Pisortani Digitalimik allakkerinermit pisussaajunnaarsinneqarnissannut qinnuteqarit

Pisussaajunnaarsitsinissamut maana qinnuteqaat

Ulloq 1. januar 2021 aallarnerfigalugu Kalaallit Nunaanni innuttaasut 15-ileereersimasunut tamanut Pisortani Digitalimik Allagarsisalernissaq inatsisitigut pisussaaffinngorpoq.

Innuttaasut pisussaajunnaarsitsinissamut kissaateqartut najukkaminni innuttaasunik kiffartuussivinni taamaaliussapput.

Pisussaajunnaartinneqarnissamut najoqqutassani minnerpaamik ataatsimik naapertuutsitsiguit pisussaajunnaartinneqarsinnaavutit:

  • 1. januar 1950 sioqqullugu inunngorsimassaatit
  • Timikkut eqqarsartaatsikkulluunniit piginnaasakitsuussaatit
  • Qarasaasiamik elektronikkimilluunniit allamik internetimut attaveqartumik atuinissannut periarfissaqassanngilatit
  • Kalaallit Nunaanni aalajangersimasumik najugaqarunnaarsimassaatit
  • Oqaatsitigut aporfeqarsimassaatit
  • NemID-mik pissarsisinnaassanngilatit, assersuutigalugu nunani allaniinnerit pissutigalugu
  • Nunap immikkoortuani internetimut attaveqanngitsumi najugaqartuussaatit

Pisussaajunnaarsitsinissamut qinnuteqaammut immersuiffissap immersorneratigut pisussaajunnaarsitsinissamut qinnuteqarsinnaavutit.

Pisussaajunnaarsitsinissamut qinnuteqarnermi periarfissat pingasuupput.

  • Immersuiffissaq anillatseriarlugu angerlarsimaffinnit immersorsinnaavat innuttaasunillu kiffartuussivimmut tunniukkiartorlugu.
  • Imaluunniit najukkanni innuttaasunik kiffartuussivimmukariarlutit pisussaajunnaarsitsinissamut immersuiffissaq immersoriarlugu saaffiginnittarfimmut tunniussinnaavat.
  • Imaluunniit ilaquttannit ikiortissarsioriarlutit sullissivik.gl aqqutigalugu nittartakkatigut pisussaajunnaarsitsinissamut immersuillutit qinnuteqarsinnaavutit

Pisussaajunnaarsitsinissamut immersuiniaruit una tooruk

Innuttaasutut pisussaajunnaarsitsinissamut qinnuteqaatit nassiukkukku, immersukkap tunniunnerata kinguninngua qinnuteqaatit akissutissarsiffigissavat. Pisussaajunnaarsinneqarsimaguit pisussaajunnaarsitsineq sullissisup atortorissaarummut nalunaarsussavaa. Tamatuma kingorna allagarsiavit digitalikkut tigusassanngikkitit pappilianngorlugilli allakkatigut pissarsiarisassagitit nalunaarsorsimalissaaq.

Qinnuteqaatit itigartitsissutigineqarsimappat itigartitsissut allaganngorlugu kommunimit ilinnut tunniunneqassaaq.

Kommunip aalajangiinerata maalaarutiginissaanut pisinnaatitaaffeqarputit. Pisussaajunnaarsitsinissamut qinnuteqaatit pillugu aalajangiineq inatsimmut atuuttumut naapertuutinngitsoq isumaqarfigigukku, maalaaruteqarsinnaavutit.

Maalaaruteqarniaruit Digitalimik Sullissinermut Aqutsisoqarfimmut maalaarutit nassiutissavat.

Maalaaruteqaruit uku ilanngutissavatit:

  • Suna pillugu qinnuteqarsimaninnut nassuiaat
  • Kommunimit sooq itigartinneqarsimanerit pillugu nassuiaat
  • Aalajangiineq sooq naammaginnginnerlugu nassuiaat

Kommunip aalajangiinera malittarisassanut naapertuunnersoq Digitalimik Sullissinermut Aqutsisoqarfimmit taamaallaat qulakkeerneqartussaavoq.

Maalaarutit uunga nassiutissavat digitalisering@nanoq.gl.

Aalajangiinerup tiguneranit sap. ak. arfineq-pingasut qaangiutsinnagit maalaaruteqarsinnaavutit.

Uannga allanneqarpoq: Digitalimik Sullissinermut Aqutsisoqarfik

Attaveqarnissamut paasissutissat
Apeqqutissaqaruit uunga allagaqarsinnaavutitl digitalpost@nanoq.gl.
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.