Illitsersuut: Inissiani pioreersuni iluarsartuussinernut taarsigassarsiat

Namminersorlutik Oqartussanit iluarsartuussinermut taarsigassarsiat – ilisimasassatit

Iluarsartuussinissamut taarsigassarsiat erniaqanngillat akilersugassaanatillu, aammalu inissiap qularnaveeqqusiissutigineratigut qulakkeerneqartussaallutik. Atugassarititaasunik uppernarsaanissamullu piumasaqaatinik arlalinnik, qinnuteqannginninni eqqumaffigisassannik atuutsitsisoqarpoq.

Inissiamik ukiut 20-t sinnerlugit pisoqaassusilimmik pigisaqaruit, taassumalu iluarsaannissaa, pitsanngorsarnissaa allinissaaluunniit kissaatigigukku Namminersorlutik Oqartussanut taarsigassarsinissamik qinnuteqaateqarsinnaavutit. Taarsigassarsinermi aningaasartuutissat 40%-ii tikillugit matussuserneqarsinnaapput – taamaattorli annerpaamik 300.000 koruuniussallutik. Illit nammineerlutit sinneri aningaasalersussavatit uppernarsassallugillu.

Matuma kinguliani malitassat allattorsimaffiat aammalu piumasaqaatit, piffissaliussat, aningaasaqarneq qinnuteqarnerullu ingerlasarnera pillugu paasissutissat pingaarutillit ilinnut saqqummiunneqarput.

Allakkatigut qinnuteqaat Ineqarnermut, Attaveqaasersuutinut Isorliunerusunullu Naalakkersuisoqarfimmut e-mail boligfinansiering@nanoq.gl aqqutigalugu nassiunneqassaaq

Namminersorlutik Oqartussaniit iluarsartuussinissamut taarsigassarsitinneqarnissamut uku naammassineqartussaapput:

• Piffissami qinnuteqarfiusumi inissiaq minnerpaamik ukiunik 20-nik pisoqaassuseqassaaq.
• Inissiaq nammineerlutit pigissavat, tassanilu aappat imaluunniit meeqqat ukiukinnerusut ineqatigissavatit.
• Inissiaq ikuallattoornissamut illullu ajoqusersinnaaneranut sillimmaserneqarsimassaaq, aammalu kiligassamut akilinngitsuukkanik akiitsoqartoqassanngilaq.
• Pisortanut akiitsunik akilinngitsuukkanik, 25.000 koruunit sinnerlugit amerlassusilinnik akiitsoqassanngilatit (tak. § 29).
• Suliassami aningaasartuutinit tamarmiusunit minnerpaamik 60%-inik akiliisinnaallutit uppernarsarsinnaassavat.

Inissiamut ataatsimut ataasiinnarnik taarsigassarsititsisoqarsinnaavoq, aamma inissiaq allineqareernermini 110 m²-init anginerussanngilaq.
OBS: Taarsigassarsiat inuulluataarniutinut pitsannguinermut, soorlu spabadinut, jacuzzinut assigisaannulluunniit atorneqarsinnaanngillat.

Iluarsartuussinermut taarsigassarsinissamik qinnuteqarninni allakkatigut qinnuteqaat Namminersorlutik Oqartussanut nassiutissavat. Qinnuteqaatit ukununnga uppernarsaatinik imaqassaaq:

1. Suliassat allaaserineqarneri – suut iluarsaassassaappat, pitsanngorsarneqartussaappat allineqartussaallutilluunniit.
2. Inissiaq pillugu paasissutissat – tassunga pisoqaassusia, angissusia maannalu qanoq innera ilanngullugit.
3. Aningaasartuutissanut missingiut – suliassanut aningaasartuutissat tamakkerlugit.
4. Nunaminertamik atugassiissutaasinnaasoq – alliliinermi nunaminertamik atugassiinermut akuersissut pisariaqartinneqarpat.
5. Nammineerluni aningaasaliissutissanut uppernarsaat – soorlu kontop naqinnera, taarsigassarsinissamut neriorsuut, ileqqaakkat il.il.
6. Najukkamut uppernarsaat aamma CPR-normu.
7. Piginnittuunermut tunngassuteqartunut uppernarsaat – soorlu piginnittuunermut uppernarsaat imaluunniit eqqartuussivikkoortumik nalunaarsuinermut uppernarsaat.
8. Akiitsut pillugit nalunaarut – pisortanut akiitsunik akilinngitsuukkanik 25.000 koruunit sinnerlugit akiligassaqannginninnut akiliisitsiniartarnermi oqartussaasunit uppernarsaat.

Pingaarutilik: Suliassat minnerpaamik 60%-iinut nammineerlutit akiliisussaavutit. Taarsigassarsiat 40%-it tikillugit – taamaattorli annerpaamik 300.000 koruuninik - matussusiinermut atorneqartussaapput.

Qinnuteqaativit nassiutinnginnerani piumasaqaatit naammassisimanerlugit, aammalu uppernarsaatissat pisariaqartut tamaasa piareersimanerlugit qulakkiissavat. Amigaateqannginnissat qulakkeerniarlugu eqqaamasassat allattorsimaffiat una atoruk.

1. Piumasaqaatit naammassisimavigit?

o Inissiamik piginnittuuvutit tamannalu uppernarsarsinnaallugu
o Inissiaq aappallu, imaluunniit meeqqavillu ukiukitsut ilagalugit najugaqarfigaat
o Inissiaq minnerpaamik ukiunik 20-nik pisoqaassuseqarpoq
o Inissiaq ikuallattoornissamut illullu ajoqusernissaanut sillimmasigaavoq (akiligassanut akiitsoqartoqanngilaq)
o Pisortanut akiitsunik akilinngitsuukkanik 25.000 koruunit sinnerlugit akiitsoqanngilatit
o Inissiaq allineqareernermini 110 m²-t sinnerlugit angissuseqalissanngilaq
o Ukiuni kingullerni tallimani inissiamut najukkannut iluarsartuussinermut taarsigassarsisimanngilatit tapiissutisisimanalluunniit

2. Nammineerlutit akiligassatit akilersinnaavigit?

o Suliassami aningaasartuutit minnerpaamik 60%-ii akilersinnaavatit
o Tamanna uppernarsarsinnaavat – soorlu kontop naqinnera, sipaakkat taarsigassarsinissamulluunniit neriorsuut atorlugu

Taarsigassarsiat 40%-it tikillugit matussutaasussaapput – taamaattorli annerpaamik 300.000 koruuniussapput.

3. Qinnuteqarnissamut allakkiat uku piareersimatippigit?

o Suut iluarsaanneqassanersut, pitsanngorsarneqassanersut allineqassanersulluunniit pillugit naatsumik allakkiaq
o Inissiaq pillugu nassuiaat – pisoqaassusia, angissusia maannalu qanoq innera
o Suliassanut tamarmiusunut missingersuut akinulluunniit missingiut
o Suliassami nunaminertamik atugassinneqarnissaq pisariaqartinneqarpat nunaminertamik atugassiissut
o Nammineerluni aningaasalersuisinnaanermut uppernarsaat (aningaaserivik, ileqqaakkat il.il.)
o Najukkamut uppernarsaatip assilinera aamma CPR-normu
o Piginnittuunermut uppernarsaat (eqqartuussivitsigut nalunaarsorneqarneq piginnittuunermulluunniit uppernarsaat)
o Pisortanut akilinngitsuukkanik akiitsoqannginnerit pillugu Akiliisitsiniartarnermut Oqartussaasuniit nalunaarut

Suliaq naammassippat

o Sanaartornermut naatsorsuutinik uppernarsarneqartunik suliaqartitsissaatit
o Qularnaveeqqusiussaqarluni taarsigassarsinermut allagartaq nalunaarsorneqassaaq (eqqartuussivitsigut nalunaarsortillugu aammalu uparuaanertaqanngitsumik)
o Ikuallattoornissamut illullu ajoqusernissaanut sillimmasiissummik atuuttumik suli peqassaatit
o Atuilernissamut akuersissut nassiutissavat (inissiaq allisimagukku)

Piffissaliussat malitassatit

o Neriorsuuteqartoqarneraniit kingusinnerpaamik ukiut marluk qaangiunnerini suliassat aallartissavatit
o Kingusinnerpaamik ukiut pingasut qaangiunnerini naammassisimassaatit uppernarsaammillu nassiussisimassallutit

Ingerlaavartumik akiliisoqartarnissaanik qinnuteqarsimaguit

o Namminersorlutik Oqartussaniit akuersissummik immikkut ittumik pissarsisimassaatit
o Suliamut naammassisamut atortunullu tunniunneqarsimasunut fakturamik nassiussisimassaatit
o Entreprenørip unneqqarissumik pissusilersornermut nalunaarut atsiussavaa
o Suliassat tamarmik naammassippata uppernarsaat inaarutaasoq nassiutissavat

Iluarsartuussinissamut taarsigassarsiat aningaasartuutissat 40%-ii tikillugit matussutaasinnaapput – taamaattorli annerpaamik 300.000 koruuniussallutik. Illit nammineerlutit aningaasalersuutissat sinneri akilissavatit.

Nammineerluni akiligassanut assersuut:
Aningaasartuutissatit tamarmiusut 500.000 koruuniuppata, annerpaamik 200.000 koruuninik taarsigassarsitinneqarsinnaavutit (40 %-it). Illit nammineerlutit 300.000 koruunit (60%-it), soorlu ileqqaakkanniit, aningaaserivimmit taarsigassarsianniit allatulluunniit aningaasalersuutissatut pigisanniit akilissavatit.

Nammineerlutit aningaasaliissutissatit uppernarsarsinnaassavatit.
Uppernarsaatit tassaasinnaapput:

• Aningaaserivimmiit kontop naqinnera
• Aningaaserivimmiit imaluunniit aningaasanik taarsigassarsititsisarfimmiit taarsigassarsitinneqarnissamut uppernarsaat
• Allakkatigut uppernarsaat alla

Akitsuutit
Qinnuteqaruit taarsigassarsiarititat amerlassusiisa 0,5%-iinut akitsuutit akilissavatit. Taakku suliap suliarineqarneranut matussutaassapput, nalinginnaasumillu aningaasat tunniunneqarnerinut atatillugu akilersinneqartussaallutik.

Iluarsartuussinissamut taarsigassarsiarititat aatsaat suliaq naammassippat aammalu uppernarsaatit pisariaqartinneqartut inissippata akilerneqassapput.

Malitassaq pingaarneq: Suliap naammassereernerani akiliineq (§33)
Uppernarsaatissat uku tiguneqarpata akuerineqarpatalu Namminersorlutik Oqartussaniit taarsigassarsiat tunniunneqassapput:
• Sanaartornermut naatsorsuutit akuerisat (aningaaserivimmit, kukkunersiuisumit aningaasanilluunniit taarsigassarsititsisarfimmit akuerisat)
• Qularnaveeqqusiussaqarluni taarsigassarsinermut allagartaq uparuaanertaqanngitsoq nalunaarsorneqarsimasorlu
• Ikuallattoornissamut illullu ajoqusernissaanut sillimmasiinermut uppernarsaat
• Alliliinerni: atuilernissamut akuersissut

Taamaattumik tunngaviusumit illit nammineerlutit suliap tamarmiusup naammassinissaata akuerineqarnissaatalu aningaasalersuisussaavutit.


Periarfissaq: Ingerlaavartumik akiliisarneq (§33a)
Namminersorlutik Oqartussat aalajangiisinnaapput, suliap siumut ingerlanera malillugu taarsigassarsianut ingerlaavartumik akiliisassallutik. Tamanna taamaallaat atorneqarsinnaavoq:
• Entreprenørimiit fakturami suliat naammassereersut aamma atortut tunniunneqareersut pineqarpata
• Akiliineq akiliigallarnerunngippat imaluunniit akiliinissamut pilersaarut malillugu akiliinerunngippat
• Suliap ingerlanerani periarfissaq tamanna Namminersorlutik Oqartussanit aalajangerneqarsimappat

Ingerlaavartumik akiliisarnissaq pisinnaatitaaffiginngilat – tamatumunnga pisuni ataasiakkaani naliliinerit aalajangersimasut tunngavigineqartarput.

Ingerlaavartumik akiliisoqartarnissaa akuerineqarpat:
• Namminersorlutik Oqartussanut akiliisarnissaq pillugu qinnuteqaat nassiutissavat
• Entreprenørimiit suliat naammassinerinut atortunullu tunniussanut fakturaliornermi unneqqarissumik pissuseqarnissamut neriorsuut ilanngutissavat
• Suliaq tamarmi naammassivikkaluarpalluunniit uppernarsaatit § 33-mi taaneqartut tamaasa nassiuttussaavatit
• Namminersorlutik Oqartussat uppernarsaatit inaarutaasut nassiunneqarnissaannut piffissamut killissarititaasumik aalajangiissapput – piffissaliussaq qaangerneqarpat taarsigassarsiat erniinnaartumik utertitassanngorlugit akiligassanngortinneqassapput
• Pisuni immikkut ittuni Namminersorlutik Oqartussat piffissamut killiliussaq sivitsorsinnaavaat, soorlu eqqartuussivitsigut nalunaarsuinissaq kingusinaarsimappat

Suliassami piffissanut killiliussat – uniorneqarpata neriorsuut atorunnaassaaq (§32)
• Suliassaq neriorsuuteqartoqarneraniit kingusinnerpaamik ukiut marluk qaangiunnerini aallartinneqarsimassaaq
• Suliassaq neriorsuuteqartoqarneraniit kingusinnerpaamik ukiut pingasut qaangiunnerini naammassineqarsimassaaq atorneqalersimassallunilu

Piffissanut killiliussat malinneqanngippata, neriorsuut ingerlaannartumik atorunnaassaaq.

Iluarsartuussinissamut taarsigassarsiat inissiat najukkat taarsigassarsianut qularnaveeqqusiullugu eqqartuussivinni nalunaarsorneqassaaq. Taarsigassarsiat erniaqanngillat akilersugassaanatillu, kisiannili pisut ilaanni utertillugit akilersinneqartussaallutik.

🔸 Inissiaq qularnaveeqqusiissutigalugu taarsigassarsiat (§16)

• Taarsigassarsiat illup qularnaveeqqusiissutigineratigut qulakkeerneqassapput eqqartuussivitsigullu nalunaarsorneqassallutik.
• Qularnaveeqqusiissuteqarluni taarsigassarsinermi allagartami akiligassat pioreersut eqqarsaatigineqassapput (soorlu realkredit-imut imaluunniit aningaaserivimmut taarsigassarsianut).
• Qularnaveeqqusiussaqarluni taarsigassarsinermi allagartaq inatsisitut sunniuteqartussaavoq, aammalu taarsigassarsiat sumiginnaanermi akileqquneqarsinnaapput, soorlu:

o Inissiaq aserfallatsaalinngikkukku nalingalu ajorseriarpat
o Sillimmasiissummik atuuttumik peqanngikkuit
o Inissiaq unioqqutitsillutit attartortikkukku imaluunniit inuussutissarsiornermut atorukku
o Inissiaq ilinnut taarsigassarsisuusumut ineqarfittut atorneqarunnaarpat

Qularnaveeqqusiussaqarluni taarsigassarsinermi allagartaq kingusinerusukkut inissiaq tunissagukku imaluunniit inissiamut nutaanik taarsigassarsissaguit periarfissannut sunniuteqarsinnaavoq.

🔸 Piginnittut nikinneranni utertitsilluni akiliinissaq (§17–18)
Inissiaq tunissagukku malitassatut pingaarnertut taarsigassarsiat erngerluni akilerneqartussaapput – matumani imatut pisoqanngippat:

• Inissiamik aapparisannut tunniussineq
• Averuserneq imaluunniit avinneq
• Namminersorlutik Oqartussat taarsigassarsiat atugassarititaasut immikkut ittut atorlugit ingerlaannarnissaannut akuersissuteqassapput

Piginnittoqarneq allanngussappat Namminersorlutik Oqartussanut ilisimatitsinissaq illit akisussaaffigaat. Taamaaliunngikkuit erngerlutik taarsigassarsiat utertillugit akileqqusinnaavaat.

🔸 Erniinnaartumik utertitsilluni akiliineq (§34)
Aamma taarsigassarsiat erngerluni akileqquneqarsinnaapput:

• Qinnuteqaammi paasissutissanik eqqunngitsunik allassimaguit
• Taarsigassarsinissamut neriorsuummi piumasaqaatit naammassinngikkukkit
• Piffissaliussap iluani uppernarsaatit inaarutaasut nassiutinngikkukkit (§33a, imm. 4)

Piumasaqaatit naammassisimagaluarukkilluunniit taarsigassarsitinneqarnissat qulakkeersinnaanngillat. Namminersorlutik Oqartussaniit inatsisit ukiumoortumillu missingersuutit malinneqartussaapput.

Itigartitsinissamut periarfissaqarneq:
Inatsimmi piumasaqaatit malinngikkukkit, uppernarsaatissanik amigaateqaruit, pisortanut akiitsunik akilinngitsuukkanik, 25.000 koruunit sinnerlugit amerlassusilinnik akiligassaqaruit imaluunniit aningaasaliissutit nungussimappata itigartinneqarsinnaavutit. Aalajangiineq allaganngorlugu tunniunneqassaaq tunngavilersugaassallunilu.

Maalaaruteqarnissamut ilitsersuut:
Itigartinneqarsimaguit maalaaruteqarnissamut periarfissaqarputit. Qanoq ilillutik qaqugulu maalaarummik nassiussisinnaanersutit, aammalu kikkut tigusisussaanersut pillugu ilisimatinneqassaatit.

Apeqqutissaqarpit?
Piumasaqaatit, uppernarsaatit sulialluunniit ingerlanissaa pillugu nalornissuteqaruit Ineqarnermut, Attaveqaasersuutinut Isorliunerusunullu Naalakkersuisoqarfik attaveqarfigissavat.

Qinnuteqaatip allartinnginnerani malitassat allassimaffiat atuaruk – taamaalillutit piffissamik sipaarsinnaavutit kipiluttunartoornissallu pinngitsoortissinnaallugu.
Ilitsersuut pinngitsoornak atuaqqissaaruk, aammalu qinnuteqaativit nassiutinnginnerani uppernarsaatissat tamaasa isumagikkit. Apeqqutissaqaruit Namminersorlutik Oqartussaniit ikiuunnissamut piareersimasoqarpoq.
Suliassaatinni iluatsitsilluarina!

Taarsigassarsinissamik qinnuteqarusukkuit Ineqarnermut, Attaveqaasersuutinut Isorliunerusunullu Naalakkersuisoqarfik email boligfinansiering@nanoq.gl aqqutigalugu attaveqarfigiuk.