Ilinniagaqarnermi taarsigassarsiat akilersorneranni tapiissutinik ikiorserneqarnissamik qinnuteqarit

Ukiumi ullorsiuteqarfiusumi qaangiuttumi, ukiup siuliani akiliiffiusumik taaneqartartoq, ilinniagaqarnermi taarsigassarsiavit taarsersornerani akilertakkavit angeqqataat tapiissutit matussuserneqarsinnaavoq piumasaqaatit eqquutsinneqarpata.
Ilinniakkat unitsissimagukku imaluunniit naammassisimagukku tapiissutip annertussusaanik aalajangiisuussaaq.

Assersuut 1: Ilinniakkat unitsissimagukku, ukiup siuliani akiliisimallutillu 6.000 koruuninik, taava 3000 koruuninik taperneqarnissannut periarfissaqarputit, piumasaqaatit eqquutsikkukkit.

Assersuut 2: Ilinniakkat naammassisimagukku piffissaq eqqorlugu imaluunniit ukiumik ataatsimik sivisunerpaamik sipporlugu, aammalu ukiup siuliani akiliisimallutillu 6.000 koruuninik, taava 6.000 koruuninik taperneqarsinnaavutit, piumasaqaatit eqquutsikkukkit.


MALUGIUK ukiumut ataasiaannaq ilinniagaqarnermi taarsigassarsiarisimasavit taarsersornerani taperneqarnissamut qinnuteqarsinnaagavit, aammalu akiitsutit nungoreersimappata taperneqarsinnaannginnavit.

Ataani piumasaqaatini sukumiinerusumik paasisaqarsinnaavutit.

Tapiissutinik taamaallaat pissarsisinnaavutit imaassimappat:

• Namminersorlutik Oqartussaniit ilinniarninni ilinniagaqarnersiutinik pisarsimassaatit
• Ilinniagaqarnermi taarsigassarsiat pissusissamisuunngitsumik ilinniagaqarnersiutinik pissarsisarsimanermit patsiseqanngippat
• Minnerpaamik ukiumi ullorsiuteqarfiusumi tapiiffigineqarnissaq pillugu qinnuteqarnissat sioqqullugu, 6.000 koruuninik utertitsillutit akiliisimassaatit
• Tapiissutit pillugit qinnuteqarnissat sioqqullugu Kalaallit Nunaanni sivikinnerpaamik qaammatini pingasuni aalajangersimasumik najugaqarsimassaatit

Ilinniagaqarnermi taarsigassarsiat akilersorneranni tapiissutinik ikiorserneqarnissat qinnuteqaatiginiarukku, periutsit marluk atorlugit qinnuteqarsinnaavutit:
MitID-qaruit MitID atorlugu isersinnaavutit toqqaannartumillu sullissivik.gl-ikkut qinnuteqarlutit.

Imminut sullinneq qulaaniittoq tooruk MitID-lu atorlugu iseriarlutit qinnuteqaatit aallartillugu.

MitID-qanngikkuit periarfissaqarputit imminut sullinneq qulaaniittoq toorukku immersuisinnaanissamut toqqagassat marluk qinersinnaavatit.
Qinnuteqarnermut ilanngutissavatit:

• Najugaqarnermi uppernarsaatip assilinera
• Akiliuteqarnermut uppernarsaatit, kontop assilinera

Ukioq naallugu qinnuteqarsinnaavutit.