suliarineqartarnerat pillugu uani paasisaqarnerusinnaavutit www.eqqartuussivik.gl

Eqqartuussisut kalluunnaveersaartuusussaagamik suliap pitsaanerpaamik qanoq ingerlanneqarsinnaanera pillugu siunnersorsinnaanngilaatsit. Taamaattumik suliassanngortitsiniaruit imaluunniit suliareqqitassanngortitsiniaruit kajumissaassavatsigit eqqartuussissuserisoq imaluunniit inatsisitigut siunnersuisarfik, IKIU, attavigissagit.

Eqqartuussissuserisup IKIU-lluunniit misissuissussinnaavaatit naalagaaffiup akiligaanik eqqartuussissuserisulerneqarsinnaanersutit (fri proces) aamma periarfissatit allat pillugit siunnersorsinnaavaatit.

IKIU-p nittartagaa takuuk (nutaami ammassaaq)

Nunatsinni eqqartuussissuserisut allattorsimaffiat takuuk (nutaami ammassaaq)

Kalaallit Nunaanni Eqqartuussiviup inerniliisimanera isumaqatigigukku akissuteqaammik nassiussisariaqanngilatit.

Kalaallit Nunaanni Eqqartuussiviup inerniliisimanera isumaqatiginngikkukku akissuteqaammik nassiussaqassaatit, tassanilu allaaserissavat suliaq Nunatta Eqqartuussisuuneqarfiani qanoq inerneqartikkusunnerlugu.

Suliap inernissaa pillugu kissaatit piumasaqaammik taaneqartarpoq. Suliareqqitassanngortitsissummut akissuteqaatit piumasaqaatinnik imalik Nunatta Eqqartuussisuuneqarfiata piffissaliussaa qaangiutsinnagu tiguneqareersimassaaq.

Suliareqqitassanngortitsissummut akissuteqaatit tiguneqarsimanngippat Nunatta Eqqartuussisuuneqarfiata naatsorsuutigissavaa Kalaallit Nunaanni Eqqartuussiviup inerniliussaa isumaqataaffigigit.

Akissuteqarnissamut piffissaliussaq qaangiutereersoq suliareqqitassanngortitsiguit Nunatta Eqqartuussisuuneqarfia akuersiteqqaassavat.

Akissuteqarnermi piumasaqaatit
Suliareqqitassanngortitsissummut akissuteqaammut piumasaqaatit eqqartuussisarnermik inatsimmi aalajangersarneqarnikuupput. Immersugassaq quppernerup matuma qulaaniittoq atorukku ajunngitsumillu immersorsimagukku piumasaqaatit eqqartuussisarnermik inatsimmiittut eqqortissavatit.

Suliareqqitassanngortitsissummut akissuteqaativit eqqortumik allannissaa uppernarsaatinillu tulluartunik eqqartuussisunut saqqummiussaqarnissat pingaaruteqarpoq.

Kalaallit Nunaanni Eqqartuussiviup eqqartuussutaa Nunatta Eqqartuussisuuneqarfianut allanngorteqqugukku eqqartuussivimmut akitsuummik akileeqquneqarsinnaavutit.

Taamaattoqassappat Nunatta Eqqartuussisuuneqarfiata tamatuminnga ilisimatissavaatit.

Eqqartuussivimmut akitsuummik akiliineq
Eqqartuussivimmut akitsuummik akiliissaguit aningaasat Kalaallit Nunaanni Eqqartuussiviup kontoanut ikissavatit: 6471-1032663.

Akiliinermi makku ilisimatitsissutigissavatit:

• Atit
• Illuatungerisavit atia
• Illit nammineq suliamut normut, peqaruit
• Eqqartuussiviup suliamut normuliussaa, ilisimatitsissutigineqarsimappat.

Eqqartuussivimmut akitsuutip akilersimaneranut uppernarsaat akissuteqaatinnut ilanngullugu tiguneqarsinnaappat tamanna suliap suliarineqarneranut sivikillisaataassaaq.

Saqitsaannermik suliami suliareqqitassanngortitsissummut akissuteqaat nassiussinnaavat internetikkut immersugassaq atorlugu.

Tuugassaq sungaartoq, allakkat uku qulaatungaanniittoq, ”Saqitsaannermik suliami akissuteqaat” toorlugu immersugassaq takusinnaavat. Immersugassaq immersulerukku NemID atussavat.

Immersugassaq iserfigigukku immersuinissannik ilitsersorneqassaatit.

Maluginiaruk
Ilanngussat, Kalaallit Nunaanni Eqqartuussiviup suliamik suliaqarnerani atorsimasatit, nassiutissanngilatit. Taakku Nunatta Eqqartuussisuuneqarfianut taakanngaanniit tunniunneqassapput.

Ilanngussanik nutaanik saqqummiussaqarusukkuit taakku akissuteqaatinnut ilanngullugit nassiutissavatit.

Immersugassaq immersoreerukku ”nassiuguk” tuussavat. Taava akissuteqaatit Nunatta Eqqartuussisuuneqarfianut nassiunneqassaaq.

Akissuteqaatit suliamilu ilanngussat Nunatta Eqqartuussisuuneqarfiata tigusimalerunigit illit illuatungerisallu qinnuigissavaasi suliami uppernarsaatinik paasissutissanillu allanik tunniussaqarniarnerlusi ilisimatitsissutigissagissi.

Eqqartuussutissamik isumaqatigiinniuteqarneq – qaqugu
Suliaq inaarutaasumik eqqartuussutigineqarnissaminut piareerpat, tassa eqqartuussutissaq isumatigiinniutigineqarsinnaalerpat, Nunatta Eqqartuussisuuneqarfiata tamatuma qaqugu pisinnaanera pillugu illit illuatungerisallu isumaqatigissavaasi.

Illuatungerisallu nalunaarussi suliaq isumaqatigiinniutigineqarnissaminut piareertoq tamatuma qaqugu pisinnaaneranik ilisimatinneqassaasi.

Suliap piareersarneqarnerata naammassineqarneraniit isumaqatigiinniuteqarnissap tungaanut qaammatit pingasut-arfinillit nalinginnaasumik ingerlasarput.

Eqqartuussutissamik isumaqatigiinniuteqarneq
Saqitsaannermik suliani, Kalaallit Nunaanni Eqqartuussiviup suliareqqitassanngortissimasaani, eqqartuussutissamik isumaqatiginniuteqarnerni Nunatta Eqqartuussisuuneqarfiani eqqartuussisuuneq eqqartuussisuunerillu marluk Danmarkimeersut peqataasarput.

Eqqartuussutissamik isumaqatigiinniuteqarnerup ingerlanerani illit illuatungerisallu nassuiaateqarnissamut isummassinnillu kiisalu uppernarsaatinik saqqummiussinissamut periarfissaqassaasi.

Nunatta Eqqartuussisuuneqarfiata eqqartuussutaa
Nunatta Eqqartuussisuuneqarfiata eqqartuussutini allanneqareeraangat aatsaat nalunaarutigisarpaa. Tassa imaappoq eqqartuussut aatsaat allanneqareerpat Nunatta Eqqartuussisuuneqarfiata aalajangiineranik illit illuatungerisallu paasitinneqassaasi.

Eqqartuussutissamik isumaqatigiinniuteqarnerup naalernerani paasitinneqassaasi eqqartuussut qaqugu ilissinnut nassiunneqassasoq.

Eqqartuussut amerlanertigut nassiunneqartarpoq isumaqatigiinniuteqarnermiit sap. akunnerata ataatsip ullulluunniit 14-it qaangiunneranni.

Eqqartuussut nalunaarutigineqareeraangat eqqartuussiviup eqqartuussuteqartuusup aalajangiinini allanngortissinnaanngilaa. Eqqartuussut taamaallaat eqqartuussivimmit qulliunerusumit allanngortinneqarsinnaavoq.

Eqqartuussummi kukkulluni allattoqarsimappat eqqartuussiviup eqqartuussuteqartup kukkuneq paasineqarniariartoq iluarsissavaa.

Nunatta Eqqartuussisuuneqarfiata suliareqqitassanngortitsissut ilinnut nassiutiutigalugu paasitissavaatit akissuteqaatit qaqugu kingusinnerpaamik tunniutissagit.

Suliaq Nunatta Eqqartuussisuuneqarfiani aallartinneqarpat pappiaqqanik tunniussinissamut piffissaliisoqassaaq. Aamma Nunatta Eqqartuussisuuneqarfiata eqqartuussinissat piffissaliivigisassavai.

Piffissaliussat eqqortinngikkukkit imaluunniit eqqartuussinernut takkutinngitsooruit Nunatta Eqqartuussisuuneqarfiata suliaq paasissutissat tigoriikkani tunngavigalugit aalajangiivigisinnaavaa.

Nunatta Eqqartuussisuuneqarfiata eqqartuussutai taamaallaat Ingerlatitseqqiinissamik Aalajangiisartut akuersissuteqarnerisigut Eqqartuussiviit Qullersaannut suliareqqitassanngortinneqarsinnaapput.

Aatsaat suliaq tunngavimmigut pingaaruteqarpat Ingerlatitseqqiinissamik Aalajangiisartut akuersissuteqartarput.

Suliaq tunngavimmigut pingaaruteqarsinnaavoq:

• apeqqut Eqqartuussiviit Qullersaata siornatigut suliarinikuunngisaanut tunngappat, aamma
• aalajangiineq allanut, suliami illuatungeriinnuunnaanngitsoq, pingaaruteqarsinnaappat

Nunatta Eqqartuussisuuneqarfiata eqqartuussutaa Eqqartuussiviit Qullersaannut ingerlatikkusukkukku qinnuteqaatit uunga nassiutissavat:

• Nunatta Eqqartuussisuuneqarfia, postboks 1040, 3900 Nuuk imaluunniit
• Procesbevillingsnævnet Store Kongensgade 1-3, 2., 1264 København K

Nunatta Eqqartuussisuuneqarfiata eqqartuussutaanik Eqqartuussiviit Qullersaannut suliareqqitassanngortitsinissaq pillugu akuersissuteqarnissamik qinnuteqaatit Nunatta Eqqartuussisuuneqarfianit imaluunniit Ingerlatitseqqiinissamik Aalajangiisartunit kingusinnerpaamik tiguneqareersimassaaq Nunatta Eqqartuussisuuneqarfiata eqqartuussuteqarneraniit sap. akunneri arfineq-pingasut qaangiunneranni. Qanga eqqartuussuteqarsimanera Nunatta Eqqartuussisuuneqarfiani eqqartuussutaani allaqqasarpoq.

Ingerlatitseqqiinissamik Aalajangiisartut nittartagaat takuuk (qupperneq nutaaq)

Kalaallit Nunaannut eqqartuussisarnermik inatsit nr. 305 ulloq 30/04/2008-meersoq (kingusinnerusukkut allannguutitalik)