Pisortani Digitalimik allakkerinermit pisussaajunnaarsinneqarnissannut qinnuteqarit

Ulloq 1. januar 2021 aallarnerfigalugu Kalaallit Nunaanni innuttaasunut 15-ileereersimasunut tamanut Pisortani Digitalimik Allagarsisalernissaq inatsisitigut pisussaaffinngussaaq.

Innuttaasut pisussaajunnaarsitsinissamut kissaateqartut ukiui aallaavigalugit qinnuteqarnissaannut piffissaliussaasut qaangiutsinnagit qinnuteqaateqassapput. Piffissaliussat pillugit paasissutissat allat atuakkit.

Pisussaajunnaartinneqarnissamut najoqqutassani minnerpaamik ataatsimik naapertuutsitsiguit pisussaajunnaartinneqarsinnaavutit:

• 1. januar 1950 sioqqullugu inunngorsimassaatit
• Timikkut eqqarsartaatsikkulluunniit piginnaasakitsuussaatit
• Qarasaasiamik elektronikkimilluunniit allamik internetimut attaveqartumik atuinissannut periarfissaqassanngilatit
• Kalaallit Nunaanni aalajangersimasumik najugaqarunnaarsimassaatit
• Oqaatsitigut aporfeqarsimassaatit
• NemID-mik pissarsisinnaassanngilatit, assersuutigalugu nunami allamiinnerit pissutigalugu
• Nunap immikkoortuani internetimut attaveqanngitsumi najugaqartuussaatit

Pisussaajunnaarsitsinissamut qinnuteqaammut immersuiffissap immersorneratigut pisussaajunnaarsitsinissamut qinnuteqarsinnaavutit.

Pisussaajunnaarsitsinissamut qinnueqarnermi periarfissat pingasuupput.

• Immersuiffissaq anillatseriarlugu angerlarsimaffinnit immersorsinnaavat innuttaasunullu sullissivimmut tunniukkiartorlugu.
• Imaluunniit najukkanni innuttaasunut sullissivimmukariarlutit pisussaajunnaarsitsinissamut immersuiffissaq immersoriarlugu saaffiginnittarfimmut tunniussinnaavat.
• Imaluunniit ilaquttannit ikiortissarsioriarlutit sullissivik.gl aqqutigalugu nittartakkatigut pisussaajunnaarsitsinissamut immersuillutit qinnueqarsinnaavutit 

Pisussaajunnaarsitsinissamut immersuiniaruit una tooruk

Innuttaasutut pisussaajunnaarsitsinissamut qinnuteqaatit nassiukkukku, immersukkap tunniunnerata kinguninngua qinnuteqaatit akissutissarsiffigissavat. Pisussaajunnaarsinneqarsimaguit, pisussaajunnaarsitsineq sullissisup atortorissaarummut nalunaarsussavaa. Tamatuma kingorna allagarsiavit digitalikkut tigusassanngikkitit, pappialanngorlugit allakkatigut pissarsiarisassagitit nalunaarsorsimalissaaq.

Qinnuteqaatit itigartitsissutigineqarsimappat, itigartitsissut allaganngorlugu kommunimit ilinnut tunniunneqassaaq.

Kommunip aalajangiinerata maalaarutiginissaanut pisinnaatitaaffeqarputit. Pisussaajunnaarsitsinissamut qinnuteqaatit pillugu aalajangiineq inatsimmut atuuttumut naapertuutinngitsoq isumaqarfigigukku, naammagittaalliuteqarsinnaavutit.

Maalaaruteqarniaruit Digitalimik Sullissinermut Aqutsisoqarfimmut maalaarutit nassiutissavat.

Maalaaruteqaruit uku ilanngutissavatit:

• suna pillugu qinnuteqarsimaninnut nassuiaat
• kommunimit sooq itigartinneqarsimanerit pillugu nassuiaat
• aalajangiineq sooq naammaginnginnerlugu nassuiaat

Kommunip aalajangiinera malittarisassanut naapertuunnersut Digitalimik Sullissinermut Aqutsisoqarfimmit eqqortuunersoq taamaallaat qulakkeerneqarsinnaavoq.

Maalaarutit uunga nassiutissavat digitalisering@nanoq.gl.

Aalajangiinerup tiguneranit sap. ak. arfineq-pingasut qaangiutsinnagit maalaaruteqartussaavutit.

Inuusuttunut 30-t inorlugit ukiulinnut qinnuteqarnissamut killigititaavoq ulloq 31. oktober 2020.

Inersimasunut 50-it inorlugit ukiulinnut qinnuteqarnissamut killigititaavoq ulloq 30. november 2020.

Utoqqarnut 50-it sinnerlugit ukiulinnut qinnuteqarnissamut killigititaavoq ulloq 31. december 2021.