Qamutit motoorillit akileraarutaat

Qamutit motoorillit akileraarutaannik akiliinissaq illit biilimik piginnittutut aqqusinermik atuisartutut akiligassarivat.

Illit inuinnartut imaluunniit suliffeqarfimmi biilimik piginnittutut qamutit motoorillit akileraarutaannik akiliisussaatitavuutit.

Qamutit motoorillit aalajangersimasut kisimik akiliinnginnissamut aalajangersarneqarnikuupput.

Qamutit motoorillit akileraarutaannik akiliisussaatitaasut ukuupput:

• Biilit
• Motorcykelit
• Lastbilit
• ATV
• Biilit nioqqutissanik assartuutit
• Traktorit
• Biilit innaallagiartortut
• Taxat
• Bussit
• Orsussamik assartuutit

1. Biilit qatserutit
2. Biilit napparsimasunik angallassissutit aamma politiit biilii
3. Qamutit motoorillit nunat allamiut aallartitaqarfiinit, konsuleqarfiinit imaluunniit aallartitaqarfinni sulisunut qallunaatut innuttaassuseqanngitsunit pigineqartut
4. Savaatillit tuttuutillillu qamutai motoorillit sulinermut tunngatillugu atugassiat. (Illoqarfiup nunaqarfiullu avataaniippata, sumiiffimmilu motoorilinnik qamutinik atuisukippat).
5. Qamuteralaat sanaartornerullu iluani suliaqartut biilitut naatsorsuunneqanngitsut.
6. Naalakkersuisut Naalakkersuisulluunniit piginnaatitaasa qamutit motorillit innarluutilinnik angallassissutit, qamutit toqusut illerfiinik assartuutit aammalu bus-it nalunaaqutaq aalajangersimasoq malillugu ingerlaartartut akileraarummik akiliinnginnissaannut akuerisinnaavai.

Biilit qamutillu allat motoorillit oqimaassusaat akileraarutissap annertussusissaanut aalajangiisuusarput:

Qamutip motoorillip oqimaassussaa 1.000 kg tikillugu
Ukiumut affakkaartumik akileraarut: 3.277 kr. (Akileraarutip ukiumut annertussussaa katillugu: 6.554 kr.)

Qamutip motoorillip oqimaassussaa 1.001-miit 1.200 kg tikillugu
Ukiumut affakkaartumik akileraarut: 5.024 kr. (Akileraarutip ukiumut annertussussaa katillugu: 10.049 kr.)

Qamutip motoorillip oqimaassussaa 1.201-miit 1.500 kg tikillugu
Ukiumut affakkaartumik akileraarut: 5.373 kr. (Akileraarutip ukiumut annertussussaa katillugu: 10.747 kr.)

Qamutip motoorillip oqimaassussaa 1.501-miit 1.800 kg tikillugu
Ukiumut affakkaartumik akileraarut: 7.615 kr. (Akileraarutip ukiumut annertussussaa katillugu: 15.231 kr.)

Qamutip motoorillip oqimaassussaa 1.800 kg qaangerlugu
Ukiumut affakkaartumik akileraarut: 8.787 kr. (Akileraarutip ukiumut annertussussaa katillugu: 17.575 kr.)

Motorcykelit
Ukiumut affakkaartumik akileraarut: 1.770 kr. (Akileraarutip ukiumut annertussussaa katillugu: 3.540 kr.)

Malugiuk
Qamutinut motoorilinnut innaallagissamik imaluunniit brintimik ingerlateqartunut, aammattaaq plug-in-hybridinut immeqqittakkanik batteriinik ingerlateqartunut 1. april 2020 aallarnerfigalugu ukiumut 6.554 kr. akileeraarutaalerpoq.

Qamutit motoorillit mikinerit aqqusineqanngitsukkut ingerlassutaasinnasut sisamanik amerlanernilluunniit assakaasullit (ATV) ukiumut akileraarutaat 1. april 2021 aallarnerfigalugu appartineqarpoq 3.277 kr.-mit 2.000 kr.-mut, taamaalilluni ukiumut affakkaartumik akileraarut 1.000 kr-iulerluni.

Akiliutinik utertitsineq
Akileraartarnermut Aqutsisoqarfik qamutinut motoorilinnut akileraarutinut akiliutinik utertitsisarpoq biilimik piginnittoq akiliinaarsimatillugu imaluunniit biili atorunnaarsinneqarsimatillugu akileraaruteqarfiusussaq sioqqullugu qamutinut motoorilinnut akileraarut akilerneqareersimappat.

Illit biilimik piginnittutut nammineerlutit politeeqarfimmut saaffigiginnissaatit.

Biilivit allattorsimaffimmi ilaalernissaa politeeqarfimmiit suliarineqassaaq Akileraartarnermullu Aqutsisoqarfimmut ingerlateqqinneqassalluni, taamatuttaaq iliortoqassaaq biili atorunnaarsinneqalerpat. Paasisutissat politeeqarfimmit tunniunneqartut tunngavigalugit Akileraartarnermut Aqutsisoqarfimmiit Qamutit motoorillit akileraarutaannik akileeqqusisussitit nassiunneqartarput, akileeqqusissutilluunniit unitsinneqartarlutik.

Toqqaannartumik akiliisarnermik taamaatitsineq
Biilip piginnittuanik allanngortinnermi piginnittuusimasup Netsimut aningaaserivik aqqutigalugu akiliisarnini nammineerluni webbankikkut aningaaseriviulluunniit attavigineratigut taamaatissavaa.

Biilit akileraartussaatitaasut akileraarutinillu akiliisannginnissamut akuerisaasut tamarmik nalunaarsorsimaffiani allattorsimaffimmi ilanngunnissamut immersugassat politiit suliareriarlugit Akileraartarnermut Aqutsisoqarfimmut nassiuttarpaat.

Akileraartarnermut Aqutsisoqarfiup paasissutissat politiinit pissarsiarisatik tunngavigalugit akileraarutinik akileeqqusissutit nassiussortarpaat, taamattaarlu atorunnaarsinneqarsimasunut akiligassiisarnernut taamaatitsisarlutik.

Qamutit motoorillit akileraarutaannut akiliutitit landskarsimut nakkartinneqartarput.

Biilit atorunnaarsinnagit piginnittuanik allanngortitsineq
Qamutip motoorillip akileraarutitaa piginnittup allanngortinnerani taamaaginnassaaq, piginnittoq kisimi, biiliunngitsorli allanngormat. Imannak paasillugu, qamutit motoorillit akileraarutitaat biilinut malinnaasarput.

Ass. Qamutip motoorillip akileraarutaa tunisisup oktoberimi akilersimappagu illillu biili januarimi pisiaralugu, aatsaat aprilip aallaqqaataani akileraarummik akiliissaatit, biilip pisiavit qamutinut motoorilinnut akileraarutaat qaammatinut arfinilinnut siumoortumik akilernaqareermat.

Biilimik tunisisumut
Biilimik atornikumik tunisisoqartillugu Akileraaruseriffiup misissortarpaa tunisisoq Qamutit motoorillit akileraarutaannik akiligassaqarnersoq akiliinaaruteqarsinmanersorluunniit.

Paasinarsippat biilimik tunisisoq qamutinut motoorilinnut akileraaruteqarfiusumi akiligassaqartoq, suliaq akiliisitsiniartarfimmut ingerlateqqinneqassaaq, tassanngaanniillu biilimik tunisisumut akileeqqusissummik nassiussisoqassaaq.

Biilimik atorunnaarsitsineq
Biili atorunnaarsinneqaraangat akiliinaarutaasimasoq biilimik atorunnaarsitsisumut utertinneqartarpoq, atorunnaarsitsinermit qaammatip tulliata aallaqqataani.

Qamutinut motoorilinnut akiliinaarsimaguit aningaasat ilinnut utertinneqannginnerani misissorneqassaaq pisortanut akiligassaqannginnersutit, akiligassaqaruillu aningaasat ilinnut tunniunneqannginnerini akiligassarnut toqqaannartumik matusissutigineqaqqaassapput. Akileertarnermut Aqutsisoqarfimmi sullissisorpit aningaasat nassiussat takussutissartaa (udbetalingsbilag) ilanngullugu ilinnut nassiutissavaa, sumut akiliutinneqarsimanersutit takussutissiaralugu.

Paasinarsippat qamutit motoorilinnut akileraaruteqarfiusumi akiligassaqartutit, suliaq akiliisitsiniartarfimmut ingerlateqqinneqassaaq, tassanngaanniillu akileeqqusissummik nassinneqassaatit.

Suliap akiliisitsiniartarfimmut ingerlateqqinneqarnermini imarisarpai:

• Akiligassallip akiligassaasa allattorsimaffiata takussutissartaa (Biilimik piginnittup Akileraaruseriffimmiit takussutissiartaa)
• Biilivit allattorsimaffimmiinneranut/atorunnaarsinneranut takussutissartaata kopiia

Piffissaq eqqorlugu qamutit motoorillit akileraarutaannik akiliisimanngikkuit Akileraartarnermut Aqutsisoqarfiup akileraaruseriffiata akiliinissamut tuavisaarummik nassissavaatit, taamaliortoqartillugu akiligassavit qaavatigut akitsuummik, tassa 500 kr.-mik nassinneqassaatit.

Akileeqqusilluni tuavisaarut majip 15-ata majillu 20-ata aamma novemberip 15-ata novemberillu 20-ata akornanni nassiunneqartarpoq.

Akileeqqusilluni tuavisaarummi paasissutissiissutigineqartarpoq qamutinut motoorilinnut akileraarut tuavisarinermilu tapiliunneqartoq kingusinerpaamik ullut 8-t qaangiutsinnagit akilernqassasoq. Ilanngullugu paasissutissiissutigineqartarpoq tuavisaarinerup kingorna ullut 8-t qaangiutsinnagit akiliisimannginnermi biilit nummerpladii politiinit peerneqartartut. Ullut 8-t qaangiutsinnagit qamutit motoorillit akileraarutaannik akiliiguit, kontomut 6471 1000842-mut ikisinikkut, ilanngullugu afgift@nanoq.gl-mut akiliisimanermut uppernarsaammik nassiussissaatit.

Biilivit atorunnaarnissaanut pilersaaruteqaruit ukiup affaanut akiligassaq tigutinnagu isumaqatigiissutivit atorunnaarsinneqarnissaa eqqaamassavat. Akiligassarlu suli akilersimanngikkukku akileraarummik taassumalu qaavatigut tuavisaarinermi akitsuummik nassinneqassaatit.

Biilip normupladea peerneqassaaq
Akileraaruseriffiup tuavisaaraluni akileeqqusinerata kingorna sapaatip akunneri sisamat ingerlanerani akiliummik tigusaqarsimanngikkunik politiinut qinnuiginnissapput biilivit nummerpladea peeqqullugu.

Politiit nummerplade atorunnaarsinnginnerani ulluni 3-10-ni tigummigallarsinnaasarpaat, periarfissiiniarlutik biilimik piginnittup paasiniaanissaanut immaqalu qamutit motoorillit akileraarutaannik tuavisaarinermilu tapiliussamik akiliinissaannut, taamannak pisoqartillugu politiit nummerplade piginnittumut uterteqqissinnaavaat.

Malugiuk
Ullut 8-t qaangiutsinnagit qamutit motoorillit akileraarutaannik biilimik piginnittutut akiligassarnik akiliisimaguit akiliisimanermut uppernarsaammik Akileraartarnermut Aqutsisoqarfimmut nassiussaatit, taamalillutik Akileraartarnermut Aqutsisoqarfimmiit poliitinut qinnutigisinnaammassuk nummerpladevit peerneqannginnissaa.

Ukiumut marloriarlutit qamutit motoorillit akileraarutaannik akiliisassaatit, akiliineq ukiut affakkaarlugit pisarpoq:

Malugiuk
Akiliiffissatut ulluliunneqarsimasoq nalliuttuni inissisimappat, nalliuttut kingorna ulluinnaq siulleq akiiliiffissatut killigitinneqassaaq.

Siullermeerluni biileqartumut
Siullermeerluni biileqartumut qamutit motoorillit akileraarutaat akilernaqassaaq kontomut uunga ikisinikkut: 6471 1000842 allagartaliullugu: Biilip nummerpladea (ass. GLXXXXX, GRXXXXX)

Biileqareersumut
Akileraartarnermut Aqutsisoqarfik akiligassamik ilinnut betalingsservice-kut nassiussissaaq (FI kortimik) qamutinut motoorilinnut qanoq annertutigisumik akiligassaqarnersutit. Akiligassaq aningaaserivikkoorlugu netbankikkoorluguulluunniit akilersinnaavat.

Netbankikkut BS-imut isumaqatigiissusiorsimaguit akileraarummik akiliiffissat nallerpat kontorniik ilanngaanneqarumaarputit,- tassunga malitsillugu BS-imiik allagarsiumaarputit qanoq annertutigisumik akiliisimanerlutit.

Akileraaruseriffiup qamutinut motoorilinnut akileraarutinut tunngatillugu aalajangigai maalaarutigineqartut skatterådip aalajangiiffigisarpai.

Skatterådimut maalaarut allaganngorlugu tunngavilersorlugulu nassiunneqassaaq.

Tassunga kakkiullugit ilanngunneqassapput:

1) Aalajangiussaq, maalaarutigineqartoq
2) Maalaaruteqartumut suliap allaaserineqarnera nassiussaq, pisuni sulianut allaaserisaqartoqarsimatillugu.
3) Allakkiat maalaaruteqartup uppernarsaatissatut ilanngukkusutai.