Inatsisartunut kommunalbestyrelsinullu qinersineq
Innuttaasut Inatsisartunut kommuninullu qinersinerni sinniisussat, inatsisartuni kommunalbestyrelsinilu sinnerlutik aalajangiinernik ingerlatsisartussatut kissaatigisatik qinertussaavaat. Taamatuttaaq kommunit ataanni nunaqarfinni aqutsisunut ilagiillu sinniisaannut qinersinerit ingerlanneqartarput. Kommunit aggornerisa avataanni, Pituffimmi innuttaasut siunnersuisoqatigiivinut qinersisoqartarpoq.
Qinersinermut ataatsimiititaliaq
Inatsisartunut qinersineq Qinersinermut ataatsimiititaliamit aqunneqartarpoq. Qinersinermut ataatsimiititaliaq Naalakkersuisut siulittaasuata naalakkersuisoqarfiata pisortaanik, siulittaasutut, Naalakkersuisut inatsiseqarnikkut pisortaannik, kommunit peqatigiillutik toqqagaannik ilaasortamik ataatsimik, biskopimik kiisalu Ilisimatusarfimmi rektorimik inuttaqartinneqarpoq. Qinersinermut ataatsimiititaliaq qinersinermut allattaavimmut allattuisussaavoq, tassani qinersinermut pingaaruteqartut assigiinngitsut, assersuutigalugu qinigassanngortittut, partiit aamma qinersinermik nalunaarusiorneq allattorneqassallutik.
Qinersinermik siulersuisut taasisitsinermilu aqutsisoq
Kommunalbestyrelsinut, nunaqarfinni aqutsisunut ilagiillu sinniisaannut qinersineq kommunini qinersinermik siulersuisunit aqunneqassaaq, taakku inuttaqartinneqarput borgmesteri, qinersinermut siulersuisunut siulittaasoq aamma kommunalbestyrelsimi ilaasortat ikinnerpaamik pingasut. Qinersinermut ataatsimiititaliaq qinersinermut allattaavimmut allattuisussaavoq, tassani qinersinermut pingaaruteqartut assigiinngitsut, assersuutigalugu qinigassanngortittut, partiit aamma qinersinermik nalunaarusiorneq allattorneqassallutik.
Qinersinermik siulersuisut taasiartorfissani tamani taasisitsinermi aqutsisumik – inuk qinersisinnaatitaasoq taasiartorfissami pineqartumi taasisitsinermik aqutsisussaq - pisariaqarpallu taasisitsinermik aqutsisumut ikiuuttussanik toqqaassapput.
Inatsisartunut qinersineq
Inatsisartunut ilaasortat piffissamut ukiunik sisamanik sivisussusilimmut qinerneqartarput. Qinigaaffiup sivisussusia ullormit qinersiviusumit naatsorsorneqartarpoq. Sioqqutsisumik qinersisoqarnissaa nalunaarutigineqarsinnavoq. Naalakkersuisut siulittaasuat tassaavoq qinersinissamik qinersivissamillu ullormik nalunaaruteqartartoq.
Inatsisartut 31-nik ilaasortaqarput.
Kalaallit Nunaat qinersiviuvoq ataaseq. Tassa imaappoq qinigassanngortittut tamarmik Kalaallit Nunaat tamakkerlugu qinigassanngortissasut.
Kommunalbestyrelsimut qinersineq
Kommunalbestyrelsimut ilaasortat piffissamut ukiunik sisamanik sivissusulimmut qinerneqartarput. Qinigaaffik majip aallaqqaataaniit naatsorsorneqartarpoq taasinerlu aprilimi marlunngornermi siullermi ingerlanneqartarpoq. Kommunalbestyrelsi nunaqarfinni aqutsisunut qinersinissamut aamma ataatsimoorussamik nunaqarfinni aqutsisunut qinersinissamut ulluliisinnaapput.
Kommunalbestyrelsini ilaasortat ukunani ima amerlatigipput:
• Avannaata Kommunia: kommunalbestyrelsimi ilaasortat 17-it
• Kommune Qeqertalik: kommunalbestyrelsimi ilaasortat 15-it
• Qeqqata Kommunia: kommunalbestyrelsimi ilaasortat 15-it
• Kommuneqarfik Sermersooq: kommunalbestyrelsimi ilaasortat 19-it
• Kommune Kujalleq: kommunalbestyrelsimi ilaasortat 15-it
Kommunit immikkut tamarmik qinersiviupput. Tassa imaappoq qinigassanngortittut tamarmik kommune tamakkerlugu qinigassanngortittarput.