Ilinnut soraarnerussutisialimmut inissiamik najukkanik iluarsaassinissamut taarsigassarsiassat

Soraarnerussutisiallit inissiamik najukkaminnik iluarsaassinissamut aningaasanik nassaarniapiloortarput. Taamaattumik Namminersorlutik Oqartussat iluarsaassassanut pisariaqartunut erniaqanngitsunik akilersugassaanngitsunillu taarsigassarsititsinissamut, taamaalillutillu angerlarsimaffinni toqqissisimanartunik avatangiiseqarlutit najugaqaannarsinnaanissannut neqerooruteqarput.

Soraarnerussutisiaqaruit imaluunniit siusinaartumik soraarnerussutisiaqaruit inissiap aalajangersimasumik pisoqaassuseqarnissaa angissuseqarnissaalu piumasaqaataanngilaq.

Taamaallaat iluarsaassinermut taarsigassarsitinneqarnissamik qinnuteqarsinnaavutit, tassalu pitsanngorsaanernut alliliinernulluunniit taarsigassarsitinneqarsinnaanngilatit..

Namminersorlutik Oqartussat inissiami pioreersumi soraarnerussutisialimmit atorneqartumi, aammalu soraarnerussutisiallip taassumalu aapparisinnaasaata ataatsimut kisimiillutik inissiamut piginnittuuffigisaanni iluarsaassinissamut 300.000 koruunit tikillugit taarsigassarsititsisinnaapput.

Utoqqalinersianik, siusinaartumik soraarnerussutisianik imaluunniit atorfilittut soraarnerussutisianik pissarsisaruit soraarnerussutisialittut isigineqassaasit.

Aappaasutut inooqatitut nalunaarsugaq imaluunniit aapparinnermik assingusumik inooqatigisaq, ukiuni marlunni kingullerni inooqatigisimasaq isigineqassaaq.

Iluarsaassinernut, inissiap atorneqarnerata allanngornissaanik siunertaqarfiusunut imaluunniit allannguiffiusunut, imaluunniit allatut inuulluarniutitut ilusiligaasunut taarsigassarsititsisoqarsinnaanngilaq.

Taarsigassarsiat erniaqanngitsutut akilersugassaanngitsutullu tunniunneqassapput, inissiap tamakkerluni qularnaveeqqusiissutigineqarneratigut qulakkeerneqassallutik. Taarsigassarsiani inissiaq qularnaveeqqusiullugu taarsigassarsiaasimasinnaasut allat pingaartinneqarput.

Soraarnerussutisialinnut taarsigassarsiassat pissarsiariniarukkit matuma kinguliani piumasaqaatit naammassisimasariaqarpatit:

• Soraarnerussutisiaqassaatit
  Utoqqalinersianik, siusinaarluni soraarnerussutisianik imaluunniit atorfilinnut soraarnerussutisianik pissarsinissamut pisinnaatitaaffeqassaatit.
  
  
• Inissiamik piginnittuussaatit
  Aapparisimasinnaasallu marluullusi kisimiillusi inissiamik piginnittuussaasi. Aappaasutut inooqatitut nalunaarsugaq imaluunniit aapparinnermik assingusumik inooqatigisaq, sivikinnerpaamik ukiuni marlunni kingullerni inooqatigisimasaq isigineqassaaq.
  
  
• Aningaaserivimmit taarsigassarsinissamut itigartinneqarsimassaatit
  Iluarsaassinissamut taarsigassarsinissamut aningaaserivimmiit imaluunniit realkredit-eqarfimmiit itigartinneqarsimallutit uppernarsarsinnaassavat.
  
  
• Inissiaq najukkat sillimmaserneqarsimassaaq
  Inissiaq ikuallattoornissamut ajoquserneqarnissamullu sillimmaserneqarsimassaaq. Akiligassanut akilinngitsuukkanik akiitsoqartoqassanngilaq.
  
  
• Aapparisat akuersisimassaaq
  Aappat piginneqataasimaguni iluarsaassinissamut qinnuteqarnissamullu allakkatigut akuersisimassaaq.
  
  
• Illit nammineerlutit sinneranut akiliisinnaassaatit
  Aningaasartuutit sinnerinut, taarsigassarsianit matussuserneqarsinnaanngitsunut nammineerlutit akiliisinnaassaatit.
  
  
• Aaqqissuussinermut matumunngaannaq qinnuteqassaatit
  Qinnuteqaatigineqartunut peqatigitillugu illuliortiternernut aningaasalersuinermut inatsimmi kapitali 3 naapertorlugu taarsigassarsianik imaluunniit kapitali 4a naapertorlugu tapiissutinik pissarsisinnaanngilatit.

Allakkatigut qinnuteqaat Ineqarnermut, Attaveqaasersuutinut Isorliuinerusunullu Naalakkersuisoqarfimmut e-mail boligfinansiering@nanoq.gl aqqutigalugu nassiunneqassaaq
Qinnuteqaatip imarissavai:

1) Iluarsaassassatut kissaatigineqartut allaaserineri
2) Inissiaq pillugu nassuiaat, taakkununnga pisoqaassusia, angissusia qanorlu innera ilanngullugu
3) Suliarineqarnerani aningaasartuutissat katinnerinut missingiut
4) Suliassami nunaminertamik atugassinneqarnissaq pisariaqartinneqarpat, kommunimiit nunaminertaq atugassiissut inniminniissulluunniit
5) Nammineerluni aningaasalersuinissamut atugassanik pissarsisinnaanermut uppernarsaat
6) Qinnuteqartup CPR-normua najugaqarnermullu uppernarsaat
7) Inissiamik piginnittuunermut uppernarsaat
8) Qinnuteqartup pisortanut akilinngitsuukkanik akiitsoqannginneranut Akiliisitsiniartarnermut Oqartussaasuniit nalunaarut

Malugalugu
Inissiamut aningaasalersuinissamut taarsigassarsianik qinnuteqarniaruit, pisortanit taarsigassarsiat tamakkiisut 0,5%-iisa nalinginut akitsuutinik akiliisussaavutit. Akitsuutit qinnuteqaativit suliarineqarnerani aningaasartuutinut matussutaasussaapput.

Taarsigassarsiat aallaqqaammut Namminersorlutik Oqartussanit neriorsuutitut tunniunneqassapput.

Taarsigassarsitinneqarnissamut neriorsuut annaassanngikkukku:

• Taarsigassarsitinneqarnissamut neriorsuutip pissarsiarineraniit ukiut marluk qaangiutsinnagit inissiap iluarsaanneqarnera aallartissavat.
• Taamaattumik ukiut marluk iluanni sanaartugassaatit aallartinneqarsimanersoq paasissutissiissummik nassiussissaatit.
• Taarsigassarsitinneqarnissamik neriorsuutip pissarsiarineraniit ukiut pingasut qaangiutsinnagit inissiami najukkanni suliat naammassisimassapput inissiarlu atorneqalersimassalluni.

Taakku malinngikkukkit taarsigassarsinissamut neriorsuut siumut nalunaarnertaqanngitsumik atorunnaassaaq.

Taarsigassarsiat akilerneqarnissaat
Aatsaat inissiami suliat naammassereerpata, inissiarlu najugaqarfigineqalernissaminut piareerpat taarsigassarsiat tunniunneqassapput. Taarsigassarsiat tunniunneqarnissaannut uku nassiutissavatit:

• Kommunimiit atuilernissamut akuersissut
• Sanaartornermut naatsorsuutit inaarutaasut uppernarsarneqarsimasullu
• Qularnaveeqqusiussaqarluni taarsigassarsinermut allagartap allaqqaarnera nalunaarsorneqarsimasoq naqissuserneqarsimasorlu uparuaanertaqanngitsoq
• Sillimmasiinermut uppernarsaat
• Qularnaveeqqusiiffigisap nalunaarutaata oqaasertalikkap allaqqaarnera

Soraarnerussutisianut taarsigassarsiarititat erniaqanngillat akilersugassaanatillu, kisiannili pisut ilaanni utertillugit akilersinneqartussaallutik – soorlu:

• inissiaq tunigukku (piginnittut nikinnerat),
• inissiaq tamakkerlugu ilaaluunniit attartortikkukku,
• inissiami najugaqarunnaaruit, imaluunniit
• ikuallattoornissamut illullu ajoqusersinnaaneranut sillimmasiissummik atuuttumik peqarunnaaruit.

Taamatut pisoqartillugu nalinginnaasumik taarsigassarsiat erniinnaartumik utertinneqartussanngortarput, akilerneqanngippatalu suliaq akiliisitsiniartarfimmut nassiunneqarsinnaavoq.

Utertitsillutit akiliisinnaanngikkuit
Taarsigassarsiat utertinnissaannut akiliisinnaanngikkuit pilertornerpaamik Namminersorlutik Oqartussat attaveqarfigissavatit. Taarsigassarsiat tamakkiisumik ilaannaasumilluunniit ingerlaannarsinnaanersut Namminersorlutik Oqartussat naliliinissamut periarfissaqarput – soorlu:

• inissaq aappannit inooqatinnilluunniit tiguneqassappat,
• paaqqutarinnittarfimmut nuukkuit, aammalu qanigisat inissiami najugaqaannarnissamik kissaateqarpat,
• pissutsinik immikkut ittunik pisoqarpat, taarsigassarsiallu ingerlaannarallarnissaa pissusissamisoortutut isigineqarsinnaappat.

Eqqumaffigineqassaaq, tamatigut taarsigassarsiat ingerlaannarsinnaanersut Namminersorlutik Oqartussat naliliisartussaammata – illit tamanna piumasarisinnaannginnakku. Taamaattumik pissutsit atukkatit allanngorpata piffissaalluarallartillugu Namminersorlutik Oqartussanut paasissutissiinissat pingaaruteqarpoq.