Peqqissaasoq (BA)

Peqqissuseq soqutigiviuk?
Peqqisasaasutut suliaq tamatigoortuuvoq, suliamut tunngatillugu ilisimasat inuttullu piginnaasat atorneqartarlutik.

“Nalinginnaasumik peqqissaasut isigineqartarput napparsimmavinni sulisuusutut kisianni taamatut isiginninneq eqquissuunngilaq.” - Anna Kleist, instituttip pisortaa

Peqqissaasutummi ilinniarsimasut aamma suliarisinnaavaat nalinginnaanerusumik peqqinnissamut tunngasunik ilitsersuisarneq, ilinniartitsisarneq allarpassuillu.

Suliassaq pingaarneq tassaavoq innuttaasut sapinngisamik pitsaanerpaamik peqqissuutinnissaannut suleqataanissaq, tamannalu suliat assigiinngitsorpassuit aqqutigalugit peqataaffigisinnaavat.

Ilinniakkamut ilaapput napparsimasunik paarsineq pillugu teoriinik ilisimatusarneq, anatomi aamma fysiologi, nappaatinik ilinniarneq, perorsaaneq, nakorsaatilerineq, psykologii allarpassuillu.

Peqqissaasunngorniarneq bacheloritut ilinniarneruvoq ukiunik sisamanik sivisussuseqartoq – suliffimmi sulineq teoriimillu ilinniarneq paarlakaallugit ilinniarnerulluni, suliffimmi sulineq ilinniarnerup pingajorarterutaanik sivisussuseqarpoq.

Teoriimik ilinniarneq
Teoriimik ilinniarnermi pingaarnertut fagi tassaavoq napparsimasunik paarsineq. Tamatuma saniatigut fagit sammineqartartut tassaapput peqqissuseq-, pinngortitaq-, human- aamma inuiaqatigiilerineq. Ilinniartitsineq holdikkaatut, eqimattatut- immikkullu sammisaqarfiusutut aaqqissugaavoq. Skema malillugu sapaatip akunneranut akunnerit 20-25 ilinniartitsissutigineqartarput, kisianni suliffimmi ilinniarnermi akunnerit 40-45 suliffigineqarnissaat naatsorsuutigineqassaaq.

Suliffimmi ilinniarneq
Suliffimmi ilinniarneq / sungiusarneq piffissami sivisuumi ingerlanneqartarpoq, Kalaallit Nunaanni Danmarkimiluunniit peqqissaavinni ingerlanneqartarluni. Kalaallit Nunaanni Dronning Ingridip napparsimavissuani, napparsimavinni peqqissaavinnilu sinerissami nunaqarfinnilu peqqissaavinni sungiusarneq ingerlanneqartarpoq. Aammattaaq ilinniartitsineq ingerlanneqartarpoq utoqqaat illuini, angerlarsimaffinnut ornigulluni napparsimasunik paarsineq kiisalu napparsimasunik paarsineq. Kiisalu Danmarkimi tarnikkut napparsimasunik paarsineq. Tamatuma saniatigut nunani avannarlerni suliffimmi ilinniarnissamut periarfissaqarpoq.

Peqqissaasutut ilinniarnermut tiguneqarsinnaasut killeqarput; tamatumunnga pissutaavoq suliffimmi sungiusarfissat killeqarmata, ukiumullu 14-naat iliniakkami suliffimmi sungiusartutut tiguneqarsinnaallutik.

Peqqissaasutut ilinniarnissamut qinnuteqartut eqimattat marlunngorlugit tiguneqartarput:

Eqimattat siulliit, 70 %-sut, piumassuseqarluni qinnuteqartunit kiisali GUX-mi agguaqatigiisillugu angusaat tunngavigalugit tiguneqartarput. Peqqinneq, peqqinneq timersornerlu imaluunniit pinngortitalerineq GGS/syvtrins agguaqatigiisillugu angusat imaluunnit fagini assingusumik angusat:

Kalaallisut qallunaatullu A-mik angusisimanissaq
Tuluttut A-mik angusisimanissaq
Matematik-mi F-mik angusisimanissaq.
- Fysik imaluunniit Kemi imaluunniit Science på C -mik angusaqarsimanissaq
Uumassusilerinermi / imaluunniit timersornermi b-mik angusisimanissaq

Eqimattami tassami piukkunnaateqarluartunik inissaqartinneqartunik amerlanerusunik, amerlasuunik qinnuteqartoqartillugu, agguaqatigiisillugu qaffasinnerusumik angusaqarsimanissamik aalajangiisoqassaaq, inuttut oqaloqateqarnermik aamma tiguneqarnissamik misilitsinnernik ilallugit.

Eqimattat aappaat, 30 %-sut, piumasaqaatit allat tunngavigalugit tiguneqassallutik, assersuutigalugu, ilinniarnertuunngorniarfimmi angusat appasinnerusut, Piumassuseqarluni qinnuteqaat misilittakkanik allanik ilallugu, immaqalu inuttut oqaloqatiginninnermik ilallugu.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatit Ilisimatusarfimmit suliarineqassaaq, ilinniagaqarnersiuteqarnissamut qinnuteqaatit Ilinniagaqarnersiuteqartitsivimmit suliarineqassalluni, kisianni taakku tamarmik Ilisimatusarfimmit allaffissornikkut aqunneqassapput.

nalunaarfigineqassaatit akuerisaasimanerlutit imaluunniit akuerisaasimannginnerlutit.

Eqqaamallugu ilumut ilinnialerniarlutit nalunaarutigissagakku.

Qinnuteqarnerpit nalaani suli soraarummeersimanngikkuit akuerineqarsinnaavutit soraarummeerninni angusisimanissat piumasaqaatiginerqarluni.
Eqqaamallugu soraarummeersimanermut uppernarsaat nassiunneqassammat kingusinnerpaamik juunip 29-ani.

Ilinniarnerup qaqugu aallartinnissaa, ilinniagaqarnersiutit il.il. pillugit kigusinnerpaamik 15 januaari Iliisimatusarfimmit ilisimatinneqassaatit.

Ilinniarnermik aallartiffik
Ilinniagaq ingerlaavartumik 1 septembari

Neqeroortoq
Ilimmarfik

Aningaasaqarneq
Sullissivik aqqutigalugu ilinniarnersianik ilinniarninni qinnuteqarsinnavutit

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.

Siunissami periarfissat / Suliffiusinnaasut
Peqqissaasunngorniat ilinniartinneqartarput peqqissaavinni ataatsimoorfiusuni parineqartarput meeqqat, inuusuttuaqqat, inersimasut aamma utoqqaat – peruluttut, timikkut tarnikkullu napparsimasut. Peqqissaasunngorniarneq suliffissaqarnissamut aqqutissaavoq, nammineq inuttut unamminartunik naammattuugassaqarfiusoq kiisalu inunnik sullissiviusoq.
Peqqissaasunngorniarneq ilutigalugu nunanut allanukarnissamut periarfissaqarluarpoq – ilinniarnerup nalaani peqqissaasunngoreernerullu kingorna.
Kalaallit Nunaanni peqqissaavinni atuisut oqaloqatigisarnerisigut ilinniartitaaneq aaqqissugaavoq.
Peqqissaasunngorniarneq napparsimasunik paarsisutut bacheloritut ilinniarneruvoq, peqqissaasutut taaguuteqalernissamut peqqissaasutullu sulinissamut akuerisaasoq.

Ilinniarnermik aaqqissuussineq
https://da.uni.gl/media/xczhzp0b/sygeplejerske-studieordning-2016.pdf

Isumaqaruit Ilisimatusarfiup akuerineqarnissannik aalajangiinera maleruagassanik unioqqutitsisinerusoq maalaarsinnaavutit. Maalaarut allaganngorlugu nassiutissavat ilinniartunik kiffartuussivimmut: studieadm@uni.gl. Maalaarut tunngavilersussavat tunniutissallugulu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.