Nammineq nakkutilliineq pitsaasumillu suleriaaseqarneq

Inuussutissanut suliffeqarfiutinni malittarisassat eqqortumik atorneqarnersut nammineerluni nakkutilliinissap siunertaraa. Piumasaqaatinik suliffeqarfiit eqqortumik ingerlatsinersoq pillugu suleriaaseqarnissamut qulakkeerinnissinnaavutit.
Nammineq nakkutilliinermut pitsaasumillu suleriaatsinut tunngatillugu ataani paasisaqarnerusinnaavutit.

Qanoq inuussutissanik suliaqarsinnaanersutit (neriassanik) nammineerluni nakkutilliinissamut pilersaarut ilitsersuutitaqarpoq.

Pilersaarummi illit suleqativillu sulinerup nalaani ajoqusertoqannginnissaanik qanoq qulakkeernerinnittoqassanersoq ilitsersuutitaqarpoq. Arlaatigut ajutoortoqassagaluarpat qanoq iliuuseqarnissamut pilersaarummi aamma ilanngunneqassaaq.
Suliffeqarfiutivit nioqqutissaativillu qanoq nakkutigineqarsinnaanerat ilanngullugu allaaserineqassaaq.
Nerisassat pisuullutik inunnik ajortittoqannginnissaa anguniarlugu nakkutiginnilluartoqarnissaa nammineerluni nakkutilliinissamut pilersaarutit atuutissaaq.
Ukua pillugit nakkutilliinermut nammineq pilersaaruteqassaatit:

• Nillataartitsiviit qerititsiviillu.
• Nioqqutissat kissassusaat.

Pequtinik, atortuutinik, maskiinanik ininillu eqqiaaneq tunillannartuiaanerlu.

Kina nammineq nakkutilliinissamut pilersaarummik peqassava?
Kalaallit Nunaanni suliffeqarfiit inuussutissanik (nerisassanik) suliarinnittartut, nioqquteqartartut, uninngasuuteqartartut aamma/imaluunniit assartuisartut nakkutilliinissaminnut pilersaaruteqassapput. Suliffeqarfiutit sorliunersoq apeqqutaalluni sorlermik nammineq nakkutilliinissamik pilersaarutitaassaatit.

Uani suliffeqarfiit sorliit pineqarnersut allattorsimaffik takusinnaavat.

Nerisassanik nillataartinneqartussaanatillu qeritinneqartussaanngitsunik poortornikunik tunisassiorfiit:

• Eqqiaanissamut pilersaaruteqassaaq.

Nerisassanik poortornikunik tunisassiortut, assersuutigalugu nerisassat nillataartinneqarlutillu qeritinneqartussat:

• Nillataartitsivinni qerititsivinnilu kissassuseq/nillissuseq nalunaarsorneqartassaaq
• Eqqiaanissamut pilersaaruteqassaaq.
  
  Kissartunik imaluunniit sassaallerneqartussanik nerisassanik nerisassiortutullu tunisassiorfiit, ima iliussapput:

• Nillataartitsivinni qerititsivinnilu kissassuseq ullormut nalunaarsorneqartassaaq.
• Eqqiaanissamut pilersaaruteqassaaq.
• Nerisassat kissartut iganeqarnerisa nalaani arlaleriarluni kissassusaa ullormut nalunaarsorneqartassaaq.

Qanoq nammineerlutit nakkutilliisinnaanerlutit annertunerusumik uani paasisaqarsinnaavutit: Kalaallit Nunaanni inuussutissanut suliffeqarfinni nammineerluni nakkutilliinissamut atuutilersitsinermi ilitsersuut.

Nammineq nakkutilliinissamut immersugassap assersuutaa aajuna: Aalisakkat qeqqussallu panertuliat pillugit nammineq nakkutilliinermut assersuut

Uumasupilunnik (ass. terissat teriarsuillu) naammattuuissagaluaruit qanoq iliussanersutit uani atuarsinnaavat: Suliffeqarfinni uumasupilunnut tunngasoq.

Aarlerinartunik misissueqqissaarnissamut HACCP-llu malillugu periuseq pillugit annertunerusumik uani paasisaqarsinnaavutit: Aarlerinaatinik misissueqqissaarnissamut HACCP-illu tunngaviinut ilitsersuut

Suliffeqarfinni pitsaasunik suleriaaseqassaatit. Pitsaasumik suleriuseqarnermut tunngasut allattorneqartariaqanngillat, taamaattorli taamaaliorluarsinnaavutit.
Pitsaasumik suleriuseqarneq aamma ima taaneqartarpoq:

• Eqqiluisaarnermi periuseq pitsaasoq.
• Nioqqutissiornermi periuseq pitsaasoq.
• Periutsit oqaasinngorlugit.
• Ileqqut pitsaasut.

Suliffeqarfinni pitsaasumik suleriaaseqarnissamut illit nammineq aalajangiisussaavutit. Malittarisassat maleqqissaarsimanerlugit nammineerluni nakkutiginissaat pingaarnersaavoq.

Pitsaasumik suleriuseqarnissamut siunertaqarnermi makku eqqarsaatigisariaqarpatit:

• Eqqiaanermut, aserfallatsaaliuinnissamut eqqiluisaarnissamullu peqqissaartumik suliarineqartarnissaat anguniarlugu suliffeqarfinni malittarisassat suut atuutissappat.
• Pitsaasumik suleriuseqarneq qanoq malilluarneqartiginersoq qanoq nakkutigilluartigaj.

Maleruagassat suut malinneqassanersut ersarissarniarlugit pitsaasumik suleriuseqarnermi periusissat allattorsinnaavatit. Tamannali piumasaqaataanngilaq.

Pitsaasumik uani suleriaaseqassaatit:

Suliffeqarfiit ilaasa pitsaasumik suleriaaseqarnissartik allaganngortikkusuttarpaat, taamaalillutik malittarisassat suut najoqqutarineqarnersut malinnaffigineqarsinnaaqqullugit. Pingaartumik suliffeqarfinni arlalinnik sulisoqartuni tamanna iluaqutaasinnaavoq. Tamannali piumasaqaataanngilaq. Sulisut tamarmik suliaqarfimminni suleriaasissat pitsaasut ilisimasussaavaat. Assersuutigalugu, suliassaqarfinnut assigiinngitsunut tunngatillugu suliffeqarfiutivit najoqqutassiai sulisuit ilisimasussaavaat:

• Inuttut eqqiluisaarneq,
• Eqqiaaneq.

Pisortaaguit pitsaasumik suleriutsit tamaasa ilisimasaqarfigissavatit. Suliffeqarfinni illillu sulianni malittarisassat unioqqutinneqannginnersut Uumasunut Nakorsaqarnermut Inuussutissalerinermullu Oqartussaqarfimmiit misissortarpagut. Assersuutigisinnaasagut:

• Nateq eqqiluippa?
• Kikkut tamarmik qanoq eqqiaasoqassanersoq nalunngilaat?

Arlaanik ajortoqassappat tassunga tunngasumik qanoq pitsaasumik suleriuseqarnersutit nakkutilliisup apeqqutigissavaa.

Ukuninnga assersuutigalugu aperisinnaavugut:

• Kina eqqiaassava?
• Qanoq akulikitsigisumik eqqiaasoqartarpa?
• Tamanna qanoq isumagisarpiuk?
• Qanoq ilillutit eqqiaalluartoqarsimanersoq paasissaviuk?