Suliffissaaleqisunik sulilersitsineq

Arlaannik pissuteqartumik suliffiit annaasimagukku imaluunniit ilinniagaqareernerpit kingorna suliffissaaleqisimaguit, suliffissaaleqisutut nalunaarsorneqarsimanissat isumagissavat. Taamatut nalunaarsugaaguit pisinnaatitaaffeqarlutillu pisussaaffeqartitaassaatit. Pisussaaffivit ilagissavaat suliffeqarnermut piareersimasussaatitaanissat. Ilaatigut tamanna ima isumaqarpoq sulilersinneqarsinnaassasutit.

Sulilersinneqarnermut aamma ilaasinnaapput:

• Ilinniagaqarneq ilinniagaqaqqinnerlu
• Kommunip aaqqissugaanik sulilersitsinermut suliniummi suliffissaqartinneqarneq

Kommunip sulilersitsinermut suliniutigisai pilersinneqarlutillu, ingerlanneqarlutillu aningaasalersorneqartarput kommunimit pineqartumit imaluunniit kommunit arlallit peqatigiillutik suleqatigiinnerisigut.

 

Sulilersitsinissamut suliniuteqartunut peqataaniartillutit piumasaqaataavoq:

• Peqqissutsikkut ajornartorsiuteqannginnissat
• Inuttut pissutsit allat pissutigalugit aporfeqannginnissat

Patsisissaqanngitsumik sulilersitsinissamut neqeroorutigineqartoq itigartitsissutigissagukku, sapaatit-akunnerini sisamani aningaasatigut ikiorserneqarsinnaanermut pisinnaatitaanerit annaassavat. Tamanna mattunneqarallarnermik taaneqartarpoq. Sapaatit-akunneri sisamat qaangiuppata sulinngikkallarnermi ikiorsiissutit pisartakkatit nutaamik naatsorsorneqassapput. Tassa imaappoq tapiissutit ikilineqassapput, pissutigalugu sapaatit-akunnerini sisamani isertitatit ikinnerusimammata.

 

Inuit sulilersitsinermik suliniutinut peqataatinneqartut suliniutip ingerlanerani suliffeqarnermut piareersimasussaatitaassapput. Tamannali suliniutip ingerlanerani ilinniagaqarnermik ingerlataqartunut piumasaqaataanngilaq.

 

Piffissami sulilersitsiniaanermi akissarsiaqassaatit. Akissarsiaqartillutit sulinngikkallarnermi ikiorsiissutinik pissarsisinnaanngilatit.