Ilisimatusarfimmut qinnuteqarit

Ilisimatusarfik tassaavoq Kalaallit Nunaata universitetituaa, tassanilu ilinniagassat assigiinngitsut aqqanillit neqeroorutigineqarput bacheloritut kandidatitullu qaffasissuseqartut.

Ilinniagassat akuerineqarnissamullu piumasaqaatit pillugit paasissutissat uani atuarsinnaavatit: www.uni.gl

Ilisimatusarfimmut qinnuteqarneq ilutigalugu ilinniagaqarnersiuteqarnissamut qinnuteqassaatit.

Ilinniagaqarnersiutit pillugit annerusumik atuaruk.

Ilisimatusarfimmut qinnuteqarniaruit nittartagaq atorlugu ugguuna qinnuteqarsinnaavutit.

NemID-qaruit
NemID atorlugu isersinnaavutit toqqaannartumillu sullissivik.gl-ikkut qinnuteqarlutit.

Imminut sullinneq qulaaniittoq tooruk, NemID-lu atorlugu iseriarlutit aallartillutit.

Eqqaamallugu
qinnuteqaativit tigusineqarsimaneranut uppernarsaat toqqussagakku. Uppernarsaat e-mailimut qinnuteqaatinnut allassimasannut nassiunneqassaaq.

Ajornartoornermi
NemID atorniaraluarlugu ajutooruit immersugassaq pappilissamiittoq aasinnaavat: ’Kalaallit Nunaanni ilinniakkanut aamma ilinniagaqarnersiutinut qinnuteqaat immersugassaq’ immersoriarlugulu Majoriamut tunniullugu nassiulluguluunniit. 
Taamaalioruit nalunngiinnassavat qinnuteqaativit suliarineqarnera sivisunerussammat. Eqqaamassavat immersugassami immersugassat tamaasa eqqortumik immersussagakkit. Majoriami ikiorsinnaavaatsit immersugassap digitalimik immersornissaanut.

Qinnuteqaatip pappilissap immersornissaanut ilitsersuut atuaruk.

Malugiuk
Kollegiamut immikkut qinnuteqassaatit www.kaf.gl aqqutigalugu, Nuummi najugallit kollegiamik qinnuteqassapput Nuummi Majoriamut.

Qinnuteqaatit Ilisimatusarfimmit suliarineqassaaq, ilinniagaqarnersiuteqarnissamut qinnuteqaatit Ilinniagaqarnersiuteqartitsivimmit suliarineqassalluni, kisianni taakku tamarmik Ilisimatusarfimmit allaffissornikkut aqunneqassapput.

Apriilip ingerlanerani nalunaarfigineqassaatit akuerisaasimanerlutit imaluunniit akuerisaasimannginnerlutit.

Qinnuteqarnerpit nalaani suli soraarummeersimanngikkuit akuerineqarsinnaavutit soraarummeerninni angusisimanissat piumasaqaatiginerqarluni.
Eqqaamallugu soraarummeersimanermut uppernarsaat nassiunneqassammat kingusinnerpaamik juunip 29-ani.

Ilinniarnerup qaqugu aallartinnissaa, ilinniagaqarnersiutit il.il. pillugit maajip ingerlaneranmi Ilisimatusarfimmit ilisimatinneqassaatit.

Qinnuteqaatit allanngortinniarukku, atorunnaarsinniarukku imaluunniit ilassutissaqaruit illoqarfigisanni Majoriamut saaffiginnissaatit qinnuteqarfissamut killissarititaasoq marsip 1-at nallertinnagu. Tamatuma kingorna Ilisimatusarfimmut studieadm@uni.gl saaffiginnissaatit qinnuteqaatit tunuartinniarukku, ilassutissaqaruit imaluunniit paasissutissanik allannguiniaruit.

Kingusinnerpaamik qinnuteqarnissamut piffissaliussaq tassaavoq marsip 1-at.

Eqqaamallugu soraarummeersimanermut uppernarsaat tamakkiisoq nassiunneqassammat kingusinnerpaamik juunip 29-ani.

Isumaqaruit Ilisimatusarfiup akuerineqarnissannik aalajangiinera maleruagassanik unioqqutitsisinerusoq maalaarsinnaavutit. Maalaarut allaganngorlugu nassiutissavat ilinniartunik kiffartuussivimmut: studieadm@uni.gl. Maalaarut tunngavilersussavat tunniutissallugulu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.