Aatsitassanik ujarlerneq - Ujarassiorit

Aatsitassanik ujarlerneq imaluunniit Ujarassiorit Kalaallit Nunaanni aatsitassanik ujaasinermik unammisitsinermut nuannarineqarluartumut taaguutaavoq. Kikkut tamarmik Kalaallit Nunaanni najugallit ujaqqanik pinngortitami nassaarineqartunik misissugassanngortillugit nassitsisinnaapput, taakkulu Geologi-mut Immikkoortortaqarfimmi Aatsitassanut Ikummatissanullu Naalakkersuisoqarfimmiittumut misissortillugit. Misissukkat soqutiginaateqarnerpaat ukiut tamaasa akissarsiassaqartinneqartarput.

Aatsitassanut Ikummatissanullu Naalakkersuisoqarfik unammisitsinermik ingerlatsisuuvoq, ataatsimiititaliamilu dommer-it Aatsitassanut Ikummatissanullu Naalakkersuisoqarfimmit aamma Danmarkimut Kalaallillu Nunaannut Naalagaaffik tamakkerlugu Aatsitassanik Misissuisarfimmit (GEUS) ujarassiuunik ilaasortaqarpoq.

Ujarassiorit 1989-imi aallartinneqarpoq maannalu Kalaallit Nunaanni ileqquulersimalluni. Ujarassiorit innuttaasut aatsitassanik najukkaminni piusunik ilisimasaqalernissaannik soqutiginnilernissaannillu aamma tunniussivoq. Tassunga ilutigitillugu innuttaasut najukkaminnik ilisimasaqarnerat ujarassiuunut iluaqutaavoq. Pisuni arlalinni ujaqqanik misissorneqartussanik nassiussinerit aamma nunanit allanit suliffeqarfiit Kalaallit Nunaanni aatsitassanik misissuinerminnik aallartitsinerannut tunngaviusimapput.

Ujarassiorit pillugu uani annertunerusumik atuagaqarsinnaavutit www.ujarassiorit.gl.

• Kalaallit Nunaanni inuit allattorsimaffianni najugaqartutut allassimassaatit
• Unammineq nuannariinnarlugu ujarlertartunut taamaallaat atuuppoq
• Misissugassat nunatsinneersut taamaallaat nassiussinnaavatit. Misissugassat sumi nassaarineri eqqortumik nalunaarsukkat kisimik akissarsissutigineqarsinnaapput. Misissugassanngortillugit nassiussat utertinneqarneq ajorput
• Misissugassat ujaraqarfinnit ilisimaneqareersuneersut aatsaat paasissutissanik nutaanik tunniussisinnaappata akissarsissutigineqarsinnaapput
• Kalaallit Nunaanni aatsitassat pillugit inatsit naapertorlugu nunaminertamik atuisinnaanermut akuersissuteqarfiusumi misissugassanik katersisinnaatitaanngilatit. Aamma kommune malittarisassaqarsimappat ilinnit malinneqassapput
• Ujarassiorit-mut peqataanikkut Kalaallit Nunaanni aatsitassat pillugit inatsit naapertorlugu piginnaatitaaffimmik pissarsitinneqarsinnaanngilatit

Ujarassiorit-mut misissugassanik nassitsineq akeqanngilaq. Nunatta allakkeriviini tamani nassiussinermut atortunik tunniussisoqarsinnaavoq taavalu misissugassaq pigineqartoq nassiussinissamut aki akilerneqarsimasoq atorlugu nassiullugu.

Ima iliussaatit ujaqqamik soqutiginartumik nassaaruit taannalu Ujarassiorit-mut peqataatinniarukku, taava:

1. Allakkerivimmut saaffiginnissaatit, tassani poortuutissamik tunineqarsinnaavutit, misissugassarlu akeqanngitsumik nassiullugu. Poortuutissaq immersugassiamik ilaqarpoq
2. Immersugassiaq immersoruk atit, najukkat kiisalu sumerpiaq nassaarisimanerlugu allallugit. Nassaarfik najukkap pineqartup titartagartaanut nalunaaqutseruk
3. Immersugassiaq misissugassamut ilanngullugu nassiunneqassaaq. Misissugassaq nassiutissavat taamaasilluni Aatsitassanut Ikummatissanullu Naalakkersuisoqarfiup 1. oktober nallertinnagu tiguniassammagu

Misissugassaq Aatsitassanut Ikummatissanullu Naalakkersuisoqarfimmi ujarassiuumit misissorneqassaaq, aamma misissugassap aatsitassanik sunik akoqarnera pillugu paasissutissanik imalimmik nassiussisoq allagarsitinneqassaaq. Misissugassat immikkut soqutiginarsinnaasut misissuiffimmut misissugassanngortillugit nassiunneqartarput. Misissuinerit inerneri piareeraangata, misissukkat akissarsitinneqartussat toqqarneqartarput.

Aatsitassanik misissugassanik pingaaruteqarnerpaanik nassiussisimasunut akissarsiassaqartitsisoqartarpoq. Akissarsiassat akileraarusigassaanngillat.

2020-imi akissarsissutigineqartut ima isikkoqarput:

• Akissarsiassat annerit inummut ataatsimut, 55.000 koruunit
• Akissarsiassat tullii inummut ataatsimut, 25.000 koruunit
• Akissarsiassat pingajuat inunnut marlunnut, tamarmik 10.000 koruunit
• Akissarsiassat sisamaat inunnut sisamanut, tamarmik 5.000 koruunit

Misissugassaq pigisat 1. oktober nallertinnagu nassiutissavat.