Imminut sullississutinut iserniaruit NemID suli isissutissatut atussavat.

MitID-mik atuinissamut ikiorneqarneq

MitID-mik peqarpit MitID-mullu tunngatillugu ikiortariaqarlutit? Allassimani ukunani atuarsinnaasatit tassaapput MitID-mut tunngatillugu sumut ikiortissarsiorsinnaanerit, qanoq MitID pillugu ikiorsiivimmut saaffiginnissinnaanerit (ass. mobilit katassimagukku), MitID-mik pissarsiguit qanoq iliussanerlutit kiisalu MitID-mi paasissutissat qanoq iliorsinnaaneritit.

Ikiortariaqaruit bankinnut attaveqarsinnaavutit. Ikiuunnissaminnut piareersimapput.

Piumaguit tatigisannut ikioqqusinnaavutit.
Ikiortigisinnaasat ilaqutarisinnaavat imaluunniit ikinngutit.

Eqqaamaannassavat makku siammartissannginnakkit:

  • kodetit
  • MitID-mi appit, kodemik takutitsissut imaluunniit kodemik atuffassissut
  • Atuisutut ID – MitID pillugu ikiorsiivimmut nammineerlutit attaveqaruit taakkununnga siammartersinnaavat *

*Immikkoortut takuuk ”Qaqugukkut MitID pillugu ikiorsiivimmut attaveqassaanga?” matuma ataani.

Pisuni immikkut ittuni MitID pillugu ikiorsiivik Danmarkimiittoq attavigisariaqarsinnaavoq. Assersuutigalugu oqarasuaatit katassimagukku atortorissaarutinilu allani MitID appi ikkussimanngikkukku ikiortariaqalersinnaavutit. Taamaattumik atortorissaarutini arlalinni MitID appi ikkullugu MitID-mut backupiliornissaq pitsaasuussaaq, assersuutigalugu oqarasuaatinni aamma tabletinni.

MitID pillugu ikiorsiivimmit ikiortariaqarninnut assersuutaasinnaapput:

  • Oqarasuaatit katassimagukku MitID.dk-kkullu MitID appi matutissinnaanagu
  • MitID atukkat ajortumeerniarneqartoq pasitsaassaqaruit MitID.dk-kkullu MitID appi matutissinnaanagu
  • MitID pillugu pinartumik ikiortariaqaruit

Danmarkimi MitID pillugu ikiorsiivimmut attaveqarit

Oqarasuaat:
+45 33980010

Maili:
https://support-mitid.digst.dk/

Ammasarfiit  
- Ataasinngornermiit tallimanngornermut nal. 04.00-16.00. (Nunatsinni nalunaaqutaq)  
- Arfininngorneq, sapaat sapaassuarnilu nal. 06.00-12.00. (Nunatsinni nalunaaqutaq)  

Periarfissatut kommunerisat MitID-mik atuutilersitsinissamut piareersimappat najukkanni innuttaasunik sullissivimmut saaffiginnissinnaavutit.

Malugiuk
Danmarkimi MitID pillugu ikiorsiiviup attaveqarfiginerani oqaatsit qallunaatut atorneqarmata.

MitID-tut atukkavit paarilluarnissaa pingaaruteqarpoq. Taamaammat siunnersuutit tallimat malikkit:

  1. Kodetit allanut takutinngisaannakkit
  2. MitID appi, kodemik takutitsissut kodemilluunniit atuffassissut allanut tunniutinngisaannaruk
  3. Atuisutut ID allanut siammartinngisaannaruk – MitID pillugu ikiorsiivimmut nammineerlutit attaveqaruit taakkununnga siammartersinnaavat
  4. MitID atorlugu akuersinngisaannassaatit assersuutigalugu aningaaserivimmeertuusaartoqarluni, ikiorsiivimmeertuusaartoqarluni allarluinnarmeertuusaartoqarluniluunniit sianerfigitikkuit, e-mailerfigitikkuit imaluunniit pulaarneqaruit. Tamanna pillugu taamatut attavigineqartarunnanngilatit
  5. MitID atorlugu akuersinialerninni suna akuerinialernerlugu maluginiaqqissaartassavat. Iliuuseriniakkannut allagaq naapertuutinngippat imaluunniit nammineerlutit iliuuseqarniartuunngikkuit, akuersissuteqartassanngilatit.


MitID-mik pisaaraluaruilluunniit NemID pigiinnarallassavat. NemID-p atorunnaavinnissaata tungaanut sumiiffiit ilaanni NemID atorallartussaavoq.

Mobilit katassimagukku erngerlutit MitID appi oqarasuaatinni katatanniittoq matutissavat. MitID.dk imaluunniit MitID pillugu ikiorsiivimmut sianerlutit atukkat matutissinnaavat.

MitID-mut backupeqarsinnaavutit atortorissaarutini arlalinni, ass. mobilinni aamma tabletinni MitID appip ikkunneratigut. Atortorissaarutivit aappaa atorlugu MitID appi mobilimi nutaami ikkuteqqissinnaavat. MitID-mi kinaassutsimut uppernarsaatinik allanik peqaruit, ass. kodemik takutitsissut, MitID.dk-mut isersinnaavutit atuutilersitsinissamullu kodemik pillutit taavalu MitID appimut nutaamut PIN-kodeugallartussamik pissarsiaqarlutit.

MitID appi peertoorsimagukku periarfissatullu ass. kodemik takutitsissummik peqarnak, MitID.dk-mut iseriarlutit atuutilersitsinissamut kodemik pissarsisinnaavutit MitID appimullu nutaamut PIN-kodeugallartumik pissarsillutit, kisianni NemID-mik peqartariaqarputit.

MitID appeqaruit MitID.dk-mut iseriarlutit kodemik takutitsissummik imaluunniit kodemik atuffassissummik inniminniisinnaavutit.

Allanik najugaqateqaruit assersuutigalugulu tableti ataatsimoorullugu, MitID-mut immikkut atugarisassinnut atortorissaarut ataaseq atorlugu isersinnaavusi.

Taamaattoqassappat atuisutut ID-si immikkoortussaapput, tassami MitID-mi nammineq atugaq ataasiinnarmut atorsinnaagami. Appi arlaliullugu atorussiuk MitID appip ammarnissaanut kiinnamik ilisarsisaat imaluunniit inussat ipaasaannik ilisarinnissut atorsinnaassanngilasi. Appi arlaliullusi atussagussiuk MitID appi PIN-kodetalik atussavarsi.

Nunani allani najugaqaruit NemID-qarlutillu
Ullumikkut NemID-qaruit taava MitID-mik pisaartariaqarputit. Kalaallit imaluunniit qallunaat aningaaseriviannik netbankikkut isumaqatigiissusiorsimaguit netbankikkut imaluunniit mobilbankikkut MitID-mik pisaassaatit. Aningaaserivik aqqutigisinnaanngikkukku MitID.dk aqqutigisinnaavat.

Nunani allani najugaqaruit NemID-millu peqarnak

Ullumikkut NemID-qanngikkuit Kalaallit Nunaannukaqqikkuit innuttaasunik sullissivimmut pissarsiniarsinnaavutit. Qallunaat passiat, ingerlatitsisinnaanermut allagartat imaluunniit allagartat ataani allassimasut pingasuusut akornanni marluk nassassavatit:

  • Inummut allagartaq
  • Kuisinnermut allagartaq
  • Inunngornermut allagartaq

Inuttut normuni paasissutissat tunngavigalugit qulakkeerinninniarluni apeqqutinik akissuteqaqquneqassaatit imaluunniit illiunerit uppernarsarniarlugu uppernarsaasussamik ilaqaqquneqarlutit. Uppernarsaasussaq ilaqutarisinnaavat imaluunniit ikinngutigisinnaavat. Inuttut normuni paasissutissat ilinnut attuumassutillit allattorsimasuutigineqartut ilinnut apeqquteqarnissamut naammannissaat qulakkeerneqarsinnaanngimmat innersuussutigissavarput illiuninnik uppernarsaasinnaasumik ilagisaqarnissat.

Nunani allani mobilima normua MitID-mut atorsinnaava?
Aap, MitID-mi nunani allani mobilip normui atorneqartarput.

Allakkanut Digitaliusunut (e-Boks) iserniaruit MitID atussavat, NemID-lli pigiinnassavat.

Ullumikkut NemID atorlugu e-Boksimut isertarputit. Piffissap ingerlanerani NemID MitID-mit taarserneqassaaq.

Taamaammat e-Boksi atorniarukku MitID atortalerumaarpat.

Uannga allanneqarpoq: Digitalimik Sullissinermut Aqutsisoqarfik

Danmarkimi MitID pillugu ikiorsiivik

Oqarasuaat: +45 33980010
Maili:https://support-mitid.digst.dk/

 
Ammasarfiit 

- Ataasinngornermiit tallimanngornermut nal. 04.00-16.00. (Nunatsinni nalunaaqutaq)
- Arfininngorneq, sapaat sapaassuarnilu nal. 06.00-12.00. (Nunatsinni nalunaaqutaq)

Malugiuk: Danmarkimi MitID pillugu ikiorsiiviup attaveqarfiginerani oqaatsit qallunaatut atorneqarmata.

Periarfissatut kommunerisat MitID-mik atuutilersitsinissamut piareersimappat najukkanni innuttaasunik sullissivimmut saaffiginnissinnaavutit. 

 
Innuttaasumut

sullissivik.gl-imut tikilluarit

Sullissivik Innuttaasumut isilerputit. Suliffeqarfiutilimmut nuunniaruit, qulaani ‘Suliffeqarfiutilimmut’ toqqassavat.