Atsiisarneq kuisitsisarnerlu

Meeraq inunngoreerpat kingusinnerpaamik ukioq ataaseq qaangiutsinnagu atserneqassaaq. Tamanna marlussunnik iliuuseqarfigisinnaavarsi: Nammineq atserlugu imaluunniit kuisillugu.

Atsiisarneq
Qitornarsi atserusukkussiuk palaseqarfissinnut saaffiginnissaasi. Meeraq atserneqareerpat atip allagartaanik tunineqassaaq. Kikkulluunniit qanoq upperisaqaraluarunik palaseqarfiup allaffia aqqutigalugu atsiisussaapput.

Kuisineq
Meerarsi oqaluffimmi kuisitsikkusukkussiuk, palaseqarfiup allaffianut saaffiginnissaasi ulloq kuisiffissaq isumaqatigiissutigiartorlugu. Kuisineq sapaammi nalinginnarmik naalagiarnerup nalaani pisassaaq.

Meerarsi oqaluffimmi kuisippat, meeraq kuisinnermut uppernarsaammik tunineqassaaq tassanilu Ilagiinnut Kalaallinut ilaasortanngorluni.

Meerarsi oqaluffimmi kuisissappat minnerpaamik arlarsi Ilagiinnut Kalaallinut ilaasortaassaaq.

Aqqit akuerisat
Meeraq aternik akuerisanik taamaallaat atserneqarsinnaavoq. Qallunaat aqqi akuerisat familiestyrelsep nittartagaani alakkarterneqarsinnaapput. Oqaasileriffiup nittartagaani aqqit kalaallisuut akuerisat nalunaarsorsimaffii alakkartersinnaavasi.

Meeraq ataatsimik amerlanernilluunniit atserneqassaaq.

Meeraq aamma aternik taaguutaanngitsunik ataatsimik amerlanernilluunniit atserneqarsinnaavoq. Ateq taaguutaanngitsoq ataataasup anaanaasulluunniit aterisinnaavaa taaguutaanngitsoq, taannalu meeqqap kinguliatut atorsinnaavaa.

Meeqqap kinguliaa angajoqqaat kinguliarissavaat, kinguliaqatigiinngippata arlaata kinguliaa aamma kinguliarisinnaavaa.

Atsiisarneq kuisitsisarnerlu
Meeraq kuisissappat atertaartinneqassappalluunniit palaseqarfiup allaffianut saaffiginnitsigasi makku nassassavasi:
• Ilissi kuisinnermut uppernarsaatisi atermulluunniit allagartasi
• Katissimagussi katissimasutut uppernarsaatersi
• Katissimanngikkussi ataatassarsiuinermut uppernarsaatip assilinera. Ataatassarsiuinermut uppernarsaat immersoriartussavarsi najugarisassinni politeeqarfimmut
• Meeraq Danmarkimi palaseqarfimmiluunniit allami inunngorsimappat inunngorsimaneranut paasissutissat assilineri.