NunaGIS

www.nunagis.gl tassaavoq nunap assinginik katersaateqarfik digitaliusoq kikkunnit tamanit atorneqarsinnaasoq, internetikkullu Kalaallit Nunaata nunap assiliorneranik takunniffiusinnaasoq. Nunap assingini nunap ilaani assigiinngitsuni paasissutissat nanisinnaavatit, assersuutigalugu kommunit killeqarfii aammalu illuutit napasut. Nunap assingi assigiinngitsunut marlunnut immikkoortitersimapput:
• Kalaallit Nunaat tamakkerlugu nunap assingi – nunap timaa
• Illoqarfinni nunaqarfinnilu nunap assingi

Asimi
NunaGIS-imi Kalaallit Nunaata nunap assiliornera takuneqarsinnaavoq. Nunap assingi assigiinngitsutigut qaleriiaapput, assersuutigalugu timmiaqarfiit timmiaqarfiillu mianersuussassat, piniariartarfiit kiisalu illoqarfiit nunaqarfiillu inissisimaffii. Nunap assingini qaleriiaani ataasiakkaani paasissutissat sukumiinerusut nanisinnaavatit. Assersuutigalugu piniarfissamik nassaarsimaguit sumiiffimmi tassanerpiaq piniarfissanut malittarisassanut paasissutissat sukumiinerusut nassaarisinnaavatit.

Illoqarfiit nunaqarfiillu
Aamma nunatsinni illoqarfiit nunaqarfiillu silaannarmit assilinerat nunallu assingi kukkuneqanngitsut toqqarsinnaavatit. Taakkunani assersuutigalugu kommuninut pilersaarutit atuuttut, illuutit eriagisassat nunaminertallu atorneqanngitsut takusinnaavatit.

Nunaminertamik atugassinneqarnissamik qinnuteqarneq
www.nunagis.gl-imiassersuutigalugu illumik, illuaqqamik imaluunniit allatut illuummik sananissamut nunaminertamik tunineqarnissat pillugu qinnuteqarsinnaavutit.

Aaqqissugaaneq
Aningaasaqarnermut Naalakkersuisoqarfik - Nuna tamakkerlugu pilersaarusiorfik aqqutigalugu - NunaGIS-imut pingaarnertut akisussaasuuvoq. Namminersorlutik Oqartussani naalakkersuisoqarfiit suliffeqarfiillu tassunga atasut kiisalu kommunit namminneq suliassaqarfitik pillugit paasissutissanik NunaGIS-imut ilanngussisinnaapput.

Takorluukkat
Nunarput pillugu paasissutissanik nunamut tunngasunik internet aqqutigalugu kikkut tamarmik NunaGIS-imut isersinnaalernissaat takorluugaavoq. Tassa isumaqarpoq siunissami nunap assingini paasissutissat kikkunnit tamanit pissarsiarineqarsinnaasut tamaasa nunap assingani toqqaannartumik nanisinnaanngorumaaritit. Aamma takorloorneqarpoq assersuutigalugu naatsorsueqqissaarnermi paasissutissat NunaGIS-ikkut takutinneqartalissasut - assersuutigalugu peqqinneq suliffissaaleqinerlu pillugit kisitsisit. Aamma piffiit arlaanni inuup najugaata ujarnissaanut periarfissaqalerumaarpoq, tassa illoqarfiup assingani najugarisaq takuneqarsinnaanngussalluni.