Umiatsiaaqqamut tapiiffigineqarnissamik qinnuteqarfissaq

Aalisarnermi piniarnermilu umiatsiaaqqamik nutaamik pisinissamut tapiissutit pillugit inuussutissarsiutinik siuarsaanermut aaqqissuussinermi aalisarnermik piniarnermillu inuussutissarsiutip angusaqarfiunissaa unammillersinnaanerullu siuarsarnissaat siunertaavoq. Inuussutissarsiutinik siuarsaanermik aaqqissuussinermi siunertaq tassaavoq sumiiffinni allanik suliffeqarnissamut amerlasuunik periarfissaqarfiunngitsuni piniarnermik annikinnerusumillu aalisarnermik tapersiinissaq. Pingaarnersiuinermi, pingaartumik sumiiffinni aalajangersimasuni, aalisarsinnaassutsip appasiffiini aalisarnerup iluani umiatsiaararsortunut tapersiisoqassaaq.

Inuussutissarsiutigalugu Aalisarnermut piniarnermullu allagartallit umiatsiaaqqamik nutaamik pissarsiniarnermut atatillugu inuit ataasiakkaat tapiiffigineqarsinnaapput.

Suliniutit uku tapiissutigineqarsinnaapput:

1) Umiatsiaaqqamik inuussutissarsiummik tankilimmik, motorilimmik isumannaallisaanermullu atortulimmik pisinissaq pineqarpat.
2) Umiatsiaaraq minnerpaamik 16 fodiuppat annerpaamillu 19 fodiuppat.
3) Umiatsiaaqqap Kalaallit Nunaanni inuussutissarsiutitut atorneqarsinnaanermi akuerisaappat (CE-mik nalunaarsugaq)
4) Motoori annerpaamik 115 HK-mik sakkortussuseqarpat.
5) Inuiaqatigiit aningaasaqarnerannut maannamut siunissamullu ungasinnerusumi nappassinnaasutut natsorsuutigineqarpat, aamma
6) Tapiiffigineqartup immunut pilersornissamut periarfissaqarnissaanut tunngaviliisinnaappat.
7) Tapiissutit saniatigut aningaasalersuinerit sinneruttut naammassineqarsimappata.

Umiatsiaaqqamut inuussutissarsiutip akiata 75%-it angullugit tapiissuteqartoqarsinnaavoq.

Qaanaap eqqaani, Paamiuniit nunatta kujataanut Tunumilu najugaqaruit umiatsiaaqqap akiata 84%-ii angullugit tapiiffigineqarsinnaavutit.

Tamakkiisumik aningaasalersuinissamut periarfissaqanngilaq, taamaammat aningaasalersuinerit sinneruttut 25%-it imaluunniit 16%-it nammineerlutit akilissavatit. Tamanna aningaasanik nammineq illukartitsisimanermi aningaasaleriffimmiluunniit atorluni pisinnaavoq.
Umiatsiaaqqamik akuerineqaruit qaammatini pingasuni periarfissinneqassaatit aningaasat 25%-it imaluunniit 16%-it naammatsillugit katersornissaanut.
Nammineerlutit akiligassat akilerukku uppernarsaammik nassiussissaatit, tapiissutigineqartussaq aatsaat nammineq akiligassaq akilerneqarsimappat sinneruttua akilerneqartarmat.

Inuussutissarsiutigalugu umiatsiaararsortunut immikkut ittumik tapiissutinik qinnuteqalernermi piumasaqaatit ukuupput:

• Inuussutissarsiutigalugu piniarnermik aalisarnermillu ingerlataqarneq aammalu Kalaallit Nunatsinni najungaqartuuneq
• 18-it 65-llu akornanni ukioqaruit.
• Sivikinnerpaamik ukiuni marlunni inuussutissarsiutigalugu aalisarnermik piniarnermilluunniit inuussutissarsiuteqarsimaneq.
• Umiatsiaaraq minnerpaamik 16 fodiuppat annerpaamillu 19 fodiuppat, aammalu umiatsiaaqqap Kalaallit Nunaanni inuussutissarsiutitut atorneqarsinnaanermi akuerisaappat (CE-mik nalunaarsugaq)
• Umiatsiaaqqamut minnerpaamik marlunnik nammineerlutit ujartuinikkut neqeroorusiortissimanissat.

Umiatsiaaqqamut tapiiffigineqarnissarnut Kommunerisarni inuussutissarsiutigut siunnersuisarfimmi kiisalu KONFIFA-mi aalisartunut piniartunullu siunnersuisoq aqqutigalugu qinnuteqariartorsinnaavutit. (KONFIFA www.konfifa.gl )

Umiatsiaaqqanut tapiiffigineqarnissamut Qinnuteqarnissamut immersuiffissaq

Umiatsiaaqqamut qinnuteqaammut immersugassaq sumiiffinni kommunerisanni, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi, KONFIFA-milu pissarsiarisinnaavat.

Qinnuteqarnermut atatillugu makku ilanngutissavatit:

• Inuussutissarsiutigalugu aalisarnermut piniarnermullu allagartaq.
• Kommunerisami inuussutissarsiornermut siunnersortimik imaluunniit aalisarnermut piniarnermut siunnersortimiit tapersiuteqartitsineq.
• Umiatsiaaqqamut minnerpaamik marlunnik neqeroorusiortitsisimanermut takussutissat.
• Ukiut kingulliit pingasut isertitarisimasat nalunaarsorneri.
• Aalisarsinnaanermut akuersissut inuussutissarsiutigalugulu piniarsinnaanermut akuersissutit.

Inuussutissarsiutitigut tapiissutinik qinnuteqarniaruit, qinnuteqaatit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut, uunga nassiutissavat: esu@nanoq.gl

Umiatsiaaqqamut qinnuteqaatit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut nassiunneqarpat, tigunera utimut nalunaarutigineqartarpoq.

• Qinnuteqaat Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmi suliarineqassaaq.
• Uppernarsaatit piumasarineqartut tamakkerlugit qinnuteqaammi ilanngunneqarsimappata, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup suliaq aallartissavaa. Paasissutissallu tamakkerlugit tunniunneqarsimanngippata suliaq aallartinneqassanngilaq tamannalu Naalakkersuisoqarfiup tungaaniit ilisimatitsissutigineqassaaq.
• Umiatsiaaqqamik qinnuteqaatit ataatsimut katersorneqartarput, ullorlu 31. marts kingorna qinnuteqaatit suliaralugit aallartinneqartarlutik.
• Qinnuteqaatit tamarmik misissorneqartarput, inatsillu naapertorlugu piumasaqaatit aallaavigalugit pingaarnersiuisoqartarpoq.
• Inuussutissarsiutinik siuarsaanermik aaqqissuussinermi siunertaq tassaavoq sumiiffinni allanik suliffeqarnissamut amerlasuunik periarfissaqarfiunngitsuni piniarnermik annikinnerusumillu aalisarnermik tapersiinissaq. Pingaarnersiuinermi, pingaartumik sumiiffinni aalajangersimasuni, aalisarsinnaassutsip appasiffiini aalisarnerup iluani umiatsiaararsortunut tapersiisoqassaaq.
• Suliap suliarineqarnera qinnuteqaatinillu pingaarnersiuineq matsip 31-iata kingorna aallartinneqartarpoq, april-illu ingerlanerani akissutisinissat naatsorsuutigissavat.
• Suliaq naammassigaangat, imatut ingerlariaqqittoqartarpoq;

o Qinnuteqaammi piumasaqaatit naammassineqarsimappata qinnuteqartumut tapiissutit tunniunneqartarput.
o Qinnuteqaammilu piumasaqaatit naammassineqarsimanngippata, tunngavilersukkamik itingartitsissut qinnuteqartumut nassiunneqassaaq.

Eqqumaffigiuk 31 marts-ip kingorna qinnuteqaatit ukiumut ataasiarluni suliarineqartarmata. Marts-illu 31-iata kingorna qinnuteqaat tinguneqarsimappat tamanna itingartitsinermik kinguneqartarmat, taamaattorli ukioq nutaami ulloq 31. marts nallertinnagu qinnuteqaqqissinnaavutit.

Qinnuteqaatinut nassiuteriikkanut tunngatillugu paasissutissanik allannguuteqartoqarsimappat pisussaaffigaat Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut tamanna nalunaarutigissallugu.

Allannguutillu tiguneqarpata kingorna suliaq nangeqqinneqarsinnaalissaaq.

Umiatsiaaqqamut tapiiffigineqarnissamut qinnuteqaatinnut tunngatillugu nammineerlutit akisussaaffigaat paasissutissat eqqortuullutillu piviusumik aallaaveqarnissaat.

Umiatsiaaqqanut tapiiffigineqarnissamik qinnuteqarfissaq piffissarititaq kingulleq tassaavoq 31. Marts, april-illu ingerlanerani akissutisinissat naatsorsuutigineqassaaq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup aalajangigai oqartussanut allanut maalaarutigineqarsinnaanngillat.