Angallammik nutaamik imaluunniit atornikumik pisinissamut tapiiffigineqarnissamut qinnuteqaat

Aalisarnermi aningaasaliissutinut immikkoortitat siunertaat tassaavoq, aalisarnermik inuussutissarsiortut ineriartornerinut siuarsarnerinullu tapiissuteqarnissaq kiisalu inuussutissarsiummi peqataasunut nutaanut isersinnaanerup ajornannginnerulernissaa. Aalisarnermi aningaasaliissutinut immikkoortitat aalisarnermi sapinngisamik inuiaqatigiinnut pitsaanerpaamik kinguneqarnissaannut peqataassaaq, tamatumunnga ilanngullugu aalisarnerup pitsanngorsarneqarnera, unammillersinnaanera aamma isumalluutinut ataavartumik aalisarnerup naleqqussarnissaa. Ingerlaavartumik nutarterinermut aamma sinerissamut qanittumi aalisarnerup pisariillisarneranut tapiisoqarsinnaavoq.

Aaqqissuussineq taanna aqqutigalugu tapiissutit taamaallaat angallatinik nutaanik pisinermut imaluunniit angallatinik atornikunik 6 meterinit takinernut naammattumik kinguneqarsinnaasumik aamma siunissami ungasinnerusumi aalisarnerup ingerlalluarneranut pisariitsumillu unammillersinnaasutut nalilerneqartunut tapiissutaasinnaapput.

Qaanaami Tunumilu tapeeriaatsit imatut iluseqarput:

• Angallatit 6 miiterit aamma 9,5 miiterit (l.o.a) akornanni takissusilinnut raajarniutitullu atugassiaanngitsunut 85% angullugu.
• Angallatit 9,5 miiterit (l.o.a) qaangerlugit takissusilinnut raajarniutitullu atugassiaanngitsunut 60% angullugu.

Kalaallit Nunaata sinneranut tapeeriaaseq imatut iluseqarpoq:

• Sinerissap qanittuani raajarniarneq: pisiarinerata akiata 20 %-ia tikillugu
• Raajaanngitsunik sinerissap qanittuani aalisakkanik allanik aalisarneq: pisiarinerata akiata 40 %-ia tikillugu

Pisinermi akimi tamarmi ilaatinneqarput:

1. Angallat teknikikkut pisariaqartunik ikkussuiffigineqarsimasoq,
2. Isumannaallisaanermi atortut,
3. Teknikikkut ikkussukkat allat,
4. Aalisarnermut atortut ingerlatsinermullu atortut tamakkununnga assingusut allat
5. Suliniutip naammassineqarnissaanut teknikikkut aningaasaqarnikkullu siunnersuinerit pisariaqartinneqartut.

Kalaallit nunaata sinneranut tapeeriaaseq tunngavigalugu angallatip pissarsiarinissaanut akiata minnerpaamik 10 %-ia nammineq akilersinnaallugu uppernarsarsinnaassavat, ass. sipaakkat imaluunniit taarsigassarsiat, pissarsiarinissaanut ataatsimut ilaasut imaluunniit pigisat nalillit, pilersaarutaasutut aningaasartuutissanut ilaasut.

Qaanaami Tunumilu najugaqaruit angallatinut 6 miiterit aamma 9,5 miiterit (l.o.a) akornanni takissusilinnut angallatip pissarsiarinissaanut akiata 2%-ia siulequtsiussinnaallugu uppernarsassavat angallatillu 9,5 miiterit (l.o.a) qaangerlugit angissusilinnut angallatip pissarsiarinissaanut akiata 5%-ia.

Aalisarnermi tapiissutinut immikkoortitanik qinnuteqannginnermi nammineerlutit akiliutissatit qulakkeereersimassavatit.

Eqqumaffigissavat, tapiissutinik pissarsisimaguit aalisariut pissarsiarisimasat imaluunniit atortut tapiiffigineqarsimasut angallatip tiguneqarneranit atorneqarneranillu ukiut siulliit qulit iluanni allamut tunisinnaannginnakkit. Tamanna tunngavigalugu tapiissutit utertillugit akileqquneqarsinnaapput, angallammik piginnittup nutaap tapiiffigineqarnissamut piumasaqaatit naammassisimanngippagit.

Aalisarnermi aningaasaliissutinut immikkoortitanik tapiiffigineqarnissamut immikkut piumasaqaatit.
Tapiiffigineqarnissamut piumasaqaatit ukuupput:

• Sinerissap qanittuani inuussutissarsiutigalugu aalisarnissamut akuersissutaateqassaatit
• Angallat pissarsiarineqarniartoq inuussutissarsiutigineqarnissamut akuerineqarsimassaaq
• Pisissutissap nalingata, assersuutigalugu sipaarnikkut imaluunniit taarsigassarsinikkut minnerpaamik 2%, 5% imaluunniit 10 %-ia nammineq ileqqaarsimassavat.
• Suliniutissamut nassuiaateqassaatit, matumanilu piffissamut pilersaarut aamma ingerlatsinissamut aningaasallu tigoriaannaat pillugit missingersuutit.

Aalisarnermi aningaasaliissutinut immikkoortitanik tapiiffigineqarnissamut qinnuteqarnermi ikiorneqarsinnaavutit uannga: AAPISI www.aapisi.gl

Qinnuteqarnissamut immersugassaq aajuk

Qinnuteqaatit suliarineqassappat uku uppernarsaatit nassiussimasussaavatit:

• Ingerlatsinissamut pilersaarut/suliniutip allaaserineqarnera, matumanilu suliniummut siunertaq aamma isumassarsiaq, assersuutigalugu angallat nutaaq saarullinniarnermi atugassaq.
• Ingerlatsinermi aningaasaqarnermilu missingersuutit tapiiffigitinnissamut pisariaqartinneqartut amerlassusiinik nalunaarutitallit
• Ukiuni kingullerni pingasuni isertitanut paasissutissat aammalu ukiunut tulliuttunut pingasunut missingersuutit.
• (Avataaniit) aningaasaliisinnaasut allat pillugit paasissutissat uppernarsaatillu.
• Nammineq 2%, 5% imaluunniit 10 %-imik akiliuteqarnissamut uppernarsaatit (sipaakkat, taarsigassarsiat imaluunniit nalilinnik pigisat)
• Angallatinut niuertumit angallammut nutaamut neqeroorut, matumanilu titartakkat imaluunniit angallatip atornikup pisiarinissaanut isumaqatigiissut
• Angallat atornikoq pineqartillugu tamatuma isumaqatigiissutip saniatigut uku ilanngunneqassapput:

o Angallatip sukkassusaanut akuersissut atuuttoq
o Imarsiornermik Aqutsisoqarfimmit angallatip ilusaa/atorsinnaanera pillugu nalunaarusiaq, (angallatinut 15 meterinit takinerusunut )
o Angallatip ilusaa/atorsinnaanera aamma ingerlasinnaanera pillugit nalunaarusiaq tuniniaasumit pisisumillu atsiorneqarsimasoq (angallatinut 15 meterinit takinerusunut).
o Angallatip teknikikkut atortuisa atorsinnaanerannut piumasaqaammut naammassinnissimaneranut uppernarsaat, (angallatinut 15 meterinit naannernut)
o Angallatip sillimaniarnermut atortunik pisariaqartunik tamanik peqarneranut uppernarsaat (angallatinut 15 meterinit naannernut)
o Angallatip ingerlasinnaaneranut uppernarsaat pisisumit tunisisumillu atsiorneqarsimasoq (angallatinut 15 meterinit naannernut)
o Arlaannaanulluunniit attuumassuteqanngitsumik avataaniit naliliisartumik angallatip nalinganik nalilersuisimaneq

Qinnuteqaatit nassiukkukku, qinnuteqaatit Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit nalunaarsorneqassaaq, tassanngalu qinnuteqaativit tiguneqarsimaneranik uppernarsaammik nassinneqassaatit.

 

• Qinnuteqaat Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit suliarineqassaaq.
• Uppernarsaatissatut piumasarineqartut tamarmik ilanngunneqarsimappata, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit suliap suliarineqarnera aallartinneqassaaq. Amigaateqartoqarpat, uppernarsaatissat tamarmik tunniunneqarpata aatsaat suliaq aallartissasoq nalunaarfigineqassaatit. Uppernarsaatissat amigaatigineqartut pillugit Naalakkersuisoqarfimmit nalunaarfigineqassaatit
• Aalisarnermi aningaasaliissutinut immikkoortitanut qinnuteqaatit ataavartumik suliarineqartarput
• Sullissineq Naalakkersuisoqarfik, qinnuteqartut aamma angallammik tuniniaasoq imaluunniit amutsivik angallammik sanasoq qanimut oqaloqatigiillutik suliarineqakkajupput.
• Suliap suliarineqarnera naammasseriarpat imaalisoqassaaq

o Tapiiffigineqarnissamut neriorsuut tunngavilersorneqarsimasoq qinnuteqartumut nassiunneqassaaq
o Piumasaqaatinik naammassinninngitsunut tunngavilersuutilerlugit itigartitsissutinik nassiussisoqassaaq

• Tapiiffigineqarnissamik neriorsuummik tigusaqaruit amutsivik imaluunniit tuniniaasup aningaaserivianut aningaasanik tunniussinissaq pillugu isumaqatigiissutigineqassaaq. Angallatip nutaap sananeqarnerani amerlanertigut angallammut tapiissutit kittaarlugit tunniussuunneqartarput, angallatip sananerata ineriartornera naapertorlugu.

Aalisarnermi aningaasaliissutinut immikkoortitanik qinnuteqaatinik suliaqarneq amerlanertigut qaammatit 1-3-t tikillugit sivisussuseqartarput.

Qinnuteqaammi nassiussanni paasissutissanik allanngortoqarsimappat tamanna pillugu Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmut paasissutissiissuteqartussaatitaavutit.

Allannguutit tiguneqarpata qinnuteqaatip suliarineqarnera nangeqqinneqassaaq.
Umiatsiaaqqanut tapiissutinik, aallarteqqinnissamut tapiiffingineqarnissamut, angallatinut, aserorterititsinissamut kiisalu Silaannaap allanngorarnerata peqqutaanik qinnuteqarnermut suleriaaseq.

Aalisarnermut aningaasaliissutinut immikkoortitanik ukioq kaajallallugu qinnuteqartoqarsinnaavoq.

Aalisarnermut, Piniarnermut, Nunalerinermut Imminullu Pilersornermut Naalakkersuisoqarfiup aalajangiinera allaffissornikkut oqartussaasunut allanut naammagittaalliuutigineqarsinnaanngilaq.

Qaanaami, Ittoqqortoormiini Tasiilamilu nunaqarfinnilu eqqaanniittuni angallatinut tapiissutit pillugit Namminersorlutik Oqartussat nalunaarutaat