Kalaallit Nunaanni timmisartuussisarnerit aamma Kalaallit Nunaat qulaallugu timmisartut angallanneri

Kalaallit Nunaat danskit naalagaaffeqatigiinnerinut ilaavoq. Suliassaqarfiit ilaat Danmarkimit isumagineqarput, taakkununnga illersornissaqarfik, eqqartuussiveqarneq silaannakkullu angallassineq ilaallutik.

Silaannakkut angallassineq Kalaallit Nunaannit kissaatigineqarpat isumaqatiginninniareernikkut tiguneqarsinnaavoq, kisiannili ullumikkut suliassaqarfik Angallannermut, Illuuteqarnermut Ineqarnermullu Ministeriaqarfimmi Angallannermut Sanaartornermut Ineqarnermullu Aqutsisoqarfiup isumagisaraa. Tassalu Danmarkimi Angallannermut, Sanaartornermut Ineqarnermullu Aqutsisoqarfik Kalaallit Nunaanni silaannakkut angallannermut oqartussaasutut maleruagassanik aalajangersaasarpoq.

Angallannermut, Sanaartornermut Ineqarnermullu Aqutsisoqarfiup Namminersorlutik Oqartussani Ineqarnermut Attaveqaqatigiinnermullu Naalakkersuisoqarfik tusarniaaffigisarpaa, uku suliarineqannginnerini:
• silaannakkut angallannermut maleruagassat Kalaallit Nunaannut atuuttussat aalajangersarneqarneri
• Kalaallit Nunaanni timmisartuussinissamut akuersissutit
• imaluunniit naalagaaffinnut allanut silaannakkut niueqatigiinnissamut isumaqatigiissuteqarnerit

Tassalu Namminersorlutik Oqartussat silaannakkut angallassinermut maleruagassiuussisanngillat, taamatullu Namminersorlutik Oqartussat soorlu ilaasut saaffiginnissuteqarnerinut tunngatillugu maalaaruteqarfiusinnaanngillat.

Kisiannili inuinnaat silaannakkut angallanneqarnerinut aalajangersakkat, Angallannermut, Sanaartornermut Ineqarnermullu Aqutsisoqarfimmit aalajangersarneqartut malinneqartillugit, Kalaallit Nunaata silaannakkut angallannermut inatsit naapertorlugu attaveqaatini atortut inissiffissaat nammineerluni aalajangertarpaa. Tamanna ilaatigut Kalaallit Airports A/S-ip, Inatsisartut inatsisaannik tunngaveqarluni Namminersorlutik Oqartussat sinnerlugit Kalaallit Nunaanni mittarfiliortitertuusup pilersinneqarneratigut ersersinneqarpoq.

Kalaallit mittarfiini ulluinnarni ingerlatsineq Mittarfeqarfinnit, Ineqarnermut Attaveqaqatigiinnermullu Naalakkersuisoqarfiup ataaniittunit isumagineqarpoq. Nuummi, Ilulissani Qaqortumilu mittarfinnik nutaanik sanaartorneq Kalaallit Airports A/S-imit, aktianik piginneqatigiiffimmit, Namminersorlutik Oqartussanit pigineqartumit isumagineqarpoq.

 

 

Kalaallit Nunaat nunarujussuuvoq innuttakitsoq, siammasissumik najugaqartunik. Sumiiffinni amerlasuuni ilaasut ikinnerat peqqutaalluni niuernermi atugassarititaasut nalinginnaasut atorlugit ilaasunik angallassiniarneq ajornakusoorpoq ajornarluniluunniit.


Namminersorlutik Oqartussat ilaasunik angallassinermi kiffartuussinissamut isumaqatigiissutit aqqutigalugit nuna tamakkerlugu ilaasut angallanneqarsinnaanissaannik qulakkeerisussaapput. Namminersorlutik Oqartussat kiffartuussinissamut isumaqatigiissutit aqqutigalugit angallavinnut ukununnga tapiissuteqartarput: angallannikkut periarfissaqartussaanngikkaluanut; akit pissutigalugit angalasonnaanngitsorpassuarnut; akuttunerusunik tikinneqartartussaagaluanut.

Tapiissutit angallavinni sullissisunut tunniunneqartarput.

Kiffartuussinissamut isumaqatigiissuteqarfiusuni assartuussinerit pillugit maalaarutit sumiiffimmi sullissisuusumut toqqaannartumik nassiunneqartassapput.

Kalaallit Nunaat qulaallugu timmisartut angallanneri oqartussaasunit assigiinngitsunit arlalinnit alapernaarsorneqarput misissorneqartarlutillu. Silaannartaq 6 kilometerinik portussusilik tikillugu nakkutigineqanngilaq, tassunga taarsiullugu timmisartunut paasissutissiisarfik atorneqarpoq. Timmisartunut paasissutissiisarfik Naviair-imit, Nuummi qullersaqarfeqartumit ingerlanneqarpoq.

 

Kalaallit Nunaata qulaani 6 kilometerit missaannik portunerusoq Islandimiit (6330-mit avannarpasinnerusoq) aamma Canadamiit (6330-imit kujasinnerusoq) nakkutigineqarpoq.

 

Malugiuk

Angallannermut, Sanaartornermut Ineqarnermullu Aqutsisoqarfik pillugu nittartagaanni annertunerusumik atuagaqarsinnaavutit.

 

Mittarfeqarfiit pillugit nittartagaanni annertunerusumik atuagaqarsinnaavutit.

 

Kalaallit Airports A/S pillugu nittartagaanni annertunerusumik atuagaqarsinnaavutit.

 

Naviair pillugu nittartagaanni annertunerusumik atuagaqarsinnaavutit.