Katersugaasiviit – Kulturikkut eriagisassat eqqissisimatitat

Nunatta kulturikkut kingornussaasa tammatsaalinissaat nalunaarsornissaallu katersugaasiviit suliassaraat. Kulturikkut eriagisassat immikkoorutaat assigiinngiiaarnerilu eqqissisimatitassanngortinnissaat tammatsaalineqarnissaallu katersugaasivinnit isumagineqartarpoq. Nunatsinni kulturikkut kingornussaat siunissami pigiinnarneqarnissaat nalunaarsorneqarnerallu taamaalilluni qulakkeerneqartarpoq.

Ukiut tusintilikkaat ingerlaneranni inuit suliarisarsimasaat kulturikkut eriagisassanit takussuserneqarput. Eriagisassat qanga ullutsinnilu pisimasunit ataqatigiilersitsisuupput inuiaqatigiinnullu pilersitsisimasut ersiutaallutik. Kulturikkut eriagisassanik eqqissisimatitassanngortitsinikkut nunatta kulturikkut oqaluttuarisaanerani pisimasunik ullutsinnilu pisunut paasinninnissamut katersugaasiviit qulakkeerisarput.


Kulturikkut eriagisassat inatsisip nassatarisaanik toqqaannartumik eqqissisimatitaasut
Kulturikkut eriagisassat imaaliinnarlugit peerneqarsinnaanngitsut ukiup 1900-p siornatigut pilersinneqarsimasut inatsip peqqussutaa malillugu toqqaannartumik eqqissisimatitaapput, naak tamanna anguniarlugu suliakkiisoqarsimanngikkaluartoq. Kulturikkut eriagisassat imaaliinnarlugit peerneqarsinnaanngitsut tassaasinnaapput:

• Illukut amiakkuisa qarmai, tuperfikut, pullatit killukullu
• Inoqarfiusimasut

Siulitsinnit kingornussat pisoqaassusaat itsarnisarsiuunit aalajangerneqarajupput. Allamik uppernarsaatissaqanngitsillugu, itsarnitsat eriagisassat imaaliinnarlugit peerneqarsinnaanngitsut eqqissisimatitaasutut naatsorsuunneqartarput.

Qulaani taaneqartut saniatigut ilerrit tamarmik eqqissisimatitaapput - 1900-kkut kingorna pisut ilanngullugit.


Kulturikkut eriagisassat eqqissisimatitassanngortitat
Eriagisassat imaaliinnarlugit peerneqarsinnaanngitsut pisoqaassusertik toqqammavigalugu eqqissisimatitaanngitsut Nunatta Katersugaasivia Allagaateqarfiatalu aalajangiineratigut eqqissisimatitassanngortinneqarsinnaapput. Assersuutitut taaneqarsinnaapput:

• 1900-kkunni sanaartukkat
• Iliveqarfiit atorunnaarsimasut
• Inussuit
• Narsaatikut itsarnitsat
• Ujaqqanik ungaluliat itsarnitsat

Nunatta Katersugaasivia Allagaateqarfialu innersuussinerata kingorna, eqqissisimatitsineq aamma taassuma annertussusaa pillugu Naalakkersuisut inaarutaasumik aalajangiissapput.

Eqqissisimatitassanngortitsisoqarsimappat imaluunniit eqqissisimatitamut tunngasunik allannguisoqarsimappat kingusinnerpaamik ullut 14-it qaangiunneranni Nunatta Katersugaasivia Allagaateqarfianiillu tamanut saqqummiunneqassaaq. Kulturikkut eriagisassat eqqissisimatitat nalunaarsornissaat Nunatta Katersugaasivia Allagaateqarfiatalu pisussaaffigaa.


Kulturikkut eriagisassat eqqissisimatitat eqqaanni pissusilersornissaq
Kulturikkut eriagisassap eqqissisimatitap assaaviginissaa imaluunniit ilaanik peersinissaq inerteqqutaavoq, taassumalu saniatigut nunami eriagisassat eqqissisimatitat tamarmik ungataanniittut 20 meter-isut avammut isorartussusillit eqqissisimatitaapput. Killigititap taassuma iluani sunilluunniit suliaqartoqaqqusaanngilaq, suliat naasorissaanermut tunngassuteqartut eriagisassamut takussaasunut aqqusinniornerit allagartaliinerillu kisimik inerteqqutaanngillat.