Alloriarfinni misilitsissutit

Meeqqat atuarfianni atuartut alloriarfinnut pingasunut agguagaapput, taakkulu tamaasa misilitsissutinik imaluunniit misilitsinnernik naggataarutigineqartarput:

• nukarliit 1. - 3. klasse
• akulliit 4. - 7. klasse
• angajulliit 8. - 10. klasse
  
  

Nukarliit akulliillu alloriarfinni misilitsillutik atuarnitik naggasertarpaat. Alloriarfinni misilitsissutit Ilinniartitaanermut Aqutsisoqarfimmit / Kalaallit Nunaanni Namminersorlutik Oqartussanit suliarineqartarput atuarfinnullu tamanut nassiussuunneqartarlutik.

Atuartup piginnaasaanik suliassanillu paasisimasaqarnermini ineriartorneranik nalilersuinissaq alloriarfinni misilitsitsisarnermi siunertarineqartarpoq, taamaalillutik ilinniartitsisut meeqqap atuarnermini ingerlariaqqinnissaanut pilersaarusiorsinnaalersarlutillu piareersaasinnaalersarput.

Angajullerni atuartut ataavartumik karakteerilersortittarput naggataarutaasunilu misilitsinnerni peqataasarlutik.

Nukarlerni atuartut alloriarfiup tullianut ikaarsaarnialertut marsip apriililluunniit qaammataani alloriarfimmi misilitsittarput. Misilitsinnermi atuartitsissutit pingasut misilitsissutigisarpaat:

• kalaallisut
• qallunaatut
• matematikki

Alloriarfinni misilitsilluni angusat nutaanik iliuusissatut pilersaarusiornissanut atuartullu atuarnermini anguniakkanut nutaanut peqalernissaanut tunngaviliissapput.

Atuartoq alloriarfinni misilitsissutini peqataasinnaanngippat, assersuutigalugu napparsimaneq pissutaalluni, periarfissaq siulleq atorlugu misilitsissutip naammassineqarnissaa atuarfimmit pisussaaffigineqarpoq.

Nammineq suliat
Alloriarfinni misilitsissutit saniatigut atuartut 3. klassip naalernerani “nammineq suliat” saqqummiutissavaat. Nammineq suliat tassaassapput, qulequttat atuartut namminneerlutik soqutigisatut ingerlatarisimasaat. Atuartut namminneq suliatik saqqummiutissavaat atuartitsissutini suliassaqarfittullu atuartitsissutaasuni allattariarsornikkut misilitsissutaanngitsuni kiisalu atuartitsissutini atuartup nammineerluni toqqagarisami naapertorlugu ingerlatamini.

Diplom
Alloriarfinni misilitsissutit pereerpata 3. klassillu naggasernerani, atuartut diplominnassapput nukarliit naammassisimasatut uppernarsarniarlugit.

Akullerni atuartut atuarnertik naammassilerpassuk, alloriafinni misilitsissutit marsip apriililluunniit qaammataani ingerlatissavaat. Misilitsinnermi atuartitsissut sisamat misilitsissutigisarpaat:

• kalaallisut
• qallunaatut
• tuluttut
• matematikki

Alloriafinni misilitsilluni angusat nutaanik iliuusissatut pilersaarusiornissanut atuartullu atuarnermini anguniakkanut nutaanut peqalernissaanut tunngaviliissapput.
Atuartoq alloriafinni misilitsissutini peqataasinnaanngippat, assersuutigalugu napparsimaneq pissutaalluni, periarfissaq siulleq atorlugu misilitsissutip naammassineqarnissaa atuarfimmit pisussaaffigineqarpoq.

Qulequttat aallaavigalugit suliaqarneq
Alloriafinni misilitsissutit saniatigut 7. klassip naggataarutiginerani atuartut qulequttat aallaavigalugit suliaqartinneqarnerminnit saqqummiissapput, tassanilu aalajangersimasumik suliaqarluni suliaq saqqummiunneqassalluni.
Ilinniartitsisut atuartullu peqatigiillutik 7. klassimi 1. februar sioqqullugu pingaarnertut qulequtassarsiussapput, taannalu naapertorlugu atuartut tamaasa suliaqartinneqassallutik.

Qulequttat siammasissuuneri najoqqutaralugit atuartitsissutit atuartitsissuteqarfiillu arlallit atuartunit suliarineqarlutik sammineqassapput. Saqqummiinermi nipilersornermut atuartitsissutaasunut tunngasunik imaqartillugit saqqummiisoqassaaq, tassa ima paasillugu, saqqummiussassaq imaluunniit oqariartuut atuartunit suliarineqartoq, paasisallu nutaat aallaavigalugit suliaassalluni, assersuutigalugu isiginnaartitsinermut tunngatillugu, allatut takunneriaaseqarluni, periuserluunniit.

Saqqummiinerup ilagissavaa, suliassami iliuusissatut pilersaarummi allaaserineqartutut anguniagassat anguneqarsimanersut atuartup saqqummiutissagai. Saqqummiinermi ilaatigut atuartup akissuteqarnermini suliassap nassuiaasiornera/killigititaata aaqqiissutaa nassuiaatigissallugu.
Qulequttat aallaavigalugit suliaq ilinniartitsisunit nalilerneqassaaq suliassamullu tunngatillugu ilikkagassatut anguniagaasunut naleqqiullugu siammasissumik allakkatigut oqaasertalersorneqassalluni.