airplanebooksbriefcase business cogs cross election entertainment fish house law lockmedicalpeopleselfservices socialtax

Timmisartumut ilaasutut pisinnaatitaaffiit – Inuit, nassatat aamma timmisartuussinissamik taamaatitsineq

Kommunerisannuinnaq aalajangersimasunik paasissutissaqarpoq

Kommune toqqaruk
Nalinginnaasumik paasissutissiineq

Timmisartumut ilaasutut arlalinnik pisinnaatitaaffeqarputit ima pisoqarpat:
• angalaninni ajoqusersimaguit
• timmisartoq ilaaffigisassat kinguaattoorpat
• nassatatit aserorneqarsimappata imaluunniit tammarneqarsimappata
• nassatatit kinguaattoorlutik tikiunneqarsimappata
• timmisartoq ilaaffigisassat taamaatiinnarneqarpat imaluunniit ikinissamut itigartitaasimaguit

Inuit ajoqusernerat
Timmisartuussinermut atatillugu ajoqusersimaguit, timmisartuutileqatigiiffiup aallaaviatigut 900.000 koruunit missaanni ilinnut taarsiinissamut pisussaaffigaa.

Tamatuma saniatigut timmisartuutileqatigiiffik siumoortumik ilinnut akiliuteqarnissaminut pisussaaffeqarpoq. Siumoortumik akiliutit atorlugit ajoqusersimanerup kingunerisaanik imaluunniit toqusoqaratarsimappat aningaasatigut pisariaqartitsininnut matussutaassapput. Toqukkut qimaguttoqartillugu aningaasat siumut akiliutigisassat 144.000 koruunit missaanniipput.

Timmisartup kinguaattoornera
Timmisartoq ilaaffigisassat qanoq sivisutigisumik kinguaattoortiginersoq apeqqutaalluni pisinnaatitaaffeqarputit. Tullinnguuttutut allassimasuni pisinnaatitaaffigisinnaasatit tallimat nassuiaatigineqarput:
1. Nerisaqarneq aamma imeruersaatit piffissami utaqqinermut naleqqiullugu naammattuusussat
Oqarasuaammik akeqanngitsumik sianersinnaaneq, fax-ersinnaaneq imaluunniit e-mailikkut nassiussisinnaaneq
2. Billetsivit utertinnerani akiata tigunissaa, Angalaninni aallarfigisannit sumiiffimmut akeqanngitsumik uternissat
3. Akunnittarfimmi unnuineq kiisalu mittarfiup unnuiffigisallu akornanni angallanneqarneq. Timmisartuutileqatigiiffiup angallanneqarnissat akunnittarfillu innersuutissavai. Imaappoq sumi unnuissanersutit illit nammineq aalajangersinnaanngilat
4. Aningaasatigut taarsiiffigineqarneq, matumani aningaasatigut annaasaqarsimanerit uppernarsartariaqarnagu
5. Taarsiiffigineqarneq, matumanili kinguaattoorneq peqqutigalugu aningaasatigut annaasaqarsimanerit uppernarsartariaqarpat

Nassatat kinguaattoornerat
Nassatatit kinguaattoorsimappata ornitanni mittarfimmi timmisartuutileqatigiiffik imaluunniit nassatanik isumaginnittarfik attavigissavat. Nassatanik isumaginnittarfik tassaasinnaavoq Novia, ilaasunik aamma nassatanik isumaginnillunilu sullissisuuvoq. Saaffiginnikkuit timmisartuutileqatigiiffiup imaluunniit nassatanik isumaginniffiup Property Irregularity Report-imik (PIR) taaneqartartoq suliarissavaa. Nalunaarusiap assilineranik pinissat eqqaamassavat.

Nassatatit kinguaattoorsimappata atortut pisariaqartut kinguaattoornermi pisinermik taaneqartartoq atorlugu pisiarisinnaavatit, taakku tamakkiisumik ilaannaasumilluunniit timmisartuutileqatigiiffimmit imaluunniit nassatanik isumaginnittartumit ilinnut utertitsisoqassaaq. Nalinginnaasumik perusuersartarfimmi atortuusarput atisallu errortat. Atortut kinguaattoornermi pisinermi suut pisiarisinnaaneritit angalanerpit siunertaa kinguaattoornerullu sivisussusaa apeqqutaapput.

Eqqumaffigissavat nassatat kinguaattoornerini amerlanerpaamik 9.000 koruuninik taarsiiffigineqarsinnaagavit. Tamatuma saniatigut kinguaattoornermi pisinermik taarsiiffigineqartut nalingi timmisartuutileqatigiiffimmit ikilisarneqarsinnaammata.

 

Timmisartuussinissamik taamaatitsineq aamma ikinissamut itigartitaaneq

Timmisartoq ilaaffigisassat taamaatinneqarsimappat imaluunniit ikinissamut itigartitaasimaguit, makuninnga pisinnaatitaaffeqarsinnaavutit:
• Billetsivit akiata utertinnissaa
• Angallassinermut piumasaqaatit assersuunneqarsinnaasut atorlugit ornitassannut angalanissavit allanngortinnissaa
• Sumiiffimmut angalanerpit aallartiffianut periarfissaq siullerpaaq atorlugu akeqanngitsumik utimut timmisartuunneqarnissaq
• Piffissamut utaqqinermi atorneqartumut naleqqiullugu naammaginartumik naleqquttumik nerisaqarnissaq aamma imeruersaateqarnissaq
• Oqarasuaammik akeqanngitsumik sianersinnaaneq, fax-ersinnaaneq imaluunniit e-mailikkut nassiussisinnaaneq
• Akunnittarfimmi unnuineq kiisalu mittarfiup unnuiffigisallu akornanni angallanneqarneq
• Aningaasatigut taarsiiffigineqarneq

Ikinissamut itigartitaasinnaavutit assersuutigalugu makku patsisigalugit:
• Kingusinaartumik takkunneq
• Napparsimaneq
• Aalakoorneq
• Siorasaarisutut pissusilersorneq
• Imaluunniit allatut pissusilersorneq imaluunniit timmisartumi isumannaallisaanermik navianartorsiortitsisumik pissuseqarneq

Pissutsit taakku patsisigalugit ikinissamut itigartitaasimaguit, siuliini taaneqartunut pisinnaatitaanngilatit.

Malugiuk
Pisinnaatitaaffinnut timmisartornermi ingerlaarfik sorleq aqqutiginerit aamma timmisartuutileqatigiiffik suna ilaaffiginerit apeqqutaapput. Taamaattumik pisinnaatitaaffitit tusagaqarfigiumagukkit timmisartuutileqatigiiffik atukkat siusinaartumik saaffigisariaqarpat. Amerlasuutigut timmisartuutileqatigiiffiup nittartagaani pisinnaatitaaffitit pillugit paasissutissat aamma nassaarisinnaavatit. Pisuni allani quppersakkamik nassissinnaavaatsit.

Timmisartuussinissat taamaatiinnarneranni aamma ikinissamut itigartitaanermi pisinnaatitaaffitit pillugit annertunerusumik Danmarkimi Trafikstyrelsenip nittartagaani aamma Forbruger Europap nittartagaani paasisaqarsinnaavutit.

 

Ineqarnermut Attaveqaqatigiinnermullu Naalakkersuisoqarfik
Imaneq 1A - 601
Postboks 909
3900 Nuuk

Oqarasuaat: (+299) 34 50 00
E-mail: box909@nanoq.gl
Nittartagaq: www.naalakkersuisut.gl