Ajunngitsuliornermik imaluunniit tamat iluaqutissaannik siunertaqartumik tamanut ammasunik aaqqissuussaqarneq katersuiniartarnerlu

Peqatigiiffittut imaluunniit suliffeqarfittut assigisaattullu ajunngitsuliornermik imaluunniit tamanut iluaqutaasussamik siunertaqartumik, tamanut ammasumik katersuiniarniaruit imaluunniit eqquiniaatitsinikkut tuniniaaniaruit, najukkanni politeeqarfimmut nalunaaruteqassaatit imaluunniit politeeqarfimmit akuersissummik pissarseqqaassaatit.

Ajunngitsuliornermik siunertaq tassaasinnaavoq Kalaallit Nunaanni meeqqat inuusuttullu ilungersunartumik inissisimasut pillugit imaluunniit Neriuffiup iluaqutissaannik katersuiniarneq.

Tamat iluaqutissaannik siunertaqarneq tassaasinnaavoq najugarisami oqaluffiup nutaanik igalaartaartinnissaanut, tamat atortuusiviisa kusassarnissaanut, illoqarfimmi meeqqat atuartut paasisassarsiorlutik angalanissaannut assigisaannulluunniit tunngatillugu katersuiniarneq.

Tamanut ammasumik katersuiniarnermi periutsit marluupput:

• Tamanut ammasumik katersuiniarneq
  Tamanut ammasumik katersuiniarneq pineqartillugu, tunisisoq akerliganik akilerneqarani tunniussaqassaaq.
  
  Tamanut ammasumik katersuiniarneq nalunaarutigineqaannassaaq nalunaarullu tiguneqarsimanera pillugu politiinit uppernarsineqassalluni.

• Tamanut ammasumik eqquiniaatitsinikkut tuniniaaneq
  Tamanut eqquiniaatitsinikkut tuniniaaneq pineqartillugu, peqataasussaq aaqqissuussamut aggersarneqartassaaq.
  
  Tassaasinnaavoq raadiukkut bingortitsineq, qititsitsineq, takutitsineq imaluunniit aaqqissuussaq alla, taakkunanilu peqataasoq akissarsiassanik eqquisinnaalluni, imaluunniit sinneqartoorutit ajunngitsuliornermut tamalluunniit iluaqutissaannik siunertaqarpata, peqataasoq tunniussaqarnermigut pinnassinnaalluni.

Eqquiniaatitsilluni tuniniaanissaq ingerlakkusukku, qinnuteqaammik tunniussissaatit (ataani allaqqasut takukkit). Politiit akuerseqqaartinnagit aaqqissuussaq ingerlateqqusaanngilaq.

Peqatigiiffik assigisaaluunniit katersuiniarluni imaluunniit tamat iluaqutissaannik eqquiniaatitsiniaatitsilluni tuniniaaguni tamanut ammasumik aaqqissuussaqarniaruni, piumasaqaataavoq:

• peqatigiiffiussasoq, suliffeqarfiussasoq assigisaaluunniit (ikinnerpaamik pingasunik ilaasortaqartoq)
• katersuiniarneq/tamat iluaqutissaannik eqquiniaatitsineq tamanut ammasuussasoq
• ajunngitsuliornermik siunertaqassasoq imaluunniit tamat iluaqutissaannik siunertaqassasoq
• qinnuteqaat pisariaqartunik imaqartinneqassasoq

Piumasaqaatit malinneqarpata, eqquiniaatitsilluni tuniniaanissamut politiinit akuersissummik tunineqassaatit imaluunniit tamanut ammasumik aaqqissuussassap ingerlanneqarnissaanut eqqortumik nalunaartoqarsimanera pillugu politiinit uppernarsarneqassaaq.

Malugiuk
Tamanut ammasumik eqquiniaatitsilluni tuniniaaneq pineqartillugu, immikkoortut sisamat qulaani taaneqartut saniatigut, aaqqissuussap kommunalbestyrelsimit akuersissutigineqarnissaa piumasaqaataavortaaq, taamaammat elektronikkikkut qinnuteqarnermi immersuiffissaq immersornissaa innersuussutaavoq, tassanilu kommunimit akuersissutigineqarnissaa noqqaassutigineqassalluni.

Nalunaarut sumut ingerlatinneqassava imaluunniit qinnuteqaat sumut tunniutissava?
Peqatigiiffittut katersuiniarneq nalunaarutigissavat imaluunniit eqquiniaatitsilluni tuniniaanissaq najukkanni politeeqarfimmit akuerineqassaaq.

Immikkulli ittunik marlunnik peqarpoq:

1. Tamanut ammasumik aaqqissuussaqarnissamut qinnuteqaruit, ukiumi ataatsimi sumiiffimmi ataatsimi marloriarluni siunertamut tassunga aningaasanikkatersuiniartoqassappat, immikkut ittumik akuersissummik Nuummi Aqutsisoqarfimmut/Imaneq 22-imut qinnuteqaatigissavat
2. Tamanut ammasumik aaqqissuussinissamut illoqarfinni arlariinni ingerlanneqartussamik qinnuteqaruit, Nuummi Aqutsisoqarfimmut/Imaneq 22-imut nalunaarutigissavat.

Tamanut ammasumik katersuiniarnissaq pillugu nalunaaruteqarniarpit imaluunniit tamanut ammasumik eqquiniaatitsinikkut tuniniaaneq pillugu qinnuteqarniarpit, qinnuteqarnissamut immersuiffissaq ataani link atorlugu immersuisinnaavutit:

Qinnuteqarnissamik immersuiffissaq

Kalaallit Nunaanni politeeqarfiit mail-ii aamma sumiiffii una toorlugu takusinnaavatit

Qinnuteqarnissamut immersugassaq elektronikkikkut immersorsinnaavat. Qinnuteqarnissamut immersugassaq atornianngikkukku, qinnuteqaat paasissutissanik makkuninnga ilanngussisoqassaaq:

1. kikkut katersuiniartitsisuunersut
2. katersuiniarneq piffissami sumi ingerlanneqassanersoq
3. katersuiniarneq sumi ingerlanneqassanersoq
4. katersuiniarneq qanoq ingerlanneqassanersoq
5. aningaasat sumut siunertamut atorneqassanersut, aamma tamanut ammasumik katersuiniarnermi katersukkat naatsorsorneri kimit kukkunersiorneqassanersut allaqqassaaq

Qinnuteqarnissamut apeqqutissaqaruit imaluunniit tamanut ammasumik aaqqissuussineq pillugu nalinginnaasunik apeqqutissaqaruit, Kalaallit Nunaata Politiivini ledelsessekretariatimut mail-ikkut:
GRL-Ledelsessekretariat@politi.dk imaluunniit oqarasuaatikkut: 70 14 48.

Tamunut ammasumik katersuiniartitsinermi inatsisit uku atuupput:

• Lov nr. 287 af 9. juni 1971 om offentlige indsamlinger
• Bekendtgørelse nr. 100 af 23. marts 1982 om offentlige indsamlinger i Grønland

Tamanut eqquiniaasitsinermut inatsisit uku atuupput:

• Bekendtgørelse af 16. juni 1954, der fortsat vedrørende offentlig bortlodning er gældende
  Una peqqussut malillugu Anordning nr. 99 af 22. marts 1982, sat i kraft for Grønland