Inatsisartunut aamma kommunalbestyrelsinut qinersisitsisoqarnerani taasineq

Inatsisartunut aamma kommunalbestyrelsinut qinersineq taasinikkut aalajangiiffigineqartarpoq. Taasineq ima ingerlanneqassaaq.

Inimut qinersiviusumut inuttut nammineerlutit takkutissaatit taaguinermullu siulittaasumut saaffiginnillutit, taassuma illit atit qinersisinnaasut allattorsimaffianniittoq krydsilissavaa. Matuma kingorna taasissutissaq atorneqanngitsoq ilinnut tunniunneqassaaq.

Qinigassanngortittoq imaluunniit partii Inatsisartunut imaluunniit kommunalbestyrelsimut qinerneqartussatut kissaatigisat, taasissutissami krydsilissavat. Taasineq ineeqqami taasiviusussami pissaaq, kisivillu tassani najuuttussaavutit. Taasivissaq immersoreerukku peqitissavat, taamaalilluni illit qanoq taasisimanersutit takuneqarsinnaassanani. Malitsigisaanik taasissut peqitigaq taasisissutit karsiannut ikissavat.

Qinersineq ammartarpoq ullaap tungaani nal. 9.00 matusarlunilu unnukkut nal. 20.00.

Taasissutissaq nutaaq
Illit taasissutissat taarsertissinnaavat, kukkusumik immersorsimagukku imaluunniit arlaatigut atorsinnaajunnaarsinneqarsimappat. Taasissut utertinneqartoq taaguinermut siulersuisumit immikkut paarineqasaaq. Taasissut, taasisissutit karsimut ikineqareersimasoq taarsertissinnaanngilat.

Ikiuineq
Periuseq nassuiarneqartoq malillugu taasissut illit nammineerlutit immersorsinnaanngikkukku, taaguinermut siulersuisup ikiorsersinnaavaatit:

• Inimut taasiffiusumut pitsorlunnerit imaluunniit assingusumik patsiseqartumik isersinnaanngikkuit, taaguinermut siulersuisup nakkutigisaanik inip silataatunginnguani taasissutissat immersorsinnaavat
• Tappiitsut isigiarsuttullu, inummit namminneq toqqakkaminnit ikiorneqarnissartik piumasarisinnaavaat