Maanna kommunini tamani najugaqarnermut uppernarsaatit aasinnaanngorpat. Uani paasisaqarnerugit

Karakteerit atuarsimanermullu uppernarsaat

Atuartut angajullernut alloriarfimmi aallartikkaangata, tassa 8. klassimi, atuartitsissutini ataasiakkaani karakteerilersorneqalersarput.

Atuartut meeqqat atuarfianni naammassisut atuarsimanerminnut uppernarsaammik pisussaapput. Taanna taaguuteqarpoq atuarsimanermut uppernarsaat.

 

Meeqqat atuarfiisa karakteerileeriaaseq GGS-skalamik taaguutilik atorpaat. GGS “Greenlandic Grading System”-imit naalisagaavoq isumaqarlunilu ’kalaallit karakteerileeriaasiat’.

GGS-skala karakteerinik arfineq-marlunnik alloriarfeqarpoq:
• A = naammassisamut pitsaalluinnartumut
• B = naammassisamut ajunngivissumut
• C = naammassisamut ajunngitsumut
• D = naammassisamut ajorpallaanngitsumut
• E = naammassisamut naammattumut
• Fx= naammassisamut naammaginanngitsumut
• F = naammassisamut pitsaanngitsumut

 


Atuarsimanermut uppernarsaat imaqartinneqassaaq:
• Atuartup atuartitsissutini ataasiakkaani karakteerii, ukioq tamaat atuuttut imaluunniit ukioq tamaat aamma misilitsinnermi atuuttut
• Atuartup immikkut sammisaqarnermini suliaanut uppernarsaat
• Ilinniartitsisunit itisiliilluni allakkatigut naliliinerit oqaatigiumasallu allat
• Suut fagit atuartitsissutigineqarsimaneri

Tamakkua saniatigut atuartut 10. klassimi imminnut naliliiffigisussaapput, taannalu imaqassaaq imminnut atuarfimmi sunngiffimmilu nukittuffittut isigisaannik aammalu siunissami angorusutaminnik. “Imminut nalilerneq” taanna atuarsimanermut uppernarsaammut ilaassaaq.

Atuarfimmit, atuartunit angajoqqaanillu imminut nalilerneq atsiorneqassaaq. Atuarsimanermut uppernarsaat atuarfiup pisortaanit atsiorneqassaaq.

Malugiuk
Atuartut naggataarutaasumik naliliinernik innarluutertik pissutigalugu naammassinninngitsut, atuarsimanermut uppernarsaammittaaq pisarput, tassanilu atuartup atuartitsissutit suut peqataaffigisimanerai allaaserineqartarlutik.

 

Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.