Sunngiffimmi saarullinniarneq

Sunngiffimmi aalisartuuguit nammineq atugassannik saarullinniarnermi aalisarnissamut akuersissuteqartariaqanngilatit.

Sunngiffimmi aalisartunut tunineqarsinnaasunik saarullittassiissutinik Naalakkersuisut aalajangersaasimapput. Sunngiffimmi aalisartutut pisatit tunerusukkukkit sunngiffimmi saarullinniarnissamut akuersissummik peqartariaqarputit.

Aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit.

Sunngiffimmi saarullinniarnissamut akuersissummut tunngatillugu inatsisit maleruagassallu atuuttut uani takusinnaavatit.

Ukiuni tulleriiginnarni kingullerni marlunni Kalaallit Nunaanni najugaqarsimaneq danskisut innuttaassuseqartutut sanilliunneqartarpoq.

Nunami allami naalagaaffimmi innuttaasutut Kalaallit Nunaanni aalajangersimasumik najugaqassaatit aamma ukiuni marlunni ataqatigiissumik najugaqarsimassallutit.
Sunngiffimmi saarullittatit tunineqarnissaat kissaatigigukku akuersissummik qinnuteqassaatit.
Inuussutissarsiutigalugu aalisartut ataatsikkut sunngiffimmi saarullinniarnissamut akuersissummik tunineqarsinnaanngillat paarlattuanillu.

Inuussutissarsiutigalugu aalisartut saarullinnik aalisarsinnaatillugit tulaassisinnaatitaavutit. Inuussutissarsiutigalugu aalisartut saarullinniarsinnaanerat unitsinneqarpat tulaassisinnaajunnaassaatit.

Tulaassigaangavit akuersissutit takutittassavat.
Inuussutissarsiutigalugu aalisartut kisimik kalaalimineerniarfinni tuniniaasinnaatitaapput.

Sunngiffimmi saarullinniarnissamut akuersissummik qinnuteqarniaruit kommunimi najugarisanni sullissivik aqqutigalugu qinnuteqassaatit. Tassani paasissutissat tunniussassatit makkuupput:

• Ukiup siuliani assingusumik akuersissummik peqarsimanersutit.
• Atitit tamarmiusut
• Najugaq
• Inuup normua
• Oqarasuaatip normua
• E-maileqarsimaguit e-mail-it

Akuersissut ukiumut pisassiiffiusumut ataatsimut atuuppoq ukiullu tamaasa akuersissummik nutaamik qinnuteqartassaatit. Ukioq pisassiiffiusoq 1. januaarimiit 31. decembarip tungaanut atuuttarpoq.

Qinnuteqaatit nassiutereerukku aalisarsinnaanermut akuersissummik suliaqarneq aallartissaaq.

• Sunngiffimmi akuersissutit nutartissagukku taava kommunip ilinnut akuersissut atulersissinnaavaa
• Siullermeertumik sunngiffimmi akuersissummik qinnuteqaruit taava qinnuteqaatit kommunip Aalisarnermut Piniarnermullu Naalakkersuisoqarfimmut nassiutissavaa, tassanilu qinnuteqaatit suliarineqarluni.

Qinnuteqaatinnut ileqquusutut naapertorlugit ullut suliffiusut 10-t ingerlaneranni akissutisissaatit. Qinnuteqaativit suliarineqarnissaanut paasissutissat amigarpata attavigineqarumaarputit.

Qinnuteqariaatsimut apeqqutissaqaruit Aalisarnermut Piniarnermullu Naalakkersuisoqarfimmut attaveqarsinnaavutit.

Qinnuteqaatigisat akuerineqarsimanersoq itigartinneqarsimanersorluunniit maili nassiussat aqqutigalugu kommunimiit akineqarumaarputit. Mail oqarasuaalluunniit aqqutigalugit akissutisiumaarputit.

Qarsorsat qassutillu atorlugit saarullinniartoqarsinnaavoq. Qassusersorluni saarullinniarnermi qassutini nigartaqqortussutsimut 160 mm-it minnerpaaffissatut atuupput.

Aalisarnermi atortuutit piginnittup atianik ersarissumik nalunaaqutserneqarsimassapput. Nalunaaqutsiinerit imermit arrortinneqarsinnaassanngillat.

Malugiuk: Qassutit atorneqarnissaat pillugu kommuninni kommunimut ileqqoreqqusaqarsinnaavoq. Malittarisassat malinnissaat pisussaaffigivat.