Pisortani Digitalimik Allakkerinermut ikiorneqarneq

Pisortani Digitalimik Allakkerineq 1. januar 2021-mi innuttaasunut tamanut 15-ileereersimasunut pinngitsoorani atugassanngussaaq.

Digitalimik allakkerineq qanoq pilersissinnaanerlugu aamma atorsinnaanerlugu paasissutissat ilitsersuutit uaniittut ”e-Boks imatut atussavat” maana sullissivik.gl-ikkut paasisaqarfiginerusinnaavatit.

Digitalimik allakkerinerup atorniarnera ilungersunartikkukku makku pillugit ikiorneqarsinnaavutit:

• Atuarsinnaanermut pisinnaatitsineq
• Digitalimik allakkerinermit pisussaajunnaarsitsineq

Pisortani Digitalimik Allakkerineq pillugu innuttaasunut sullissivianiit ikiorneqarit
Pisortani Digitalimik Allakkerineq pillugu ikiorneqarusukkuit imaluunniit apeqqutissaqaruit kommunimi innuttaasunutt sullissiviani sulisut siunnersuinissaminnut piareersimapput.

Innuttaasut sullissivianiit makkuninnga ikiorneqarsinnaavutit:

• NemID-mik pissarsineq
• e-Boks kontomik pilersitsineq
• Ilaqutaasumik atuarsinnaanermut pisinnaatitsineq
• Pisussaajunnaarsinneqarneq
• Immersuiffissanik immersuineq

Innuttaasunut sullissivimmukarsinnaanngikkuit
Atuarsinnaanermut pisinnaatitsissummik imaluunniit pisussaajunnaarsitsinissamut immersuiniarlutit innuttaasunik kiffartuussivimmut ornigussinnaanngikkuit, inuk alla illit sinnerlutit ornigutsissinnaavat. Illit allakkatigut akuersissut inummut tunniussimassavat, tassani allaqqassaaq atuarsinnaanermut pisinnaatitsissummik imaluunniit pisussaajunnaarsinneqarnissamut immersuiffissat immersornissaannut pisinnaatikkit.

Atuarsinnaanermut pisinnaatitsineq
e-Boksimi digitalimik allagarsiatit allamut atuartissinnaanissaanut pisinnaatitsiniaruit, pisinnaatinniakkat tatigisinnaassagit pingaaruteqarpoq. Soorlu pisinnaatinniakkat ilaqutarisinnaavat imaluunniit ikinngutigilluinnakkat.

e-Boksimi digitalimik allagarsianut atuarsinnaatitsissummik tunisisinnaaniaraanni, tigusisinnaaniaraannilu, tunniussisussaq aamma tigusisussaq e-Boksimik peqassapput.

Digitalimik Allakkerinermit pisussaajunnaarsinneqarneq
Atuarsinnaanissamut pisinnaatitaqarsinnaanngikkuit, pisortani digitalimik allakkerinermit allagarsisarnissamut pisussaajunnaarsinneqarnissaq pillugu qinnuteqarsinnaavutit.

Pisussaajunnaarsinneqarnissamut tunngavissat ilaat ataaseq makkunanit peqqutigissavat:

• 1. januar 1950 sioqqullugu inunngorsimaneq
• Eqqarsartaatsikkut imaluunniit timikkut piginnaasat annikillisimasut
• Qarasaasiamut imaluunniit eletronikkikkut atortorissaarutinut allanut internettimut attaveqartitsisumut periarfissaqannginneq
• Kalaallit Nunaanni aalajangersimasumik najugaqarunnaarsimaneq
• Oqaatsitigut aporfeqarneq
• NemID-mik pissarsisinnaannginneq, assersuutigalugu nunami allamiinneq pissutigalugu
• Sumiiffimmi internettimut attaveqarnissamut periarfissaqanngitsumi najugaqarneq

Atuarsinnaanermut pisinnaatitsineq
Inuup allap atuarsinnaaneranut pisinnaatitsiniaruit iliuuserisinnaasanni periarfissatit makkuupput:

1. e-Boksi illit atukkat aqqutigalugu atuarsinnaanermut pisinnaatitsineq
   Inuk alla digitaliusumik allakkerivinnut atuarsinnaatinnissaanut periarfissinniarukku e-Boksi illit atukkat aqqutigalugu taamaaliorsinnaavutit.
   Ilitsersuut Allagarsiatit allanit atuarneqarsinnaalersikkit pillugu uani nassaarisinnaavat e-Boks imatut atussavat.
   
   
2. Innuttaasunut sullissivimmi immersuiffissaq immersorlugu
   Atuarsinnaanermut pisinnaatitsiniarlutit, illit atuarsinnaanermillu pisinnaatikkusutat, innuttaasunut sullissivimmut ornigullusi immersuiffissamik immersuiartorsinnaavusi.
   Immersukkap innuttaasunut sullissivimmut tunniunnerani kinaassutsimut uppernarsaatit atorsinnaasut takutissavasi.

Digitalimik allakkerinermit pisussaajunnaarsitsineq
Pisussaajunnaarsinneqarnissamut qinnuteqarniaruit innuttaasunut sullissivimmukassaatit, tassanilu qinnuteqarnissamut immersuiffissaq kommunip ilinnut tunniussaa immersussavat.

Immersukkap innuttaasunut sullissivimmut tunniunnerani kinaassutsimut uppernarsaat atorsinnaasoq takutissavat.

Innuttaasunut sullissivimmut kinaassutsimut uppernarsaatit atorsinnaasut ataani allaqqasut arlaat ataaseq takutissavat, taamaalillutit atuarsinnaanermut imaluunniit pisussaajunnaarsitsinissamut immersuiffissaq immersussavat:

1. Biilernermut allagartaq nunami EU/EØS-imi, Kalaallit Nunaanni imaluunniit Savalimmiuni atulersinneqarsimasoq
2. Pas-i inuup pineqartup nunagisaani pisortatut oqartussaasuni atullersinneqarsimasoq
3. Forsvaret-ip kinaassutsimut uppernarsaataa Danmarkimi atulersinneqarsimasoq
4. NATO-pas-i
5. Politiit kinaassutsimut uppernarsaataat Danmarkimi atulersinneqarsimasoq
6. Najugaqarnissamik akuersissut imaluunniit najugaqarnissamik allagartaq assitalik Danmarkimi atulersinneqarsimasoq
7. Danskit aningaaseriviani kinaassutsimut uppernarsaataat
8. Nuna tamakkerlugu kinaassutsimut uppernarsaat assitalik pineqartup nunaani pisortatut oqartussaaffeqarfinni atulersinneqarsimasoq, aamma nunani Schengenimi angalanermi uppernarsaatitut atorneqarsinnaasoq

Kinaassutsimut uppernarsaatit siuliini taaneqartut innuttaasunut sullissivimmi takutissinnaanngikkukkit, pappiliat tullinnguuttut marluk atorsinnaavatit.

Minnerpaamik aappaa inuttut normunnik takussutissartaqassaaq:

• Najugaqarnermut uppernarsaat.
• Kuisinnermut allagartaq imaluunniit atinut uppernarsaat.
• Akileraartarnermut Aqutsisoqarfimmiit ukiumut ukiumoortumik nalunaarusiaq kingulleq imaluunniit siumoortumik nalunaarusiaq.
• Pisortanit ikiorsiissutinik pisartagaqarnermut uppernarsaat nutaannginneq qaammatini pingasuni pisoqaassuseqassaaq.

Atuarsinnaanermut pisinnaatitsineq
Kommunimi atuarsinnaanermut immersuiffissaq immersoreerukku, suliaq ilinnut tunngasoq kommunip suliarissavaa. Atuarsinnaanermut pisinnaatitsineq pilersinneqareerpat innuttaasunik kiffartuussivimmit attavigineqassaatit.

Digitalimik allakkerinermit pisussaajunnaarsitsineq
Kommunimi pisussaajunnaarsitsinermut immersuiffissaq immersoreerukku, suliaq ilinnut tunngasoq kommunip nalilissavaa kingorna pisussaajunnaarsinneqassanersutit imaluunniit pisussaajunnaarsinneqassannginnersutit pillugu attavigineqarumaarlutit.

Pitsaanerusumik ikiuunnissatsinnut ikiortigut. Apeqqutissaqaruit imaluunniit ilitsersorneqarusukkuit, e-mailikkut Digitalimik Sullissinermut Aqutsisoqarfik matumuuna allaffigisinnaavat:

digitalpost@nanoq.gl

Qulequtsiussap nalaani ”e-Boks” allassavat.