Allakkat Digitaliusut

Innuttaasunut 15-ileereersimasunut inatsisitigut piumasaqaataavoq pisortanit allagarsiat digitalimik tiguneqartarnissaat.

Allakkat digitaliusut allagarsiaapput digitalimik allagarsiivik aqqutigalugu tiguneqartartut. Digitalimik allagarsiiviit aqqutigalugu pisortanit allagarsiatit atuarsinnaavatit, taannalu aqqutigalugu pisortaqarfinnut suliffeqarfinnullu qularnaatsumik attaveqaqateqarsinnaallutit.

Allakkat digitaliusut e-Boks aqqutigalugu atuarsinnaavatit. e-Boks tassaavoq interneti aqqutigalugu allagarsiivik digitaliusoq. Computeri, tableti smartphonillu aqqutigalugit e-Boks iserfigisinnaavat.

e-Boks atorlugu allakkanik digitaliusunik atuarneq pillugu sukumiinerusumik uani atuarsinnaavutit ‘e-Boks atorlugu allakkanik digitaliusunik atuarneq'

Allakkat digitaliusut aqqutigalugu innuttaasut pisortaqarfinnit allagarsiassatit digitalinngorlugit pissarsiarisinnaavaat. Aaqqiissut e-Boks A/S aqqutigalugu aaqqissuunneqarsimavoq. Taamaalillutik innuttaasut suliffeqarfiillu pisortaqarfinnit allagarsiassatik e-Boks aqqutigalugu tigusinnaalernikuuaat.

e-Boks atorlugu allakkanik digitaliusunik atuarneq pillugu sukumiinerusumik uani atuarsinnaavutit ‘e-Boks atorlugu allakkanik digitaliusunik atuarneq'

Kommunini, Namminersorlutik Oqartussani, naalagaaffiup suliffeqarfiutaanni suliffeqarfiit allakkanik digitaliusunik nassiussisinnaapput. Assersuutigalugu Akileraartarnermut Aqutsisoqarfimmit ukiumut nalunaarusiaq aammalu kommunimit allakkiat paasissutissanik imallit digitalimik nassiunneqarsinnaapput.

Pisortaqarfiit tulliuttut Allakkat Digitaliusut atorlugit nassiussisarput:

Kommunit:

• Avannaata Kommunia
• Kommune Qeqertalik
• Kommuneqarfik Sermersooq
• Kommune Kujalleq
• Qeqqata Kommunia
  
  

Namminersorlutik Oqartussat:

• Digitalinngortitsinermut Aqutsisoqarfik
• Akileraartarnermut Aqutsisoqarfik
• Naalakkersuisut siulittaasuata Naalakkersuisoqarfia
• Nunatta Nakorsaaneqarfia
• Aalisarnermut Piniarnermullu Naalakkersuisoqarfik
• Naatsorsueqqissaartarfik

Namminersortunit allagarsiassatit taamaallaat digitalinngorlugit pisinnaavatit, suliffeqarfik e-Boksimik atuisuuppat.

Innuttaasutut allakkanik digitaliusunik tigusisimanerlutit misissuisussaatitaavutit. Taamaattumik digitalimik allagarsiivippit alakkallattaartarnissaa pingaaruteqarpoq. Alakkallattaasarnianngikkukku imaassinnaavoq allakkat pingaarutillit assersuutigalugu akiligassat pisortaqarfinnillu nalunaarutit akisariaqakkatit takunngitsooritit.

Allakkat digitaliusut nassiussisumit nassiunneqareeraangata, naatsorsuutigineqartarpoq tigusisussap allagaq tigusimassagaa. Taamaattumik illit akisussaaffigivat, allakkat digitaliusut akineqartarnissaat allagarsisimanerlutillu misissortarnissaat.

Allagarsiatit digitaliusut allanit atuarneqarsinnaaniassammata pisinnaatitsissummik tunniussisinnaavutit.

Pisinnaatitsissummik tunniussinissannut pingaaruteqarpoq, pisinnaatitsissummik tunisavit ilinnut tatiginartuunissaa. Assersuutigalugu uiit nulialluunniit pisinnaatitsissummik tunisinnaavat, taamaalillusi angerlarsimaffissinni allagarsiatit marluullusi isumagisinnaallugit. Katissimasat allagarsiannut digitaliusunut takunnissinnaaneranut pisinnaatitsissummik tunniussereeruit, aapparisat ataasiarluni allagarsiivimmut digitaliusumut iseruni nammineq illillu allagarsiassasi takusinnaalissavai. Taamaaliortoqarsinnaaneranut piumasaqataat ataasiinnaavoq – tassa marluullusi e-Boksimi atuisutut nalunaarsorsimanissarsi.

Allakkanik digitaliusunik atuaasinnaanermut pisinnaatitsissut pillugu 'Atuaasinnaanermut pisinnaatitsissummik qinnuteqarit’ iserfigalugu paasisaqarnerusinnaavutit.

Pisortani Digitalimik Allakkerinermut ilanngunnissamit pisussaajunnaartinneqarsinnaanermut qinnuteqartoqarsinnaavoq, taamaalillutit pisortaqarfinnit allakkat tigussaasut suli pisarsinnaallugit. Allakkat Digitaliusut tigusarsinnaanissaanut akuerineqarnissamut piumasaqaateqarpoq.

Pisortani Digitalimik Allakkerinermut ilanngunnissamit pisussaajunnaartinneqarsinnaanermut qinnuteqarneq pillugu ‘Pisortani Digitalimik Allakkerinermut ilanngunnissamit pisussaajunnaarsinneqarnissamut qinnuteqarneq’ iserfigalugu paasisaqarnerusinnaavutit.

 

Danmarkimi najugaqartutut nalunaarsorsimanngikkuit Danmarkimi Pisortani Digitalimik Allakkerinermut inatsimmi allassimasunut attuumassuteqanngilatit. Kalaallit Nunaanni najugaqaruit Danmarkimi pisortaqarfinnit Allakkanik Digitaliusunik nassinneqarnissannut piumasaqaateqartoqanngilaq.

Danmarkimi Allakkanut Digitaliusunut nalunaarsorsimanngisaannaruit, Danmarkimilu najugaqanngikkaluarlutit Danmarkimi pisortaqarfinnit allakkianik digitaliusunik pissarsisarusullutit – taava pisartagaqalernissannut nalunaarsortissinnaavutit.

Danmarkimi pisortaqarfinnit allagarsisalernissamut tunngatillugu ’Danmarkimi Allakkat Digitaliusut’ iserfigalugu paasisaqarnerusinnaavutit.

Danmarkimi allakkat digitaliusut pillugit attaveqarfissat
Digitaliseringsstyrelsen
Att: Digital Post
Landgreven 4
1301 København K
Danmark

Danmarkimi Allakkat Digitaliusut pillugit ikiorneqarnissamik pisariaqartitsinermi sianerfissaq: +45 33 98 00 33.

Oqarasuaatip ammasarfii:

• Ataasinngornermit tallimanngornermut nal. 08:00-20:00 (Danmarkimi nalunaaqutaq malillugu)
• Weekendini nalliuttunilu nal. 10:00-16:00 (Danmarkimi nalunaaqutaq malillugu)

www.borger.dk aqqutigalugu kiffartuussivimmut aamma saaffiginnissinnaavutit. Danmarkimi pisortaqarfinnit allagarsiassat digitalimik pisartagaqalernissaat Kalaallit Nunaanni najugalinnut piumasaqataanngimmat, aaqqiissut pillugu kiffartuunneqarneq qallunaatut ingerlanneqassaaq.